‘സർക്കാരിനോട് അമിത വിധേയത്വം,ന്യൂനപക്ഷ വിഭാഗത്തിലെ ജഡ്ജിയുടെ നിയമനം തടഞ്ഞു’; മുൻ ചീഫ് ജസ്റ്റിസ് ചന്ദ്രചൂഡിനെതിരെ വിമർശനവുമായി ജസ്റ്റിസ് കിഷൻ കൗൾ

ന്യൂഡൽഹി: ജഡ്ജിമാരുടെ നിയമനമടക്കമുള്ള കാര്യങ്ങളിൽ സുപ്രീം കോടതി മുൻ ചീഫ് ജസ്റ്റിസ് ഡി.വൈ. ചന്ദ്രചൂഡ് കേന്ദ്ര സർക്കാരിനോട് അമിതമായ വിധേയത്വം കാണിച്ചിരുന്നതായി മുൻ ജസ്റ്റിസ് സഞ്ജയ് കിഷൻ കൗളിന്റെ വെളിപ്പെടുത്തൽ. ചീഫ് ജസ്റ്റിസുമായി പല കാര്യങ്ങളിലും വിയോജിപ്പുണ്ടായിരുന്നെന്നും, ഒരിക്കൽ യോഗത്തിൽ നിന്ന് ഇറങ്ങിപ്പോയിട്ടുണ്ടെന്നും അദ്ദേഹം തന്റെ ഓർമക്കുറിപ്പായ ‘വിത്തൗട്ട് ഫിയർ ഓർ ഫേവർ’ എന്ന പുസ്തകത്തിൽ പറയുന്നു. ഈ മാസം അവസാനത്തോടെ പുറത്തിറങ്ങാനിരിക്കുന്ന ഈ പുസ്തകത്തിലാണ് ഗുരുതരമായ ഈ ആരോപണങ്ങളുള്ളത്.

കൊളീജിയത്തിൽ അംഗമായിരുന്ന കാലത്ത് സർക്കാരുമായുള്ള ഇടപെടലുകളുടെ കാര്യത്തിൽ കടുത്ത ഭിന്നതയുണ്ടായിരുന്നതായി കൗൾ പുസ്തകത്തിൽ പറയുന്നു. ജഡ്ജിമാരുടെ നിയമനത്തിന് സർക്കാരിന്റെ അഭിപ്രായം ചോദിക്കുന്നതും ഔദ്യോഗിക ചർച്ചകൾക്ക് മുൻപ് അനുമതി തേടുന്നതും തമ്മിൽ വലിയ വ്യത്യാസമുണ്ടെന്നാണ് അദ്ദേഹത്തിന്റെ അഭിപ്രായം. സുപ്രീം കോടതിയിലെ നിയമനം ആരുടേയും അവകാശമല്ലെന്നും അത് സ്വാധീനം ഉപയോഗിച്ച് നേടിയെടുക്കേണ്ട ഒന്നല്ലെന്നും അദ്ദേഹം വ്യക്തമാക്കുന്നു.

സുപ്രീം കോടതിയിലെ ആറ് ഒഴിവുകളിലേക്ക് നിയമനം നടത്തുന്നതിനിടെ ഉണ്ടായ ഒരു സംഭവവും അദ്ദേഹം പുസ്തകത്തിൽ വിവരിക്കുന്നുണ്ട്. അഞ്ച് പേരുകൾ നേരത്തെ തീരുമാനിച്ചിരുന്നു. എന്നാൽ കൊളീജിയം യോഗത്തിലേക്ക് പോകുന്നതിനിടെ സർക്കാരിന്റെ നിർദ്ദേശപ്രകാരം ചന്ദ്രചൂഡ് ആറാമതൊരു പേര് കൂടി നിർദ്ദേശിച്ചെന്നും ഇത് താൻ എതിർത്തെന്നും കൗൾ പറയുന്നു.

ഒരു ന്യൂനപക്ഷ മതവിഭാഗത്തിൽ നിന്നുള്ള ജഡ്ജിക്ക് സ്ഥാനക്കയറ്റം നൽകുന്നതുമായി ബന്ധപ്പെട്ടും ചില തർക്കങ്ങൾ ഉണ്ടായിരുന്നതായി കൗൾ ഓർക്കുന്നു. കോടതികളിൽ ഇതിനോടകം തന്നെ ന്യൂനപക്ഷ മതവിഭാഗത്തിൽ നിന്നുള്ളവർ ഉള്ളതിനാൽ ഇനിയും പ്രാതിനിധ്യം ആവശ്യമുണ്ടോ എന്ന ചോദ്യം സർക്കാർ ഉന്നയിച്ചിരുന്നു. ജഡ്ജിയുടെ കുടുംബത്തിന്റെ ജാതിയെക്കുറിച്ച് ചോദ്യങ്ങൾ ഉയർന്നതും തന്നെ അസ്വസ്ഥനാക്കിയെന്ന് കൗൾ കൂട്ടിച്ചേർത്തു. നിയമന പ്രക്രിയയിൽ സർക്കാരിന്റെ ഇത്തരത്തിലുള്ള ഇടപെടലുകൾ തുടരുകയാണെങ്കിൽ കൊളീജിയം സംവിധാനത്തിന്റെ പ്രസക്തി തന്നെ ഇല്ലാതാകുമെന്ന് താൻ ചന്ദ്രചൂഡിനോട് പറഞ്ഞതായി അദ്ദേഹം പറയുന്നു.

ഈ സംഭവത്തെ തുടർന്ന് അദ്ദേഹം യോഗത്തിൽ നിന്ന് ഇറങ്ങിപ്പോവുകയും ചെയ്തു. പിന്നീട് കുറച്ചു കാലത്തേക്ക് കൊളീജിയം യോഗങ്ങൾ നടന്നിരുന്നില്ല. ഒടുവിൽ സർക്കാർ നിലപാട് മാറ്റിയതോടെ ആ ജഡ്ജിക്ക് നിയമനം ലഭിക്കുകയായിരുന്നു. നട്ടെല്ലുള്ള ജഡ്ജിമാരെ സർക്കാർ ബഹുമാനിക്കുമെന്നും, അതേസമയം സർക്കാരിനെ എതിർക്കുന്നവരുടെ രാഷ്ട്രീയ താത്പര്യങ്ങൾ സംരക്ഷിക്കാനുള്ള ഇടമല്ല കോടതിയെന്നും അദ്ദേഹം ഓർമിപ്പിക്കുന്നു.

അതേസമയം, കൗളിന്റെ ആരോപണങ്ങളോട് മുൻ ചീഫ് ജസ്റ്റിസ് ഡി.വൈ. ചന്ദ്രചൂഡ് പ്രതികരിച്ചു. പുസ്തകം വായിക്കാതെ വിശദമായ ഒരു മറുപടി നൽകാൻ കഴിയില്ലെന്നും, കൗൾ യോഗത്തിൽ നിന്ന് ഇറങ്ങിപ്പോയതായി തനിക്ക് ഓർമ്മയില്ലെന്നും അദ്ദേഹം പറഞ്ഞു. കൊളീജിയം യോഗങ്ങൾക്ക് ശേഷം പ്രമേയങ്ങൾ പാസാക്കുന്നത് പതിവായിരുന്നു. നിയമന ഉത്തരവിൽ ഒപ്പിടുന്നത് രാഷ്ട്രപതിയായതിനാൽ ജഡ്ജി നിയമനത്തിൽ സർക്കാരിന് അഭിപ്രായം പറയാനുള്ള സാഹചര്യമുണ്ടെന്നും അദ്ദേഹം വ്യക്തമാക്കി. 2017 ഫെബ്രുവരിയിൽ സുപ്രീം കോടതി ജഡ്ജിയായ ജസ്റ്റിസ് സഞ്ജയ് കിഷൻ കൗൾ 2023 ഡിസംബറിലാണ് വിരമിച്ചത്. ഡൽഹി, പഞ്ചാബ്-ഹരിയാന, മദ്രാസ് എന്നീ ഹൈക്കോടതികളിലും അദ്ദേഹം സേവനമനുഷ്ഠിച്ചിട്ടുണ്ട്.