‘നവാസ്ക്കയുടെ ആത്മാവിന്റെ കൈപിടിച്ച് ഇന്നും തൈ നട്ടു, ഞാനും മക്കളും നടുക്കടലിൽപ്പെട്ടപോലെ’; വിവാഹ വാർഷികത്തിൽ ഉള്ളുപൊള്ളി രഹ്ന നവാസ്
കലാഭവൻ നവാസിന്റെയും രഹ്‌നയുടെയും ഇരുപത്തിനാലാം വിവാഹവാർഷികത്തിൽ ഹൃദയം നുറുങ്ങുന്ന കുറിപ്പുമായി രഹ്ന. ഓരോ വിവാഹവാർഷികത്തിനും നവാസും രഹ്‌നയും ഒന്നിച്ച് വൃക്ഷത്തൈകൾ നടുമായിരുന്നു. അങ്ങനെ നവാസും രഹ്‌നയും ഒന്നിച്ചു നട്ട മരത്തൈകൾ നിറഞ്ഞ ഉദ്യാനമാണ് അവരുടെ വീടിനു ചുറ്റും. നവാസിന്റെ ആത്മാവിന്റെ കൈപിടിച്ച് ഇന്നും താനൊരു തൈ നട്ടെന്നു പറയുകയാണ് രഹ്ന. വർഷങ്ങളായി ചെയ്തു വരുന്നത് കൊണ്ട് ചെയ്യാതിരിക്കാനും പറ്റുന്നില്ല, മനസ്സിന്റെ വിഷമം കാരണം ചെയ്യാനും പറ്റുന്നില്ലെന്ന് ഹൃദയവേദനയോടെ രഹ്ന ഓർത്തെടുക്കുന്നു.
“ഇന്ന് ഞങ്ങളുടെ വെഡ്‌ഡിങ് ആനിവേഴ്‌സറി ആണ്. നവാസ്ക്കയുടെ ആത്മാവിന്റെ കൈ പിടിച്ച് ഇന്നും ഞാൻ തൈ നട്ടു, വർഷങ്ങളായി ചെയ്തു വരുന്നത് കൊണ്ട് ചെയ്യാതിരിക്കാനും പറ്റുന്നില്ല മനസ്സിൻ്റെ വിഷമം കാരണം ചെയ്യാനും പറ്റുന്നില്ല. ചില സമയത്ത് വിധി നമ്മുടെ ഹൃദയത്തെ കീറിമുറിക്കും, ഈശ്വരൻ അത് ഹീൽ ആക്കും, പക്ഷേ ആ പാടുകൾ നമ്മുടെ മനസ്സിൽ അങ്ങനെ കിടക്കും. ഞാനും മക്കളും നടുക്കടലിൽ പെട്ട അവസ്‌ഥയാണ്. എത്രനേരം നടുക്കടലിൽ പിടിച്ചു നിൽക്കാൻ പറ്റും എന്ന് എനിക്കറിയില്ല. നവാസ്ക്ക് പോയി ഇത്രയും നാളായിട്ടും ആർക്കും ഒരു ബാധ്യതയും ആയിട്ടില്ല. അത് പടച്ചവൻ എന്നെ ഒന്ന് താങ്ങിപിടിച്ചതുകൊണ്ടാണ്. മരണം വരെ ആരിൽനിന്നും ഒന്നും വാങ്ങാതെ ഇങ്ങനെ തന്നെ മുന്നോട്ടുപോണം എന്നാണ് ആഗ്രഹം, അതിനു ഞാൻ വർക്ക് ചെയ്തേ പറ്റൂ.”-രഹ്ന കുറിച്ചു.
