ഹൃദയസ്തംഭനം മുതൽ വൃക്കരോഗം വരെ; കാലുകൾ നൽകുന്ന 5 അപായ സൂചനകൾ അറിയുക
ശരീരഭാരം താങ്ങുന്നതിലുപരി ശരീരത്തിന്റെ ആരോഗ്യസ്ഥിതി കൃത്യമായി വിളിച്ചോതുന്ന കണ്ണാടികളാണ് കാലുകൾ എന്ന് ആരോഗ്യവിദഗ്ധർ പറയുന്നു. കാലുകളിൽ പ്രകടമാകുന്ന ചെറിയ മാറ്റങ്ങൾ പോലും ഹൃദ്രോഗം, പ്രമേഹം, വൃക്കരോഗം തുടങ്ങിയ ഗുരുതരമായ ആരോഗ്യപ്രശ്നങ്ങളുടെ സൂചനയാകാമെന്ന് ആരോഗ്യവിദഗ്ധർ വ്യക്തമാക്കുന്നു.
കാലുകൾ നൽകുന്ന അഞ്ച് പ്രധാന മുന്നറിയിപ്പുകൾ:
കാലിലെ വീക്കം: ഹൃദയസ്തംഭനം, വൃക്കരോഗം അല്ലെങ്കിൽ രക്തം കട്ടപിടിക്കുന്ന ‘ഡിവിടി’ (DVT) തുടങ്ങിയ അവസ്ഥകളുടെ ലക്ഷണമാകാം ഇത്. ഗർഭിണികളിൽ കാണുന്ന പെട്ടെന്നുള്ള വീക്കം പ്രീക്ലാമ്പ്സിയയുടെ സൂചനയുമാകാമെന്നും വിദഗ്ധർ വ്യക്തമാക്കുന്നു.
തണുത്ത പാദങ്ങൾ: രക്തചംക്രമണം ശരിയായി നടക്കാത്തതാണ് ഇതിന് കാരണം. ധമനികളിൽ തടസ്സമുണ്ടാകുന്ന പെരിഫറൽ ആർട്ടറി ഡിസീസ് (PAD) ഹൃദയാഘാത സാധ്യത വർദ്ധിപ്പിക്കുന്നു.
രാത്രികാലങ്ങളിലെ മസിൽ കയറ്റം: നിർജ്ജലീകരണം മുതൽ ഗുരുതരമായ വൃക്കരോഗങ്ങൾക്കും രക്തക്കുഴൽ പ്രശ്നങ്ങൾക്കും ഇത് കാരണമാകാം.
ചർമ്മത്തിലെ നിറവ്യത്യാസം: കാലിലെ ചർമ്മം തവിട്ടുനിറമോ പർപ്പിൾ നിറമോ ആയി മാറുന്നത് സിരകളിലെ തകരാർ (CVI) മൂലമാണ്. ഇത് പിന്നീട് ഉണങ്ങാത്ത വ്രണങ്ങളായി മാറാൻ സാധ്യതയുണ്ട്.
മരവിപ്പും തരിപ്പും: പ്രമേഹം മൂലമുള്ള നാഡീക്ഷതത്തിന്റെ (Peripheral Neuropathy) പ്രധാന ലക്ഷണമാണിത്. വിറ്റാമിൻ ബി12 കുറവും ഇതിന് കാരണമാകാറുണ്ട്.
ഇത്തരം ലക്ഷണങ്ങൾ തുടർച്ചയായി കാണുകയാണെങ്കിൽ സ്വയം ചികിത്സ ഒഴിവാക്കി ഡോക്ടറെ സമീപിച്ച് വിദഗ്ധ പരിശോധനകൾ നടത്തേണ്ടത് അനിവാര്യമാണ്.
