പിഎം കെയേഴ്സ് ഫണ്ടിനെക്കുറിച്ച് പാർലമെന്റിൽ ചോദ്യം വേണ്ട; പ്രധാനമന്ത്രിയുടെ ഓഫീസ്
ന്യൂഡൽഹി: പിഎം കെയേഴ്സ് ഫണ്ട് ഉൾപ്പെടെയുള്ള പ്രധാന ഫണ്ടുകളെക്കുറിച്ചുള്ള ചോദ്യങ്ങൾ പാർലമെന്റിൽ അനുവദിക്കരുതെന്ന് പ്രധാനമന്ത്രിയുടെ ഓഫീസ് ലോക്സഭാ സെക്രട്ടേറിയറ്റിനെ അറിയിച്ചു. പിഎം കെയേഴ്സ്, പ്രധാനമന്ത്രിയുടെ ദേശീയ ദുരിതാശ്വാസ ഫണ്ട് (PMNRF), ദേശീയ പ്രതിരോധ ഫണ്ട് (NDF) എന്നിവയുമായി ബന്ധപ്പെട്ട നടപടികൾ പാർലമെന്ററി ചട്ടപ്രകാരം അനുവദനീയമല്ലെന്നാണ് പ്രധാനമന്ത്രിയുടെ ഓഫീസിന്റെ നിലപാട്.
ലോക്സഭയിലെ നടപടിക്രമ ചട്ടങ്ങൾ ഉദ്ധരിച്ചുകൊണ്ടാണ് ജനുവരി 30ന് പിഎംഒ കത്തയച്ചത്. സർക്കാരുമായി നേരിട്ട് ബന്ധമില്ലാത്തതോ സർക്കാരിനോട് നേരിട്ട് ഉത്തരവാദിത്തമില്ലാത്തതോ ആയ സ്ഥാപനങ്ങളെക്കുറിച്ചുള്ള ചോദ്യങ്ങൾ തടയുന്ന ചട്ടങ്ങളാണ് ഇതിനായി ചൂണ്ടിക്കാണിക്കുന്നത്. മൂന്ന് ഫണ്ടുകളും പൊതുജനങ്ങളിൽ നിന്നുള്ള സ്വമേധയാ ഉള്ള സംഭാവനകളെ അടിസ്ഥാനമാക്കിയുള്ളതാണെന്നും ഇന്ത്യയുടെ ഏകീകൃത നിധിയിൽ (Consolidated Fund of India) നിന്ന് പണം എടുക്കുന്നില്ലെന്നും പിഎംഒ വാദിക്കുന്നു. അതിനാൽ ഇവ പാർലമെന്ററി മേൽനോട്ടത്തിന്റെ പരിധിയിൽ വരില്ലെന്നാണ് വിശദീകരണം.
2020ൽ കോവിഡ് പശ്ചാത്തലത്തിൽ രൂപീകരിച്ച പിഎം കെയേഴ്സ് സംസ്ഥാന ഫണ്ടല്ലെന്നും വിവരാവകാശ നിയമത്തിന്റെ പരിധിയിൽ വരുന്ന പൊതു അതോറിറ്റിയല്ലെന്നും കേന്ദ്ര സർക്കാർ നേരത്തെ കോടതിയെ അറിയിച്ചിരുന്നു. ഈ ഫണ്ടുകളുമായി ബന്ധപ്പെട്ട ചോദ്യങ്ങളോ സീറോ അവർ നോട്ടീസുകളോ വരുമ്പോൾ ചട്ടങ്ങൾ കർശനമായി പാലിക്കണമെന്ന് സെക്രട്ടേറിയറ്റിന് നിർദ്ദേശം നൽകിയിട്ടുണ്ട്. പ്രതിപക്ഷ പാർട്ടികൾ ഫണ്ടുകളുടെ സുതാര്യതയെക്കുറിച്ച് നിരന്തരം ചോദ്യങ്ങൾ ഉയർത്തുന്നതിനിടെയാണ് പിഎംഒയുടെ നീക്കം. എന്നാൽ, പ്രധാനമന്ത്രിയുടെ പേരും ഔദ്യോഗിക ചിഹ്നങ്ങളും ഉപയോഗിക്കുന്ന ഫണ്ട് പാർലമെന്ററി പരിശോധനയ്ക്ക് വിധേയമാകാത്തത് ജനാധിപത്യ വിരുദ്ധമാണെന്നാണ് പ്രതിപക്ഷത്തിന്റെ ആക്ഷേപം.
