രാത്രി ലൈറ്റ് ഓണ് ചെയ്ത് ഉറങ്ങുന്ന ശീലക്കാരാണോ? സൂക്ഷിക്കുക! ഹൃദയാഘാതം മുതല് പക്ഷാഘാതം വരെ വിളിച്ചുവരുത്തുമെന്ന് പഠനം
sleeping with light
ഉറങ്ങുന്ന സമയത്ത് ചുറ്റുമുള്ള വെളിച്ചം പൂർണമായും ഒഴിവാക്കി ഇരുട്ടിൽ കിടക്കുന്നത് ഹൃദയാരോഗ്യത്തിന് ഉത്തമമാണെന്ന് പുതിയ പഠനം. ഉറക്കത്തിൽ ശരീരത്തിൽ വെളിച്ചം ഏൽക്കുന്നത് ഹൃദയ സംബന്ധമായ അസുഖങ്ങൾ വരാനുള്ള സാധ്യത വർധിപ്പിക്കുമെന്ന് ഗവേഷകർ മുന്നറിയിപ്പ് നൽകുന്നതായി ആരോഗ്യ ജേണലായ ‘ഹെല്ത്ത് ലൈന്’ റിപ്പോര്ട്ട് ചെയ്തു.
വെളിച്ചം ഹൃദയത്തെ തകർക്കുന്നത് എങ്ങനെ?
ഉറക്കത്തിനിടെ അന്തരീക്ഷത്തിലെ വെളിച്ചം തലച്ചോറിൽ സമ്മർദം (സ്ട്രെസ്) വർധിപ്പിക്കാൻ കാരണമാകും. ഈ സമ്മർദം ശരീരത്തിലുടനീളമുള്ള ധമനികളിൽ വീക്കം (Inflammation) ഉണ്ടാക്കുകയും, ഇത് ഹൃദയാഘാതം (Heart Attack) അല്ലെങ്കിൽ പക്ഷാഘാതം (Stroke) എന്നിവയ്ക്ക് വഴിവെക്കുകയും ചെയ്യുമെന്നാണ് പഠനത്തിലെ പ്രധാന കണ്ടെത്തൽ. ഏറ്റവും കുറഞ്ഞ വെളിച്ചം പോലും ഹൃദയത്തിന് ദോഷകരമാണ്, എന്നാൽ പൂർണമായ ഇരുട്ടാണ് ഏറ്റവും നല്ല ഉറക്ക അന്തരീക്ഷം എന്നും പഠനം വ്യക്തമാക്കുന്നു.
രാത്രിയിലെ കൃത്രിമ വെളിച്ചത്തിന്റെ അളവ് കൂടുന്നതിനനുസരിച്ച് ഹൃദ്രോഗ സാധ്യതയും വർധിക്കുന്നതായി ഗവേഷകർ കണ്ടെത്തി.
അമേരിക്കൻ ഹാർട്ട് അസോസിയേഷൻ (എഎച്ച്എ) ആണ് ഈ പഠനത്തിന് പിന്നിൽ. 2005നും 2008നും ഇടയിൽ ബോസ്റ്റണിലെ മസാചുസെറ്റ്സ് ജനറൽ ആശുപത്രിയിൽ ബ്രെയിൻ ഇമേജിങ് സ്കാനുകൾക്ക് വിധേയരായ 466 മുതിർന്നവരിലാണ് പഠനം നടത്തിയത്. പങ്കെടുത്തവരുടെ ശരാശരി പ്രായം 55 ആയിരുന്നു.
പങ്കെടുക്കുന്നവർ ഉറങ്ങിക്കിടന്നിരുന്ന വീടുകളിലെ പ്രകാശ സാഹചര്യങ്ങൾ ഗവേഷകർ ഉപഗ്രഹ ഡാറ്റ (സുവോമി നാഷണൽ പോളാർ ഓർബിറ്റിങ് പാർട്ണർഷിപ്പ് ഉപഗ്രഹം) ഉപയോഗിച്ചാണ് അളന്നത്. സ്വാഭാവിക നക്ഷത്രപ്രകാശമോ ചന്ദ്രപ്രകാശമോ ഈ പഠനത്തിൽ ഉൾപ്പെടുത്തിയിരുന്നില്ല.
ഇരുണ്ട അന്തരീക്ഷത്തിൽ ഉറങ്ങുന്നതാണ് ഏറ്റവും ആരോഗ്യകരമായ ഉറക്ക രീതി എന്നതിന് കൂടുതൽ തെളിവുകൾ വർധിച്ചുവരുന്നതായി സ്വീഡനിലെ ഉപ്സാല യൂണിവേഴ്സിറ്റിയിലെ ഉറക്ക വിദഗ്ധനായ ജോനാഥൻ സെഡെർനെസ് പറയുന്നു.
അദ്ദേഹം ചൂണ്ടിക്കാണിച്ച 2022-ലെ ഒരു പഠനത്തിൽ, 100 ലക്സ് വെളിച്ചത്തിൽ ഉറങ്ങിയവരിൽ ഹൃദയമിടിപ്പ് വർധിക്കുകയും ഗാഢനിദ്ര കുറയുകയും ഇൻസുലിൻ സംവേദനക്ഷമത കുറയുകയും ചെയ്തതായി കണ്ടെത്തി. മൊബൈൽ സ്ക്രീനുകളിൽ നിന്നുള്ള നീല വെളിച്ചം ഉറക്കത്തിന് തടസ്സമുണ്ടാക്കുന്ന പ്രധാന ഘടകമാണെന്നും അദ്ദേഹം കൂട്ടിച്ചേർത്തു.
ഇരുട്ട് ശരീരത്തെ മെലറ്റോണിൻ (Melatonin) ഉത്പാദിപ്പിക്കാൻ പ്രേരിപ്പിക്കുന്നു. ഇത് രക്തസമ്മർദം കുറയ്ക്കുന്നത് ഉൾപ്പെടെയുള്ള ശരീരത്തിന്റെ സുപ്രധാന പ്രക്രിയകളെ സാധാരണ നിലയിലേക്ക് എത്തിക്കാൻ സഹായിക്കുന്നു. ഹൃദയാരോഗ്യത്തിന് ഉറക്കത്തിന്റെ അളവും പ്രധാനമാണ്. ആറ് മണിക്കൂറിൽ കുറഞ്ഞ ഉറക്കം ഹൃദ്രോഗ സാധ്യത വർധിപ്പിക്കുന്നതായും പഠനം വ്യക്തമാക്കുന്നു.
ഇരുണ്ട മുറി ഒരുക്കാനുള്ള എളുപ്പവഴികൾ:
ബ്ലാക്ക്ഔട്ട് കർട്ടനുകൾ: ജനലുകൾ കട്ടിയുള്ള കർട്ടനുകൾ/ഷെയ്ഡുകൾ ഉപയോഗിച്ച് അടയ്ക്കുക. വെളിച്ചത്തെ പൂർണമായി തടയുന്ന ബ്ലാക്ക്ഔട്ട് കർട്ടനുകൾ പരിഗണിക്കാം.
വാതിലുകൾ അടയ്ക്കുക: കിടപ്പുമുറിയുടെ വാതിലുകൾ അടച്ച് വെളിച്ചം ഉള്ളിൽ കടക്കുന്നത് ഒഴിവാക്കുക.
ലൈറ്റുകൾ ഓഫ് ചെയ്യുക: മുറിക്ക് പുറത്തുള്ള ലൈറ്റുകൾ ഓഫ് ചെയ്യാൻ ശ്രദ്ധിക്കുക.
സ്ലീപ്പ് മാസ്ക്: ഉറങ്ങുമ്പോൾ കണ്ണ് മറയ്ക്കാൻ സ്ലീപ്പ് മാസ്ക് ഉപയോഗിക്കുക.
നൈറ്റ്ലൈറ്റുകൾ ഒഴിവാക്കുക: രാത്രിയിൽ ഉപയോഗിക്കുന്ന ചെറിയ ലൈറ്റുകൾ പോലും ഒഴിവാക്കുക.
