‘ഇറാൻ ഡ്രോണുകളെ നേരിടാൻ അമേരിക്ക യുക്രെയ്‌ന്റെ സഹായം തേടി’; അവകാശവാദവുമായി സെലൻസ്‌കി

കീവ്/വാഷിങ്ടൺ: പശ്ചിമേഷ്യയിൽ അമേരിക്കൻ സൈനിക താവളങ്ങൾക്കും യുദ്ധക്കപ്പലുകൾക്കും നേരെ ഇറാൻ നടത്തുന്ന ഡ്രോൺ ആക്രമണങ്ങൾ പ്രതിരോധിക്കാൻ അമേരിക്ക യുക്രെയ്നിന്റെ സഹായം തേടിയതായി റിപ്പോർട്ട്. യുക്രെയ്ൻ പ്രസിഡന്റ് വ്‌ളാദിമിർ സെലൻസ്‌കിയാണ് ഇക്കാര്യം അവകാശപ്പെട്ടത്. റഷ്യൻ അധിനിവേശത്തിനിടെ ഇറാന്റെ ‘ഷഹീദ്’ ഡ്രോണുകളെ വിജയകരമായി നേരിട്ട യുക്രെയ്നിന്റെ യുദ്ധപരിചയം പ്രയോജനപ്പെടുത്താനാണ് പെന്റഗൺ ലക്ഷ്യമിടുന്നതെന്നാണ് യുഎസ് മാധ്യമങ്ങൾ റിപ്പോർട്ട് ചെയ്യുന്നത്.

യുക്രെയ്ൻ യുദ്ധത്തിൽ റഷ്യ വ്യാപകമായി ഉപയോഗിക്കുന്ന ഇറാൻ നിർമിത ഡ്രോണുകളെ ആകാശത്തുവെച്ച് തന്നെ തകർക്കുന്നതിൽ യുക്രെയ്ൻ സൈന്യം വലിയ വിജയം നേടിയിരുന്നു. ഈ സാങ്കേതികവിദ്യയും തന്ത്രങ്ങളും പശ്ചിമേഷ്യയിലും പ്രായോഗികമാക്കാൻ അമേരിക്കൻ ഉദ്യോഗസ്ഥർ ചർച്ച നടത്തിയതായി യുക്രെയ്ൻ പ്രസിഡന്റ് വെളിപ്പെടുത്തി.

യുക്രെയ്‌നിൽ ഇറാനിയൻ ഡ്രോണുകൾക്കെതിരെ കരുത്ത് തെളിയിച്ച ‘വാമ്പയർ’ പ്രതിരോധ സംവിധാനം അമേരിക്ക ഇപ്പോൾ പശ്ചിമേഷ്യയിലേക്ക് അയക്കാൻ തീരുമാനിച്ചതായാണു വിവരം. ലേസർ ഗൈഡഡ് റോക്കറ്റുകൾ ഉപയോഗിക്കുന്ന ഈ സംവിധാനം കുറഞ്ഞ ചെലവിൽ ഡ്രോണുകളെ തകർക്കാൻ സഹായിക്കുന്നതാണ്.

യുക്രെയ്‌നിൽ റഷ്യ പയറ്റുന്നതിന് സമാനമായി ഡ്രോണുകൾ ഉപയോഗിച്ച് പ്രതിരോധം തകർത്ത ശേഷം മിസൈലുകൾ വർഷിക്കുന്ന രീതിയാണ് ഇറാൻ ഇപ്പോൾ അമേരിക്കയ്ക്ക് നേരെ പ്രയോഗിക്കുന്നത്. ഇത് പ്രതിരോധിക്കാൻ യുക്രെയ്ൻ വികസിപ്പിച്ചെടുത്ത തന്ത്രങ്ങൾ തങ്ങൾക്ക് ഉപകരിക്കുമെന്ന് അമേരിക്കൻ പ്രതിരോധ വൃത്തങ്ങൾ കരുതുന്നു.

പ്രസിഡന്റ് ട്രംപിന്റെ നിലപാട്: ഇറാനെതിരെ 10-ൽ 15 മാർക്ക് അർഹിക്കുന്ന സൈനിക മുന്നേറ്റമാണ് അമേരിക്ക നടത്തുന്നതെന്ന് പ്രസിഡന്റ് ഡൊണാൾഡ് ട്രംപ് അവകാശപ്പെട്ടു. ഇതിനിടയിലാണ് ആയുധ സാങ്കേതികവിദ്യയിൽ യുക്രെയ്നുമായുള്ള സഹകരണം ശക്തമാക്കുന്നത്.

പശ്ചിമേഷ്യൻ സംഘർഷം ഏഴാം ദിവസത്തിലേക്ക് കടക്കുമ്പോൾ, അമേരിക്കയും യുക്രെയ്നും തമ്മിലുള്ള ഈ സൈനിക സഹകരണം ഇറാന് വലിയ വെല്ലുവിളിയാകും. തങ്ങളുടെ പക്കൽ ഇത്തരം ഡ്രോണുകളെ നേരിടാൻ മികച്ച സംവിധാനങ്ങളുണ്ടെന്ന് സെലെൻസ്‌കി ആവർത്തിച്ചു.