റഫീഞ്ഞയുടെ കുടുംബം പട്ടിണിയിൽ? വാർത്തകളിൽ പ്രതികരിച്ച് ഭാര്യ നതാലിയ | Raphinha financial crisis

ബ്രസീലിയ: ബാഴ്‌സലോണയുടെ സൂപ്പർ വിങ്ങറും ബ്രസീലിയൻ താരവുമായ റഫീഞ്ഞ കടുത്ത കുടുംബ-സാമ്പത്തിക പ്രതിസന്ധികൾ നേരിടുകയാണെന്ന തരത്തിൽ പ്രചരിച്ച വാർത്തകളിൽ പ്രതികരണവുമായി ഭാര്യ നതാലിയ ബെല്ലോലി(Raphinha financial crisis). മുൻ ബ്രസീൽ താരം വാമ്പെറ്റ ഒരു പോഡ്കാസ്റ്റിലൂടെ നടത്തിയ വിവാദ വെളിപ്പെടുത്തലുകൾക്ക് പിന്നാലെയാണ് പ്രതികരണവുമായി നതാലിയ രംഗത്തെത്തിയത്. ബ്രസീലിൽ തുടങ്ങി പിന്നീട് സ്‌പെയിനിലെ മാധ്യമങ്ങളിൽ വരെ വൻ ചർച്ചയായ ഈ ഗോസിപ്പുകൾ തികച്ചും അടിസ്ഥാനരഹിതവും വിഡ്ഢിത്തവുമാണെന്ന് അവർ വ്യക്തമാക്കി.

തുറന്നടിച്ച് നതാലിയ

സ്പാനിഷ് മാധ്യമമായ ‘മുണ്ടോ ഡിപോർട്ടീവോ’ റിപ്പോർട്ട് ചെയ്തതനുസരിച്ച്, തങ്ങളുടെ സ്വകാര്യ ജീവിതത്തെയും സാമ്പത്തിക ഭദ്രതയെയും കുറിച്ച് ഉയർന്ന ചോദ്യങ്ങൾക്ക് വളരെ വ്യക്തവും ശക്തവുമായ ഭാഷയിലാണ് നതാലിയ മറുപടി നൽകിയത്. നതാലിയയുടെ വാക്കുകൾ ഇങ്ങനെയായിരുന്നു:

”സത്യസന്ധമായി പറഞ്ഞാൽ, എന്റെ സാമ്പത്തിക സ്ഥിതിയെക്കുറിച്ച് സംസാരിക്കേണ്ടി വരുന്നത് തന്നെ തികച്ചും വിഡ്ഢിത്തമാണെന്നാണ് എനിക്ക് തോന്നുന്നത്. റഫീഞ്ഞയ്ക്ക് ഇന്ന് ലഭിക്കുന്ന വരുമാനത്തിന്റെ വെറും 10 ശതമാനം മാത്രമാണ് ഞങ്ങൾക്ക് കിട്ടുന്നതെങ്കിൽ പോലും ഞങ്ങൾ ഏറെ അനുഗ്രഹിക്കപ്പെട്ടവരാണ്.’

തുടക്കത്തിൽ ഈ വിഷയത്തിൽ പരസ്യമായി പ്രതികരിക്കാൻ താൻ വിമുഖത കാണിച്ചതിന്റെ കാരണവും നതാലിയ വിശദീകരിച്ചു: ”സോഷ്യൽ മീഡിയയിലൂടെ അത്തരം കാര്യങ്ങൾ വെളിപ്പെടുത്തേണ്ട യാതൊരു ആവശ്യവും ഉള്ളതായി ഞാൻ കരുതുന്നില്ല. കാരണം നമ്മൾ ജീവിക്കുന്ന ഇന്നത്തെ സാമൂഹിക യാഥാർത്ഥ്യത്തെക്കുറിച്ച് എനിക്ക് കൃത്യമായ ബോധ്യമുണ്ട്. ഞാൻ സോഷ്യൽ മീഡിയയിൽ വന്ന്, ‘നോക്കൂ, ഞാൻ പാവപ്പെട്ടവളല്ല, ഞാൻ ഇപ്പോഴും പണക്കാരിയാണ്’ എന്ന് പോസ്റ്റ് ചെയ്താൽ, ആളുകൾ എന്നെ വിവരമില്ലാത്തവളെന്നും മാന്യതയില്ലാത്തവളെന്നും വിളിച്ച് കുറ്റപ്പെടുത്തും.”

വാർത്തകൾ തനിയെ അടങ്ങുമെന്ന് താൻ കരുതിയെന്നും എന്നാൽ കാര്യങ്ങൾ കൂടുതൽ വഷളായതുകൊണ്ടാണ് ഇപ്പോൾ സംസാരിക്കുന്നതെന്നും നതാലിയ വ്യക്തമാക്കി. ”ഈ കഥകൾ കാലക്രമേണ അടങ്ങുമെന്നാണ് ഞാൻ കരുതിയത്. എന്നാൽ ഈ അഭ്യൂഹങ്ങൾ ഇപ്പോൾ സ്‌പെയിനിൽ വരെ എത്തിക്കഴിഞ്ഞു. ഞങ്ങൾ വളരെ വലിയ സാമ്പത്തിക പ്രതിസന്ധിയിലൂടെയാണ് കടന്നുപോകുന്നതെന്ന് ഇപ്പോൾ എല്ലാവരും വിശ്വസിക്കാൻ തുടങ്ങിയിരിക്കുന്നു.”-അവർ കൂട്ടിച്ചേർത്തു.

വിവാദത്തിന് തിരികൊളുത്തിയ വാമ്പെറ്റയുടെ വാദങ്ങൾ

ബ്രസീലിന്റെ 2002-ലെ ലോകകപ്പ് വിജയത്തിൽ പങ്കാളിയായിരുന്ന മുൻ മിഡ്ഫീൽഡർ വാമ്പെറ്റ ‘റെഡ് കാസ്റ്റ്’ എന്ന പോഡ്കാസ്റ്റിൽ സംസാരിക്കവെയാണ് ഫുട്‌ബോൾ വിവാദ വെളിപ്പെടുത്തൽ നടത്തിയത്. റഫീഞ്ഞയ്ക്ക് ഗുരുതരമായ കുടുംബ പ്രശ്‌നങ്ങളുണ്ടെന്നും സാമ്പത്തികമായി താരം വലിയ തകർച്ചയിലാണെന്നുമായിരുന്നു വാമ്പെറ്റയുടെ അവകാശവാദം. ഇതോടൊപ്പം, ഈ പ്രതിസന്ധികളിൽനിന്ന് കരകയറാൻ റഫീഞ്ഞ സൗദി പ്രോ ലീഗ് ക്ലബ്ബായ അൽ-ഹിലാലിലേക്ക് ചേക്കേറാൻ ആഗ്രഹിക്കുന്നുവെന്നും അദ്ദേഹം കൂട്ടിച്ചേർത്തു. വലിയ തുക വാഗ്ദാനം ചെയ്യുന്ന സൗദി ക്ലബിലേക്കുള്ള മാറ്റം റഫീഞ്ഞയുടെ സാമ്പത്തിക ബുദ്ധിമുട്ടുകൾ പരിഹരിക്കാൻ സഹായിക്കുമെന്ന തരത്തിലായിരുന്നു വാമ്പെറ്റയുടെ വാക്കുകൾ.

ഹെയ്തിക്കെതിരായ മത്സരത്തിനിടെ പരിക്കേറ്റതിനെ തുടർന്ന് സ്‌കോട്ട്ലൻഡിനെതിരെയുള്ള അടുത്ത മത്സരത്തിൽനിന്ന് റഫീഞ്ഞ പുറത്തായതിന് തൊട്ടുപിന്നാലെയാണ് ഈ വിവാദം പൊട്ടിപ്പുറപ്പെട്ടത്. മൈതാനത്തെ പരിക്കിനേക്കാൾ താരം നേരിടുന്ന വ്യക്തിപരമായ പ്രശ്‌നങ്ങളാണ് വാർത്തകളിൽ നിറഞ്ഞത്.

റഫീഞ്ഞയുമായി അടുത്ത ബന്ധമുള്ള ഇഗോർ പാഡിലിയ എന്ന വ്യക്തിയും വാമ്പെറ്റക്കെതിരെ രംഗത്തുവന്നിരുന്നു. സോഷ്യൽ മീഡിയയിലൂടെ ‘കൂട്ടുകാരാ, ഈ നുണകൾക്ക് നീ വലിയ വില നൽകേണ്ടി വരും, ഇതിന് നീ വിശദീകരണം നൽകണം’ എന്ന് ഇഗോർ പരസ്യമായി പ്രതികരിച്ചു.

റഫീഞ്ഞയുടെ ഭാവി

ലോകകപ്പ് ക്യാമ്പിനിടെ താൻ കേട്ട ചില വെറും ഗോസിപ്പുകൾ മാത്രമായിരുന്നു അദ്ദേഹം പോഡ്കാസ്റ്റിലൂടെ പങ്കുവച്ചതെന്ന് പിന്നീട് വാമ്പെറ്റ തന്നെ സമ്മതിച്ചു. യാതൊരു ഔദ്യോഗിക സ്ഥിരീകരണവുമില്ലാത്ത ഇത്തരം കാര്യങ്ങൾ പൊതുമധ്യത്തിൽ വിളിച്ചുപറയുന്നതിന് മുൻപ് മുൻ അന്താരാഷ്ട്ര താരം കൂടിയായ വാമ്പെറ്റ കൂടുതൽ ഉത്തരവാദിത്തം കാണിക്കണമായിരുന്നു എന്നാണ് കായിക ലോകത്ത് നിന്നുള്ള വിമർശനം.

നിലവിൽ റഫീഞ്ഞ തന്റെ കരിയറിലെ സുപ്രധാനമായ ഘട്ടത്തിലൂടെയാണ് കടന്നുപോകുന്നത്. മുൻ ബയേൺ മ്യൂണിക് പരിശീലകൻ ഹാൻസി ഫ്‌ലിക്കിന്റെ കീഴിൽ ബാഴ്‌സലോണയിൽ മികച്ച പ്രകടനം നടത്തുന്ന താരം, ക്ലബിന്റെ പ്രധാന കളിക്കാരിൽ ഒരാളാണ്. എന്നാൽ, കഴിഞ്ഞ കുറച്ചുകാലമായി അദ്ദേഹത്തിന്റെ ഭാവിയെക്കുറിച്ച് ട്രാൻസ്ഫർ വിപണിയിൽ നിരവധി ചർച്ചകൾ നടക്കുന്നുണ്ട്. നെയ്മർ കളിക്കുന്ന സൗദി അറേബ്യൻ ക്ലബ്ബായ അൽ-ഹിലാൽ റഫീഞ്ഞയെ സ്വന്തമാക്കാൻ വലിയ താൽപര്യം കാണിക്കുന്നുണ്ട്. ലോകകപ്പിന് ശേഷം തന്റെ ക്ലബ് ഭാവിയെക്കുറിച്ച് അന്തിമ തീരുമാനമെടുക്കാൻ റഫീഞ്ഞ കാത്തിരിക്കുകയാണ്.

ഹെയ്തിക്കെതിരായ മത്സരത്തിൽ ബ്രസീൽ 3-0ന് വിജയിച്ചെങ്കിലും വലതു തുടയിലെ പേശിക്ക് പരിക്കേറ്റ റഫീഞ്ഞ നിലവിൽ തീവ്രമായ റീഹാബ് പ്രക്രിയയിലാണ്. പരിക്കിൽനിന്ന് മോചിതനായി എത്രയും വേഗം മൈതാനത്തേക്ക് തിരിച്ചെത്താനുള്ള കഠിന പരിശ്രമത്തിലാണു താരം.