‘മുജ്തബ ഖാംനഇ ജീവിച്ചിരിപ്പുണ്ട്; എല്ലാ ചർച്ചകളിലും സജീവമായി ഇടപെടുന്നു’; ഒടുവിൽ സമ്മതിച്ച് യുഎസ്
വാഷിങ്ടൺ: പശ്ചിമേഷ്യൻ സമാധാന ചർച്ചകൾ തന്ത്രപ്രധാനമായ ഘട്ടത്തിലേക്ക് നീങ്ങവെ, പുതിയ വെളിപ്പെടുത്തലുമായി യുഎസ് വിദേശകാര്യ സെക്രട്ടറി മാർക്കോ റൂബിയോ. ഇറാന്റെ പരമോന്നത നേതാവ് മുജ്തബ ഖാംനഇ പൂർണ ആരോഗ്യവാനായി ജീവിച്ചിരിപ്പുണ്ടെന്ന് അദ്ദേഹം വ്യക്തമാക്കി. നിലവിൽ അമേരിക്കയുമായി നടക്കുന്ന എല്ലാ നയതന്ത്ര ചർച്ചകളിലും അദ്ദേഹം സജീവമായി ഇടപെടുന്നുണ്ടെന്നും റൂബിയോ തുറന്നുസമ്മതിച്ചു.
പശ്ചിമേഷ്യൻ നയതന്ത്ര ചർച്ചകളെക്കുറിച്ചുള്ള അന്താരാഷ്ട്ര മാധ്യമങ്ങളുടെ റിപ്പോർട്ടുകൾക്ക് പിന്നാലെയാണ് ഇറാന്റെ അധികാര സമവാക്യങ്ങളിൽ അന്തിമവാക്കായി മുജ്തബ ഖാംനഇ മാറുന്നു എന്നതിന്റെ സൂചനകൾ അമേരിക്കൻ വിദേശകാര്യ മന്ത്രാലയം തന്നെ പുറത്തുവിടുന്നത്. കഴിഞ്ഞ കുറച്ചുകാലമായി മുജ്തബ ഖാംനഇയുടെ ആരോഗ്യനിലയെക്കുറിച്ചും അദ്ദേഹത്തിന്റെ അസാന്നിധ്യത്തെക്കുറിച്ചും നിരവധി അഭ്യൂഹങ്ങൾ പാശ്ചാത്യ രഹസ്യാന്വേഷണ ഏജൻസികളും മാധ്യമങ്ങളും വലിയ തോതിൽ പ്രചരിപ്പിച്ചിരുന്നു. എന്നാൽ, ഈ റിപ്പോർട്ടുകളെയെല്ലാം അസ്ഥാനത്താക്കിക്കൊണ്ടാണ് യുഎസ് ഭരണകൂടം തന്നെ ഇപ്പോൾ രംഗത്തെത്തിയിരിക്കുന്നത്.
അമേരിക്കൻ പ്രസിഡന്റ് ഡൊണാൾഡ് ട്രംപിന്റെ നിർദേശപ്രകാരം പശ്ചിമേഷ്യയിൽ യുദ്ധം അവസാനിപ്പിക്കാനും ഉപരോധങ്ങൾ നീക്കാനുമായി നടക്കുന്ന ചർച്ചകളിൽ ഇറാന്റെ ഭാഗത്തുനിന്നുള്ള പ്രധാന തന്ത്രങ്ങൾ മെനയുന്നത് മുജ്തബ ഖാംനഇ ആണെന്ന് യുഎസ് പ്രതിനിധികൾ വ്യക്തമാക്കുന്നു. ഇറാന്റെ ഔദ്യോഗിക ഭരണാധികാരികൾക്ക് അപ്പുറം, രാജ്യത്തെ പരമോന്നത ഇസ്ലാമിക് കൗൺസിലിലും ഇസ്ലാമിക് റെവല്യൂഷണറി ഗാർഡ് കോർപ്സിന്റെ (ഐആർജിസി) തീരുമാനങ്ങളിലും മുജ്തബയ്ക്ക് നേരിട്ടുള്ള നിയന്ത്രണമുണ്ടെന്നാണ് വിവരം.
