ഇറാൻ കപ്പലിൽ ചൈനീസ് നിർമിത രാസവസ്തുക്കൾ; ആരോപണവുമായി യുഎസ്
തെഹ്റാൻ: ഹോർമുസ് കടലിടുക്കിൽ വെച്ച് അമേരിക്കൻ സൈന്യം പിടിച്ചെടുത്ത ഇറാനിയൻ കപ്പലായ ‘തൂസ്ക’യിൽ നിന്ന് മിസൈലുകൾ നിർമ്മിക്കാൻ ഉപയോഗിക്കുന്ന രാസവസ്തുക്കൾ കണ്ടെത്തിയതായി റിപ്പോർട്ട്. മേഖലയിൽ ഇറാനും അമേരിക്കയും തമ്മിലുള്ള ബന്ധം അതീവ സങ്കീർണ്ണമായി തുടരുന്നതിനിടെ, പിടിച്ചെടുക്കപ്പെട്ട ഇറാനിയൻ കപ്പലിൽ നിന്ന് മിസൈൽ നിർമ്മാണത്തിന് ഉപയോഗിക്കുന്ന അതിമാരകമായ രാസവസ്തുക്കളാണ് കണ്ടെത്തിയതെന്ന് ഐക്യരാഷ്ട്രസഭയിലെ മുൻ അമേരിക്കൻ സ്ഥാനപതി നിക്കി ഹേലിയാണ് വെളിപ്പെടുത്തിയത്.
കപ്പലിൽ നിന്ന് കണ്ടെടുത്ത വസ്തുക്കൾ വെറും വാണിജ്യ ആവശ്യങ്ങൾക്കുള്ളതല്ലെന്നും, മറിച്ച് അത്യാധുനിക മിസൈലുകൾ നിർമ്മിക്കാനും അവയുടെ പ്രഹരശേഷി വർദ്ധിപ്പിക്കാനും ഉപയോഗിക്കുന്ന പ്രത്യേക രാസവസ്തുക്കളാണെന്നും ഹേലി തന്റെ പ്രസ്താവനയിലൂടെ വ്യക്തമാക്കി. മിസൈലുകളിൽ ഇന്ധനമായി ഉപയോഗിക്കുന്ന പ്രൊപ്പല്ലന്റ് ഉൾപ്പെടെയുള്ള അതീവ അപകടകരമായ രാസവസ്തുക്കളും കപ്പലിൽ ഉണ്ടായിരുന്നതായി നിക്കി ഹേലി ആരോപിച്ചു.
റോയിട്ടേസ് ഉൾപ്പെടെയുള്ള പ്രമുഖ വാർത്താ ഏജൻസികളുടെ റിപ്പോർട്ടുകൾ പ്രകാരം, പിടിച്ചെടുക്കപ്പെട്ട കപ്പലിൽ ‘ഇരട്ട ഉപയോഗമുള്ള’ വസ്തുക്കളാണ് ഉണ്ടായിരുന്നത്. അതായത്, സാധാരണ ആവശ്യങ്ങൾക്കും സൈനിക ആവശ്യങ്ങൾക്കും ഒരേപോലെ ഉപയോഗിക്കാൻ കഴിയുന്ന സാങ്കേതിക വിദ്യകളും രാസവസ്തുക്കളുമാണ് ഇവ. എന്നാൽ നിലവിലെ സാഹചര്യത്തിൽ ഇറാൻ ഇത് മിസൈൽ സാങ്കേതികവിദ്യ വികസിപ്പിക്കാനാണ് ഉപയോഗിക്കുന്നതെന്നാണ് അമേരിക്കൻ രഹസ്യാന്വേഷണ ഏജൻസികളുടെ നിഗമനം. ചൈനയിൽ നിന്ന് നിയമവിരുദ്ധമായി കടത്തിയ ഈ വസ്തുക്കൾ ഗൾഫ് മേഖലയിലെ സമാധാനത്തിന് വലിയ ഭീഷണിയാണെന്ന് പാശ്ചാത്യ രാജ്യങ്ങൾ ആരോപിക്കുന്നു. ഈ നീക്കം ഇറാന്റെ സൈനിക മോഹങ്ങൾ വെളിവാക്കുന്നതാണെന്നും ഹൂത്തികൾ ഉൾപ്പെടെയുള്ള സായുധ സംഘങ്ങൾക്ക് ഇറാൻ നൽകി വരുന്ന പിന്തുണയുടെ തെളിവുകൂടിയാണിതെന്നും നിക്കി ഹേലി പറഞ്ഞു.
അതേസമയം, കപ്പൽ പിടിച്ചെടുത്ത നടപടിയെ ഇറാൻ ശക്തമായി അപലപിച്ചു. തങ്ങളുടെ കപ്പൽ നിയമവിരുദ്ധമായാണ് അമേരിക്ക തടഞ്ഞുവെച്ചിരിക്കുന്നതെന്നും കപ്പലിൽ ഉണ്ടായിരുന്നത് സാധാരണ വാണിജ്യ സാമഗ്രികളാണെന്നും ഇറാൻ അവകാശപ്പെടുന്നു. എന്നാൽ ചൈനയുടെ സഹായത്തോടെ ഇറാൻ അന്താരാഷ്ട്ര ഉപരോധങ്ങൾ മറികടക്കാൻ ശ്രമിക്കുകയാണെന്ന ആരോപണം അമേരിക്ക ശക്തമായി ഉയർത്തുന്നുണ്ട്. ഹോർമുസ് കടലിടുക്ക് പോലെയുള്ള തന്ത്രപ്രധാനമായ ജലപാതകളിലൂടെയുള്ള ഇത്തരം ആയുധക്കടത്ത് ആഗോള എണ്ണ വിപണിയെയും ലോക സുരക്ഷയെയും ബാധിക്കുമെന്ന ആശങ്കയിലാണ് ലോകരാജ്യങ്ങൾ.
ചൈനയും ഇറാനും തമ്മിലുള്ള വർദ്ധിച്ചു വരുന്ന സൈനിക-സാമ്പത്തിക സഹകരണം വരും ദിവസങ്ങളിൽ വലിയ രീതിയിലുള്ള നയതന്ത്ര പോരാട്ടങ്ങൾക്ക് വഴിയൊരുക്കുമെന്നാണ് ഈ പുതിയ വെളിപ്പെടുത്തലുകൾ സൂചിപ്പിക്കുന്നത്. മേഖലയിലെ സൈനിക സാന്നിധ്യം വർദ്ധിപ്പിക്കാൻ അമേരിക്ക ആലോചിക്കുന്നതോടെ ഇറാനും അമേരിക്കയും തമ്മിൽ ഒരു നേരിട്ടുള്ള ഏറ്റുമുട്ടലിലേക്ക് കാര്യങ്ങൾ നീങ്ങുമോ എന്ന ഭീതിയിലാണ് പശ്ചിമേഷ്യ.
