മുസ്ലിമിന്റെ ഭക്ഷണം എല്ലാവർക്കും നൽകും, ഭഗവാൻ എന്നല്ലേ പേര്, കഴിക്കൂ; ഗാസിയാബാദിലെ വിദ്വേഷത്തിന് മുംബൈയിൽ മറുപടി
മുംബൈ: ‘എല്ലാവരും മനുഷ്യരാണ്, വരൂ കഴിക്കൂ’, മുംബൈ തെരുവോരത്ത് ഭക്ഷണം വിതരണം ചെയ്യവെ യുവാക്കൾ പറഞ്ഞുകൊണ്ടിരുന്നു. കഴിഞ്ഞ ദിവസം ഉത്തർപ്രദേശിലെ ഗാസിയാബാദിൽ ഭക്ഷണവിതരണത്തിനിടെ ബിജെപി നേതാവ് മുസ് ലിംകളെ മാറ്റിനിർത്തിയ സംഭവം വിവാദങ്ങൾക്ക് വഴിവെച്ചിരുന്നു. ഇതിന് പിന്നാലെയാണ് ഒരു കൂട്ടം യുവാക്കളുടെ നേതൃത്വത്തിൽ ജാതി,മത ഭേദമന്യേ എല്ലാവർക്കും ഭക്ഷണം വെള്ളവും വിതരണം ചെയ്തത്.
‘മുസ്ലിം നൽകുന്ന ഭക്ഷണം എല്ലാവർക്കുമുള്ളതാണ്’ എന്ന് പ്രഖ്യാപിച്ചുകൊണ്ട് അവിടെ എത്തിയ ഭഗവാൻ എന്ന വ്യക്തിയെ സ്നേഹപൂർവ്വം അദ്ദേഹം ഭക്ഷണം കഴിക്കാൻ ക്ഷണിക്കുന്നത് ദൃശ്യങ്ങളിൽ കാണാം. മനുഷ്യത്വത്തിന് മുകളിൽ മറ്റൊരു വേർതിരിവുമില്ലെന്ന സന്ദേശമാണ് ഈ കൂട്ടായ്മ ഇതിലൂടെ നൽകിയത്.
കുറച്ചു ദിവസങ്ങൾക്ക് മുൻപ് ഗാസിയാബാദിൽ ഹിന്ദു രക്ഷാദൾ നേതാവ് പിങ്കി ചൗധരി നടത്തിയ വിവാദപരമായ പ്രവർത്തിക്കെതിരെയുള്ള സ്നേഹമറുപടി കൂടിയായിരുന്നു ഇത്. ഗാസിയാബാദിലെ ഒരു ചടങ്ങിൽ നിന്ന് ഭക്ഷണം കഴിക്കാനെത്തിയ ദരിദ്രനായ ഒരാളുടെ കയ്യിൽ നിന്ന് മുസ്ലിം ആണെന്ന് പറഞ്ഞ് പാത്രം പിടിച്ചുവാങ്ങുകയും വിവേചനപരമായ പരാമർശങ്ങൾ നടത്തുകയും ചെയ്തത് വലിയ പ്രതിഷേധത്തിന് ഇടയാക്കിയിരുന്നു. ഇതിന് ബദലായി മുംബൈയിലെ തിരക്കേറിയ തെരുവിൽ നടന്ന ഈ വിതരണത്തിൽ എല്ലാ വിഭാഗം ജനങ്ങളും പങ്കാളികളായി. വർഗീയമായ ചേരിതിരിവ് ഉണ്ടാക്കാൻ ശ്രമിക്കുന്നവർക്കുള്ള മറുപടിയായാണ് ഈ പ്രവൃത്തിയെ പൊതുസമൂഹം വിലയിരുത്തുന്നത്.
സമൂഹമാധ്യമങ്ങളിൽ നിരവധി പേർ പങ്കുവെച്ച ഈ വീഡിയോ ഇതിനോടകം വൈറലായിക്കഴിഞ്ഞു. ഭിന്നതകൾക്കും വിദ്വേഷ പ്രസംഗങ്ങൾക്കും ഇടയിൽ ഇത്തരം സ്നേഹപ്രകടനങ്ങൾ പ്രതീക്ഷ നൽകുന്നുവെന്ന് ആളുകൾ പ്രതികരിച്ചു. പാവപ്പെട്ടവനെ ഊട്ടുക എന്ന ഭാരതീയ പാരമ്പര്യം ഉയർത്തിപ്പിടിക്കാനാണ് ഈ യുവാക്കൾ ശ്രമിച്ചത്. വിവേചനരഹിതമായ ഇത്തരം പ്രവർത്തനങ്ങൾ സമൂഹത്തിലെ ഐക്യം വർധിപ്പിക്കുമെന്നും പൊതുവിടങ്ങളിൽ സ്നേഹത്തിന്റെ സന്ദേശം പടർത്താൻ ഇത്തരം കൂട്ടായ്മകൾ അത്യന്താപേക്ഷിതമാണെന്നും ഈ സംഭവം ചൂണ്ടിക്കാട്ടി. പേരിനും പ്രശസ്തിക്കും വേണ്ടി നിൽക്കാതെ മനുഷ്യത്വം ഉയർത്തിപ്പിടിച്ച ഈ യുവാക്കളുടെ നടപടിക്ക് വലിയ പിന്തുണയാണ് ലഭിച്ചുകൊണ്ടിരിക്കുന്നത്.
