‘സര്ക്കാര് ഓഫീസുകള് കത്തിച്ചുകളയണം, തീവ്രവാദ ആക്രമണം വേണം’; തെലങ്കാനയില് കര്ഷക സമരത്തിനിടെ വിവാദ പരാമര്ശവുമായി ബിആര്എസ് നേതാവ്
ഹൈദരാബാദ്: തെലങ്കാനയിൽ കർഷക പ്രതിഷേധങ്ങൾ ശക്തമാകുന്നതിനിടെ ഭാരത് രാഷ്ട്ര സമിതി (ബിആർഎസ്) നേതാവിന്റെ തീവ്രവാദ സ്വഭാവമുള്ള വിവാദ പരാമർശം പുറത്ത്. സർക്കാർ ഓഫീസുകൾ തീയിട്ട് നശിപ്പിക്കണമെന്നും തീവ്രവാദ രീതിയിലുള്ള ആക്രമണങ്ങളാണ് ആവശ്യമെന്നും പാർട്ടി പ്രവർത്തകരോട് ആഹ്വാനം ചെയ്യുന്ന വീഡിയോയാണ് ഇപ്പോൾ വലിയ ചർച്ചയായിരിക്കുന്നത്.
കർഷകരുടെ വിവിധ ആവശ്യങ്ങൾ ഉന്നയിച്ച് സംഘടിപ്പിച്ച പ്രതിഷേധ പരിപാടിക്കിടെയാണ് ബിആർഎസ് നേതാവ് ബാൽക്ക സുമൻ അടക്കമുള്ളവർ പങ്കെടുത്ത വേദിയിൽ നിന്ന് ഈ വിവാദ പ്രസ്താവനകൾ ഉണ്ടായത്. സംഭവത്തിന്റെ ദൃശ്യങ്ങൾ സമൂഹമാധ്യമങ്ങളിൽ വ്യാപകമായി പ്രചരിച്ചതോടെ ഭരണകക്ഷിയായ കോൺഗ്രസ് ബിആർഎസിനെതിരെ ശക്തമായ വിമർശനവുമായി രംഗത്തെത്തി.
“നമ്മൾ ഇനി തീവ്രവാദ പ്രവർത്തനങ്ങൾ നടത്തണം. വെറുതെ സംസാരിക്കുകയോ യോഗങ്ങളും പത്രസമ്മേളനങ്ങളും നടത്തുകയോ ചെയ്യുകയല്ല വേണ്ടത്. മന്ദമാരി ഡിവിഷനിൽ ഒരു വലിയ പരിപാടി സംഘടിപ്പിക്കുക. നമുക്ക് ജിഎമ്മിന്റെ (ജനറൽ മാനേജർ) ഓഫീസ് പൂർണ്ണമായും കത്തിച്ചുകളയാം. പരമാവധി പോയാൽ നമുക്ക് ഒരു മാസത്തേക്ക് ജയിലിൽ കിടക്കേണ്ടി വരും. അതുകൊണ്ട് നിങ്ങൾ തീവ്രവാദ പ്രവർത്തനങ്ങൾ ഗൗരവമായിത്തന്നെ ആസൂത്രണം ചെയ്യണം. ആവശ്യമെങ്കിൽ സിംഗരേണി ഭവനിൽ പോയി അത് പൂർണ്ണമായും കത്തിച്ച് ചാമ്പലാക്കണം. നമ്മുടെ പ്രദേശത്ത് നിരവധി റെയിൽവേ ലൈനുകൾ ഉണ്ട്, ഒരു ദിവസം അവ മുറിച്ചുമാറ്റി ഒരു സമരം സംഘടിപ്പിക്കുക, അതിനെ നമുക്ക് ‘റെയിൽ റോക്കോ’ എന്ന് വിളിക്കാം,” ബിആർഎസ് നേതാവ് സുമൻ പ്രവർത്തകരോട് പറഞ്ഞു.
ഭാരത് രാഷ്ട്ര സമിതി ജനാധിപത്യ മൂല്യങ്ങളെ കാറ്റിൽപ്പറത്തുകയാണെന്നും അക്രമം അഴിച്ചുവിടാൻ പരസ്യമായി പ്രേരിപ്പിക്കുകയാണെന്നും കോൺഗ്രസ് കുറ്റപ്പെടുത്തി. പൊതുമുതൽ നശിപ്പിക്കാൻ ആഹ്വാനം ചെയ്യുന്നത് അതീവ ഗുരുതരമായ വിഷയമാണെന്നും കുറ്റക്കാർക്കെതിരെ ശക്തമായ നിയമനടപടികൾ സ്വീകരിക്കണമെന്നും കോൺഗ്രസ് നേതാക്കൾ ആവശ്യപ്പെട്ടു.
എന്നാൽ കർഷകർ അനുഭവിക്കുന്ന കടുത്ത ദുരിതം ചൂണ്ടിക്കാണിക്കാൻ നടത്തിയ വൈകാരികമായ ഒരു പ്രസംഗത്തെ സർക്കാർ രാഷ്ട്രീയ ലാഭത്തിനായി ദുരുപയോഗം ചെയ്യുകയാണെന്നാണ് ബിആർഎസ് ഇതിനോട് പ്രതികരിച്ചത്. കർഷകരുടെ ജനകീയ സമരങ്ങളെ അടിച്ചമർത്താനാണ് കോൺഗ്രസ് ശ്രമിക്കുന്നതെന്നും അവർ ആരോപിച്ചു.
