‘ഗസ്സ ഉത്തര കൊറിയ പോലെ, ഫലസ്തീനികളെ പുറത്തുപോകാൻ ആരും അനുവദിക്കുന്നില്ല’; ബെഞ്ചമിൻ നെതന്യാഹു
ജറുസലെം: ഗസ്സയെ ഉത്തര കൊറിയയോട് ഉപമിച്ച് ഇസ്രയേൽ പ്രധാനമന്ത്രി ബെഞ്ചമിൻ നെതന്യാഹു. ലോകത്ത് ജനങ്ങൾക്ക് സ്വതന്ത്രമായി പുറത്തുപോകാൻ സാധിക്കാത്ത ചുരുക്കം ചില സ്ഥലങ്ങളിൽ ഒന്നാണ് ഗസ്സയെന്നും അവിടുത്തെ ജനങ്ങളെ അതിന് ആരും അനുവദിക്കുന്നില്ലെന്നും അദ്ദേഹം പറഞ്ഞു. ഒരു ഹീബ്രു പോഡ്കാസ്റ്റിൽ സംസാരിക്കവെയാണ് നെതന്യാഹുവിന്റെ ഈ പരാമർശം.
2023 ഒക്ടോബറിൽ ഗസ്സയ്ക്ക് നേരെ യുദ്ധം ആരംഭിക്കുന്നതിന് മുൻപ് തന്നെ, ഏകദേശം 15 വർഷത്തോളമായി കരയിലൂടെയും കടലിലൂടെയും ഇസ്രയേൽ ഗസ്സയെ ഉപരോധിച്ചിരിക്കുകയായിരുന്നു. അക്കാലയളവിൽ വളരെ ചുരുക്കം ഫലസ്തീനികൾക്ക് മാത്രമായിരുന്നു ഇസ്രയേൽ സേന യാത്രാനുമതി നൽകിയിരുന്നത്.
എന്നാൽ ഗസ്സക്കാർക്ക് പുറത്തുപോകാൻ കഴിയാത്തതിന് കാരണം ഇസ്രയേൽ അല്ലെന്നും, മറ്റ് രാജ്യങ്ങൾ ഗസ്സയിൽ നിന്നുള്ള അഭയാർഥികളെ സ്വീകരിക്കാൻ തയ്യാറാകാത്തതാണെന്നുമാണ് നെതന്യാഹു ഇപ്പോൾ ആരോപിക്കുന്നത്. അഭയാർഥികളെ സ്വീകരിക്കുന്നത് ഇസ്രയേലിന്റെ ലക്ഷ്യങ്ങൾക്ക് ഗുണം ചെയ്യുമെന്നതിനാലാണ് മറ്റു രാജ്യങ്ങൾ അതിന് തയ്യാറാകാത്തതെന്ന് അദ്ദേഹം പറഞ്ഞു.
ഗസ്സക്കാരെ സഹായിക്കുന്നതിനെക്കുറിച്ചും ലോകത്തെ ശതകോടിക്കണക്കിന് ആളുകൾക്ക് ലഭിക്കുന്ന അടിസ്ഥാന അവകാശമായ സഞ്ചാര സ്വാതന്ത്ര്യം അവർക്ക് നിഷേധിക്കപ്പെടുന്നതിനെക്കുറിച്ചും മറ്റു രാജ്യങ്ങൾ എന്തുകൊണ്ട് ചിന്തിക്കുന്നില്ലെന്നും അദ്ദേഹം ചോദിച്ചു. ഗസ്സക്കാർ പുറത്തുപോകുന്നതിന് തടസ്സം നിൽക്കുന്നത് ഇസ്രയേൽ മാത്രമല്ലെന്ന് സമർഥിക്കാൻ, ഇസ്രയേലിന്റെ നിയന്ത്രണത്തിലുള്ള അതിർത്തികൾക്ക് പുറമെ ഈജിപ്ത് അതിർത്തിയിലെ ദീർഘകാലമായുള്ള കർശന നിയന്ത്രണങ്ങളും അദ്ദേഹം ചൂണ്ടിക്കാട്ടി.
അതേസമയം, ഇസ്രയേൽ പ്രധാനമന്ത്രിയുടെ ഈ പരാമർശം സമൂഹമാധ്യമങ്ങളിൽ വലിയ ചർച്ചകൾക്കാണ് വഴിവെച്ചിരിക്കുന്നത്. വർഷങ്ങളായി ഗസ്സയെ പൂർണ്ണമായി ഉപരോധിക്കുകയും യാത്രാ മാർഗങ്ങൾ നിയന്ത്രിക്കുകയും ചെയ്യുന്ന ഇസ്രയേൽ പ്രതിരോധ സേനയുടെ പങ്ക് നിലനിൽക്കെത്തന്നെ നെതന്യാഹു ഇത്തരമൊരു താരതമ്യം നടത്തുന്നത് കടുത്ത വഞ്ചനയാണെന്ന് വിമർശകർ ചൂണ്ടിക്കാട്ടുന്നു. എന്നാൽ വലിയ തോതിലുള്ള അഭയാർഥി പ്രവാഹത്തെ തടയാൻ അയൽരാജ്യങ്ങൾ പറയുന്ന സുരക്ഷാ കാരണങ്ങൾ ചൂണ്ടിക്കാട്ടി ഈ വിമർശനങ്ങളെ അനുകൂലിച്ചുകൊണ്ട് രംഗത്തെത്തുന്നവരും നിരവധിയാണ്.
