ലോകകപ്പ് സെമിയിൽ ഇംഗ്ലണ്ടിനെ തോൽപ്പിച്ചത് ചരിത്ര ആഘോഷമാക്കാൻ അർജന്റീന; ജൂലൈ 15 ഇനി ദേശീയ ഫുട്ബോൾ ദിനം | Argentina Football Day Victory Over England
ബ്യൂണസ് ഐറിസ്: 2026 ലോകകപ്പ് ഫുട്ബോൾ സെമിഫൈനലിൽ ഇംഗ്ലണ്ടിനെതിരെ നേടിയ തകർപ്പൻ വിജയം എക്കാലവും ഓർമിക്കപ്പെടുന്ന ആഘോഷമാക്കാൻ അർജന്റീന(Argentina Football Day Victory Over England). സെമി വിജയത്തിന്റെ ഓർമയ്ക്കായി ജൂലൈ 15 ഇനി മുതൽ രാജ്യത്ത് ‘ദേശീയ ഫുട്ബോൾ ടീം ദിനം’ ആയി ആചരിക്കാൻ അർജന്റീന ഫുട്ബോൾ അസോസിയേഷൻ(എഎഫ്എ) തീരുമാനിച്ചു. ബുധനാഴ്ച ചേർന്ന എഎഫ്എ എക്സിക്യൂട്ടീവ് ബോർഡ് യോഗത്തിലാണു തീരുമാനം കൈക്കൊണ്ടത്. അതേസമയം, മത്സരത്തിന് പിന്നാലെ ഉണ്ടായ രാഷ്ട്രീയ തർക്കങ്ങളുടെയും ഫിഫ അന്വേഷണങ്ങളുടെയും പശ്ചാത്തലത്തിൽ പ്രഖ്യാപനം പുതിയ വിവാദങ്ങൾക്ക് തിരികൊളുത്തിയിട്ടുണ്ട്.
അറ്റ്ലാന്റയിലെ ആവേശപ്പോര് | Argentina Football Day Victory Over England
അറ്റ്ലാന്റയിൽ നടന്ന ആവേശകരമായ സെമിഫൈനൽ പോരാട്ടത്തിൽ ഒരു ഗോളിന് പിന്നിൽ നിന്ന ശേഷമാണ് ലയണൽ സ്കലോണിയുടെ സംഘം മത്സരം തിരിച്ചുപിടിച്ചത്. എൻസോ ഫെർണാണ്ടസ്, ലൗത്താരോ മാർട്ടിനസ് എന്നിവർ നേടിയ ഗോളുകളുടെ കരുത്തിൽ 2-1 എന്ന സ്കോറിനായിരുന്നു അർജന്റീനയുടെ ജയം. രാജ്യത്തെ മുതിർന്ന പുരുഷ ടീമിന്റെ ഈ ചരിത്രവിജയത്തോടൊപ്പം ജൂനിയർ, വനിതാ, ഫുട്സാൽ, ബീച്ച് ഫുട്ബോൾ ടീമുകൾ ഉൾപ്പെടെ അർജന്റീനയെ പ്രതിനിധീകരിക്കുന്ന എല്ലാ കായികതാരങ്ങൾക്കുമുള്ള ആദരവായാണ് ഈ ദിനാചരണമെന്ന് എഎഫ്എ ഔദ്യോഗിക പത്രക്കുറിപ്പിൽ അറിയിച്ചു.
അതേസമയം, വിജയത്തിന് പിന്നാലെ ബ്രിട്ടനുമായി തർക്കം നിലനിൽക്കുന്ന ഫാൽക്ക്ലാന്റ്സ് (മാൽവിനാസ്) ദ്വീപുകൾ അർജന്റീനയുടേതാണെന്ന് പ്രഖ്യാപിക്കുന്ന കൂറ്റൻ ബാനർ മൈതാനത്ത് പ്രദർശിപ്പിച്ചിരുന്നു. ഇതിന്റെ പ്ലക്കാർഡുകളുമായി താരങ്ങൾ ആഘോഷിച്ചതും വലിയ വിവാദമായിരുന്നു. സംഭവത്തിൽ അർജന്റീന ഫുട്ബോൾ അസോസിയേഷനെതിരെ അന്താരാഷ്ട്ര ഫുട്ബോൾ ഭരണസമിതിയായ ‘ഫിഫ’ അച്ചടക്ക അന്വേഷണം ആരംഭിച്ചിട്ടുണ്ട്. 1982-ലെ ഫാൽക്ക്ലാന്റ്സ് യുദ്ധത്തിന്റെ ചരിത്രപരമായ പശ്ചാത്തലം നിലനിൽക്കെ, കായികവേദിയിൽ ഇത്തരം രാഷ്ട്രീയ പ്രചാരണം നടത്തിയത് ഗുരുതരമായ ചട്ടലംഘനമായാണ് വിലയിരുത്തപ്പെടുന്നത്.
ഫിഫ നടപടി വരുമോ? | Argentina Football Day Victory Over England
സ്പെയിനെതിരായ ഫൈനൽ മത്സരത്തിലെ പരാജയത്തിന് ശേഷം ഗ്രൗണ്ടിൽ നടന്ന കൈയാങ്കളിയിൽ അർജന്റീന താരങ്ങളായ ലിയാൻഡ്രോ പെരെദെസ്, നഹുവൽ മോളിന, അസിസ്റ്റന്റ് കോച്ച് റോബർട്ടോ അയാള എന്നിവർക്കെതിരെയും ഫിഫയുടെ അച്ചടക്ക നടപടിയുമായി ബന്ധപ്പെട്ട അന്വേഷണം പുരോഗമിക്കുകയാണ്. അതേസമയം, ഇംഗ്ലണ്ടിനെതിരായ ജയം ആഘോഷിക്കാൻ ദേശീയദിനം പ്രഖ്യാപിച്ച അർജന്റീനയുടെ നടപടിക്കെതിരെ ബ്രിട്ടീഷ് മാധ്യമങ്ങളും കായിക നിരീക്ഷകരും രംഗത്തെത്തിയിട്ടുണ്ട്.
