‘നസീറുദ്ദീൻ ഷാ അപകടകാരിയായ അർബൻ ദിമാഗി നക്സൽ’; നടനെതിരെ വിമർശനവുമായി കേന്ദ്രമന്ത്രി കിരൺ റിജിജു
ന്യൂഡൽഹി: ജാമിയ മില്ലിയ ഇസ്ലാമിയ സർവകലാശാലയിൽ വിദ്യാർത്ഥി യൂണിയൻ തെരഞ്ഞെടുപ്പ് പുനഃസ്ഥാപിക്കണമെന്ന് ആവശ്യപ്പെട്ട് സമരം ചെയ്യുന്ന വിദ്യാർത്ഥികൾക്ക് പിന്തുണ പ്രഖ്യാപിച്ച പ്രമുഖ നടൻ നസീറുദ്ദീൻ ഷായ്ക്കെതിരെ ആഞ്ഞടിച്ച് കേന്ദ്ര പാർലമെൻ്ററി കാര്യ മന്ത്രി കിരൺ റിജിജു. നസറുദ്ദീൻ ഷാ ഒരു സാധാരണ നടനാണെന്നാണ് താൻ ഇതുവരെ കരുതിയതെന്നും, എന്നാൽ അദ്ദേഹം അപകടകാരിയായ ഒരു അർബൻ ‘ദിമാഗി നക്സൽ’ ആണെന്ന് ഇപ്പോൾ തെളിഞ്ഞിരിക്കുകയാണെന്നും മന്ത്രി ആരോപിച്ചു. ഇന്ത്യൻ ജനാധിപത്യത്തിന് അതീവ ദോഷകരമായ വ്യക്തിയാണ് ഷാ എന്നും അദ്ദേഹം എക്‌സിലൂടെ കുറിച്ചു.
രാജ്യത്തെ വിദ്യാഭ്യാസ സമ്പ്രദായം തകർക്കാനും വിദ്യാർത്ഥികളുടെയും യുവാക്കളുടെയും വീര്യം കെടുത്താനുമാണ് ബിജെപി നേതൃത്വത്തിലുള്ള കേന്ദ്ര സർക്കാർ ശ്രമിക്കുന്നതെന്ന് നസീറുദ്ദീൻ ഷാ ആരോപിച്ചിരുന്നു. ഇതിന് മറുപടിയായാണ് കിരൺ റിജിജുവിന്റെ പ്രതികരണം. ഫെയ്‌സ്ബുക്കിൽ പങ്കുവെച്ച വീഡിയോയിൽ നെഞ്ചിൽ ‘ദിമാഗി നക്സൽ’ എന്നെഴുതിയ പിൻ ധരിച്ചുകൊണ്ടാണ് ഷാ സർക്കാരിനെതിരെ സംസാരിച്ചത്.
ഈ വർഷത്തെ സ്വാതന്ത്ര്യദിന പ്രസംഗത്തിൽ പ്രധാനമന്ത്രി നരേന്ദ്ര മോദിയാണ് ‘ദിമാഗി നക്സൽ’ എന്ന പദം ആദ്യമായി ഉപയോഗിച്ചത്. തോക്കേന്തി സമരം ചെയ്യുന്ന നക്‌സലൈറ്റുകൾക്ക് പകരം, ആശയങ്ങളിലൂടെയും പ്രഭാഷണങ്ങളിലൂടെയും എഴുത്തുകളിലൂടെയും നക്സലൈറ്റ് ചിന്താഗതികൾ പ്രചരിപ്പിക്കുന്നു എന്ന് ഭരണകൂടം ആരോപിക്കുന്ന ബുദ്ധിജീവികളെയും വിമർശകരെയും ലക്ഷ്യംവെക്കുന്ന ഒരു രാഷ്ട്രീയ പ്രയോഗമാണിത്.
ജാമിയ മില്ലിയക്ക് പുറമെ, കൊൽക്കത്തയിലെ സത്യജിത് റേ ഫിലിം ആൻഡ് ടെലിവിഷൻ ഇൻസ്റ്റിറ്റ്യൂട്ടിൽ സമരം ചെയ്യുന്ന വിദ്യാർത്ഥികൾക്കും കഴിഞ്ഞ ആഴ്ച നസീറുദ്ദീൻ ഷാ പിന്തുണ പ്രഖ്യാപിച്ചിരുന്നു. ബംഗാൾ തെരഞ്ഞെടുപ്പിലെ തങ്ങളുടെ വിജയത്തിന് ശേഷം, സ്വന്തം ആശയങ്ങളോട് യോജിക്കാത്തവരോട് ബിജെപി സർക്കാർ പ്രതികാരം വീട്ടുകയാണെന്നായിരുന്നു അദ്ദേഹത്തിന്റെ ആരോപണം. കൂടാതെ, കഴിഞ്ഞ ജൂലൈയിൽ നീറ്റ് പരീക്ഷാ ക്രമക്കേടുകളുമായി ബന്ധപ്പെട്ട് നടന്ന വിദ്യാർത്ഥി പ്രതിഷേധങ്ങളിലും കേന്ദ്ര സർക്കാരിനെതിരെ നസീറുദ്ദീൻ ഷാ ശക്തമായ വിമർശനം ഉന്നയിച്ചിരുന്നു.
