‘ശത്രുക്കള്‍ ഭയക്കണം’; യുദ്ധകാലാടിസ്ഥാനത്തില്‍ ആയുധപ്പുര നിറയ്ക്കാന്‍ ഉത്തരവിട്ട് കിം ജോങ് ഉന്‍

പ്യോങ്യാങ്: കൊറിയന്‍ ഉപദ്വീപില്‍ യുദ്ധഭീതിയും സംഘര്‍ഷാന്തരീക്ഷവും നിലനില്‍ക്കെ, രാജ്യത്തെ മിസൈല്‍ നിര്‍മാണം വന്‍തോതില്‍ വര്‍ധിപ്പിക്കാന്‍ ഉത്തരവിട്ട് ഉത്തര കൊറിയന്‍ ഭരണാധികാരി കിം ജോങ് ഉന്‍. രാജ്യത്തെ തന്ത്രപ്രധാനമായ ആയുധ നിര്‍മാണശാലകളും മൊബൈല്‍ മിസൈല്‍ ലോഞ്ചറുകള്‍(TEL) നിര്‍മിക്കുന്ന ഫാക്ടറികളും സന്ദര്‍ശിച്ച ശേഷമാണ് കിം നിര്‍ണായക ഉത്തരവിറക്കിയത്. ശത്രുരാജ്യങ്ങളുടെ പ്രകോപനങ്ങളെ നേരിടാന്‍ ‘അഭേദ്യമായ സൈനിക കരുത്ത്’ അനിവാര്യമാണെന്ന് അദ്ദേഹം വ്യക്തമാക്കി.

ലക്ഷ്യം ‘യുദ്ധം തടയല്‍’

ആയുധങ്ങള്‍ നിര്‍മിക്കുന്നത് യുദ്ധം ചെയ്യാനല്ല, മറിച്ച് യുദ്ധം ഉണ്ടാകാതിരിക്കാനാണെന്നാണ് കിമ്മിന്റെ വാദം. ”സമാധാനം ആരും ദാനമായി നല്‍കുന്നതല്ല, അത് കരുത്തുകൊണ്ട് സംരക്ഷിക്കപ്പെടേണ്ടതാണ്. ശത്രുക്കള്‍ നമ്മളെ ആക്രമിക്കാന്‍ ഭയപ്പെടുന്ന തരത്തിലുള്ള ഒരു ‘യുദ്ധ പ്രതിരോധം’ നാം വളര്‍ത്തിയെടുക്കണം,” ഫാക്ടറി ജീവനക്കാരെ അഭിസംബോധന ചെയ്തുകൊണ്ട് കിം പറഞ്ഞു. ശത്രുവിന്റെ ഏത് നീക്കത്തെയും നിമിഷനേരം കൊണ്ട് തകര്‍ക്കാന്‍ കഴിയുന്ന ആണവായുധ ശേഷി കൈവരിക്കുകയാണ് ലക്ഷ്യം.

ഖര ഇന്ധന മിസൈലുകള്‍ക്ക് മുന്‍ഗണന

ദ്രാവക ഇന്ധന മിസൈലുകളെ അപേക്ഷിച്ച് പെട്ടെന്ന് വിക്ഷേപിക്കാന്‍ കഴിയുന്ന സോളിഡ്-ഫ്യുവല്‍(Solid-fuel) ഇന്റര്‍കോണ്ടിനെന്റല്‍ ബാലിസ്റ്റിക് മിസൈലുകളുടെ(ICBM) നിര്‍മാണത്തിനാണ് കിം മുന്‍ഗണന നല്‍കുന്നത്. അമേരിക്കന്‍ വന്‍കരയില്‍ വരെ എത്തിച്ചേരാന്‍ ശേഷിയുള്ള ഹ്വാസോങ്-18 (Hwasong-18) പോലുള്ള മിസൈലുകളുടെ എണ്ണം വര്‍ധിപ്പിക്കാന്‍ അദ്ദേഹം നിര്‍ദേശം നല്‍കി. 2026-ലെ സൈനിക നവീകരണ പദ്ധതിയുടെ ഭാഗമായാണ് ഈ നീക്കം.

അമേരിക്കയും ദക്ഷിണ കൊറിയയും ജപ്പാനും ചേര്‍ന്ന് മേഖലയില്‍ നടത്തുന്ന സംയുക്ത സൈനികാഭ്യാസങ്ങളാണ് ഉത്തരകൊറിയയെ പ്രകോപിപ്പിക്കുന്നത്. ഇതിനെ ‘ആണവ യുദ്ധത്തിനുള്ള റിഹേഴ്‌സല്‍’ എന്നാണ് പ്യോങ്യാങ് വിശേഷിപ്പിക്കുന്നത്. അടുത്തിടെ അമേരിക്കയുടെ ആണവ അന്തര്‍വാഹിനികള്‍ ദക്ഷിണ കൊറിയയില്‍ എത്തിയതും കിമ്മിനെ ചൊടിപ്പിച്ചിരുന്നു.

സംരക്ഷിക്കാന്‍ ആണവായുധം ഉപയോഗിക്കാന്‍ മടിക്കില്ലെന്ന് ഉത്തരകൊറിയ നേരത്തെ തന്നെ വ്യക്തമാക്കിയിരുന്നു. പുതിയ ഉത്തരവോടെ വരും ദിവസങ്ങളില്‍ കൊറിയന്‍ ഉപദ്വീപില്‍ കൂടുതല്‍ മിസൈല്‍ പരീക്ഷണങ്ങള്‍ക്കും സൈനിക നീക്കങ്ങള്‍ക്കും സാധ്യതയുണ്ടെന്ന് അന്താരാഷ്ട്ര നിരീക്ഷകര്‍ വിലയിരുത്തുന്നു. ലോകരാജ്യങ്ങളുടെ ഉപരോധങ്ങളെ വെല്ലുവിളിച്ചുകൊണ്ടാണ് ഉത്തരകൊറിയയുടെ ഈ ആയുധ നിര്‍മാണ കുതിപ്പ്.