‘വെള്ളാപ്പള്ളിയല്ല എൽഡിഎഫ്’: മുഖ്യമന്ത്രിയുടെ കാറിൽ കയറ്റിയതിനെയും വിമർശിച്ച് സിപിഐ; മുന്നണിയിൽ പോര് മുറുകുന്നു

തിരുവനന്തപുരം: തദ്ദേശ തെരഞ്ഞെടുപ്പിലെ തിരിച്ചടിയിൽ ഇടത് മുന്നണിക്കുള്ളിൽ കലഹം രൂക്ഷമാകുന്നു. പരാജയത്തിന് കാരണം മുഖ്യമന്ത്രിയുടെ ശൈലിയും വെള്ളാപ്പള്ളി നടേശനുമായുള്ള വഴിവിട്ട അടുപ്പവുമാണെന്ന സിപിഐ വിമർശനം മുന്നണിയെ പ്രതിരോധത്തിലാക്കിയിരിക്കുകയാണ്. എസ്എൻഡിപി യോഗം ജനറൽ സെക്രട്ടറി വെള്ളാപ്പള്ളി നടേശനും സിപിഐ സംസ്ഥാന സെക്രട്ടറി ബിനോയ് വിശ്വവും തമ്മിലുള്ള വാക്‌പോര് ഇപ്പോൾ പരസ്യമായ രാഷ്ട്രീയ പോരാട്ടമായി മാറിയിരിക്കുകയാണ്.

‘വെള്ളാപ്പള്ളിയല്ല എൽഡിഎഫ്’
സിപിഐയെ ‘ചതിയൻ ചന്തു’ എന്ന് വിളിച്ച വെള്ളാപ്പള്ളിക്ക് അതിരൂക്ഷമായ മറുപടിയാണ് ബിനോയ് വിശ്വം നൽകിയത്. ചതിയൻ ചന്തുവിന്റെ തൊപ്പി ഏറ്റവും കൂടുതൽ ചേരുന്നത് വെള്ളാപ്പള്ളിക്കാണെന്ന് അദ്ദേഹം പരിഹസിച്ചു. ‘വെള്ളാപ്പള്ളിയെ കണ്ടാൽ ചിരിക്കും, കൈകൊടുക്കും; പക്ഷേ ഒരിക്കലും എന്റെ കാറിൽ കയറ്റില്ല’ എന്ന ബിനോയിയുടെ പരാമർശം മുഖ്യമന്ത്രി പിണറായി വിജയനെതിരെയുള്ള പരോക്ഷ വിമർശനമായാണ് വിലയിരുത്തപ്പെടുന്നത്. പമ്പയിൽ നടന്ന ആഗോള അയ്യപ്പ സംഗമത്തിന് മുഖ്യമന്ത്രി വെള്ളാപ്പള്ളിയെ ഔദ്യോഗിക കാറിൽ ഒപ്പം കൂട്ടിയത് സിപിഐയെ ചൊടിപ്പിച്ചിരുന്നു.

സിപിഐയുടെ കണ്ടെത്തലുകൾ തള്ളി സിപിഎം
തെരഞ്ഞെടുപ്പ് തോൽവിക്ക് കാരണമായി സിപിഐ മുന്നോട്ടുവെക്കുന്ന പല കാര്യങ്ങളും സിപിഎം അംഗീകരിക്കുന്നില്ല. ശബരിമല സ്വർണ്ണക്കൊള്ള കേസിൽ സിപിഎം നേതാക്കൾ പ്രതികളായതും, മുഖ്യമന്ത്രിയുടെ ഏകാധിപത്യ പ്രവണതയും പരാജയത്തിന് കാരണമായെന്നാണ് സിപിഐ റിപ്പോർട്ട്. എന്നാൽ, സർക്കാരിനെതിരെ ജനവികാരമില്ലെന്നും ന്യൂനപക്ഷങ്ങൾ ഇടതുപക്ഷത്ത് നിന്ന് അകന്നിട്ടില്ലെന്നും സിപിഎം വ്യക്തമാക്കുന്നുണ്ട്. പ്രതികളായ നേതാക്കളെ തള്ളിപ്പറയാൻ സിപിഎം മടിക്കുന്നത് പാർട്ടിക്കുള്ളിലും ചർച്ചയായിട്ടുണ്ട്.

‘അയിത്തമുണ്ടോ’ എന്ന് വെള്ളാപ്പള്ളി
താൻ മുഖ്യമന്ത്രിയുടെ കാറിൽ കയറിയതിൽ എന്താണ് ഇത്ര തെറ്റെന്ന് വെള്ളാപ്പള്ളി നടേശൻ ചോദിച്ചു. ‘പത്ത് വർഷം കൂടെ നിന്ന് ആനുകൂല്യങ്ങൾ പറ്റിയവരാണ് യഥാർത്ഥ ചതിയന്മാർ. താൻ അയിത്തജാതിക്കാരനാണോ എന്ന് വിമർശകർ പറയട്ടെ’ എന്നും അദ്ദേഹം തിരിച്ചടിച്ചു. മുഖ്യമന്ത്രിയെ പുകഴ്ത്തിയ വെള്ളാപ്പള്ളി, ശബരിമല കേസിൽ ജയിലിലുള്ള പത്മകുമാർ കള്ളനാണെന്ന് താൻ പണ്ടേ പറഞ്ഞതാണെന്നും ശിവഗിരിയിൽ മാധ്യമങ്ങളോട് പ്രതികരിച്ചു.

തെരഞ്ഞെടുപ്പ് പരാജയത്തിന്റെ യാഥാർത്ഥ്യം കണ്ടെത്താൻ ഈ മാസം 15 മുതൽ 30 വരെ സിപിഐ പ്രവർത്തകർ ഗൃഹസന്ദർശനം നടത്തും. മുന്നണിയിലെ തിരുത്തൽ നടപടികൾക്ക് ജനകീയ അന്വേഷണം വഴിമരുന്നിടുമെന്നാണ് രാഷ്ട്രീയ നിരീക്ഷകർ കരുതുന്നത്.