‘ബഹിരാകാശത്തുനിന്ന് നോക്കുമ്പോള് ഭൂമിക്ക് അതിരുകളില്ല’; സുനിത വില്യംസുമായുള്ള കൂടിക്കാഴ്ച അനുഭവം പങ്കുവെച്ച് സാദിഖലി തങ്ങള്
കേരള ലിറ്ററേച്ചല് ഫെസ്റ്റിവലിനിടെ സുനിത വില്യംസുമായി കൂടിക്കാഴ്ച നടത്തുന്ന സാദിഖലി ശിഹാബ് തങ്ങളും പി.കെ കുഞ്ഞാലിക്കുട്ടിയും
കോഴിക്കോട്: പ്രശസ്ത ബഹിരാകാശ സഞ്ചാരി സുനിത വില്യംസുമായി മുസ്ലിം ലീഗ് സംസ്ഥാന അധ്യക്ഷന് പാണക്കാട് സാദിഖലി ശിഹാബ് തങ്ങള്, ദേശീയ ജനറല് സെക്രട്ടറി പി.കെ കുഞ്ഞാലിക്കുട്ടി എന്നിവര് കൂടിക്കാഴ്ച നടത്തി. ഡി.സി ബുക്സ് സംഘടിപ്പിച്ച കേരള ലിറ്ററേച്ചര് ഫെസ്റ്റിവലിനിടെയായിരുന്നു കൂടിക്കാഴ്ച നടന്നത്. ഫെസ്റ്റിവലില് മുഖ്യാതിഥിയായി എത്തിയതാണ് സുനിത.
സുനിത വില്യംസുമായുള്ള സംഭാഷണത്തിനിടെ ഉണ്ടായ അനുഭവങ്ങളും ചിന്തകളും സാദിഖലി തങ്ങള് ഫേസ്ബുക്ക് പോസ്റ്റിലൂടെ പങ്കുവെച്ചു. ബഹിരാകാശത്തുനിന്ന് നോക്കുമ്പോള് ഭൂമി വര്ണാഭമായൊരു കാഴ്ചയാണെന്നും, അവിടെ ആകാശവും ഭൂമിയും വെള്ളവും വായുവുമെല്ലാം എല്ലാവര്ക്കും സമാനമാണെന്നും സുനിത വില്യംസ് പറഞ്ഞതായി അദ്ദേഹം കുറിച്ചു. എല്ലാം ഒന്നായിരിക്കെ മനുഷ്യന് എന്തിനാണ് അതിരുകളും വേര്തിരിവുകളുമുണ്ടാക്കുന്നതെന്ന ചോദ്യമാണ് അവര് ഉയര്ത്തുന്നത്.
സുനിത വില്യംസിന്റെ ഈ വാക്കുകള് തന്നെ ഓര്മിപ്പിച്ചത് വിശുദ്ധ ഖുര്ആനിലെ വചനമാണെന്ന് സാദിഖലി തങ്ങള് കുറിച്ചു. മനുഷ്യരെ വിവിധ ഗോത്രങ്ങളും സമൂഹങ്ങളുമാക്കിയത് പരസ്പരം തിരിച്ചറിയാന് വേണ്ടിയാണെന്നും, ദൈവത്തിന് മുന്നില് ഏറ്റവും ആദരണീയന് നീതിമാനാണെന്നുമുള്ള ഖുര്ആന് വചനം അദ്ദേഹം പോസ്റ്റില് ഉദ്ധരിച്ചു. മനുഷ്യര്ക്കിടയിലെ വേര്തിരിവുകള് അര്ത്ഥശൂന്യമാണെന്ന സന്ദേശമാണ് കൂടിക്കാഴ്ച നല്കിയതെന്ന് അദ്ദേഹം സൂചിപ്പിച്ചു.
