‘ഡി.എം.കെ കവര്ച്ചക്കാര്; കുടുംബ രാഷ്ട്രീയത്തെ തൂത്തെറിയും’; ഡി.എം.കെക്കെതിരെ ആഞ്ഞടിച്ച് വിജയ് വീണ്ടും പൊതുവേദിയില്
ചെന്നൈ: കരൂര് ദുരന്തത്തിനു ശേഷം വീണ്ടും പൊതുപരിപാടികളില് സജീവമായി തമിഴക വെട്രി കഴകം(ടി.വി.കെ) പ്രസിഡന്റും നടനുമായ വിജയ്. കാഞ്ചീപുരം ജില്ലയിലെ സുങ്കുവഛത്രത്തിലെ സ്വകാര്യ കോളജില് നടന്ന, തിരഞ്ഞെടുക്കപ്പെട്ടവര്ക്കു മാത്രമായി സംഘടിപ്പിച്ച പൊതുസമ്പര്ക്ക പരിപാടിയില് വിജയ് പങ്കെടുത്തു. ഡി.എം.കെ സര്ക്കാരിനെതിരെ അതിരൂക്ഷമായ വിമര്ശനങ്ങളോടെയാണ് അദ്ദേഹം തെരഞ്ഞെടുപ്പ് പ്രചാരണ പ്രവര്ത്തനങ്ങള് പുനരാരംഭിച്ചത്.
സംസ്ഥാനത്തിന്റെ വികസനത്തിന് തടസ്സമായി നില്ക്കുന്നത് അഴിമതിയും കുടുംബ രാഷ്ട്രീയവുമാണെന്ന് വിജയ് ആരോപിച്ചു. ഇതിനെതിരെ ടി.വി.കെ ശക്തമായി പോരാടും. അണ്ണാദുരൈയുടെ ആദര്ശങ്ങളില്നിന്ന് ഡി.എം.കെ വ്യതിചലിച്ചിരിക്കുകയാണ്. വിജയ് ചുമ്മാ ഒന്നും പറയില്ല. പറഞ്ഞാല് അതു ചെയ്തിരിക്കുമെന്നും വിജയ് വ്യക്തമാക്കി.
സംസ്ഥാനത്തെ പൊതുഖജനാവ് കൊള്ളയടിക്കപ്പെടുകയാണ്. സാധാരണ ജനങ്ങള്ക്ക് അര്ഹിക്കുന്ന ആനുകൂല്യങ്ങള് നിഷേധിക്കപ്പെടുകയാണ്. തമിഴ്നാട്ടിലെ ജനാധിപത്യത്തെ തകര്ക്കുന്ന ശക്തിയായി കുടുംബ രാഷ്ട്രീയം മാറിയിരിക്കുകയാണ്. ഡി.എം.കെയാണ് ഈ പ്രവണതയ്ക്ക് പ്രധാന കാരണം. അധികാരം ഏതാനും കുടുംബാംഗങ്ങളില് മാത്രം ഒതുങ്ങുന്നതിലൂടെ യഥാര്ത്ഥ കഴിവുള്ളവരും ജനകീയ നേതാക്കളും പാര്ശ്വവല്ക്കരിക്കപ്പെടുന്നു. ഈ സാഹചര്യത്തില് തമിഴ്നാടിന് രാഷ്ട്രീയ ബദല് ആവശ്യമാണെന്നും വിജയ് ചൂണ്ടിക്കാട്ടി.
