വാൽപ്പാറ ദുരന്തം: അവധിക്കാലത്ത് ഒത്തുകൂടാൻ പോയി, തീരാനോവായി ആ 9 പേർ

മലപ്പുറം: അവധിക്കാലം ആഘോഷിക്കാൻ ഒത്തുകൂടി യാത്ര പുറപ്പെട്ട മലപ്പുറം പെരിന്തൽമണ്ണ പാങ്ങ് പാറമ്മൽ ജിഎൽപി സ്കൂളിലെ അധ്യാപകരും ജീവനക്കാരും നാടിന് തീരാനോവായി മാറി. തമിഴ്‌നാട്ടിലെ പൊള്ളാച്ചിക്കടുത്ത് വാൽപ്പാറയിൽ ഇവർ സഞ്ചരിച്ചിരുന്ന ടൂറിസ്റ്റ് വാൻ നിയന്ത്രണം വിട്ട് എണ്ണൂറോളം അടി താഴ്ചയിലേക്ക് മറിഞ്ഞാണ് ഒൻപത് പേർ ദാരുണമായി മരണപ്പെട്ടത്. മരിച്ചവരിൽ ഒരു കുട്ടിയും ഏഴ് സ്ത്രീകളും ഒരു പുരുഷനും ഉൾപ്പെടുന്നു. സ്കൂൾ പ്രധാന അധ്യാപിക അജിത (54), അധ്യാപികമാരായ റംല (52), സുഹറ (43), സുഹറയുടെ മകൻ ഹിഷാം (12), അധ്യാപിക ആശ (41), അധ്യാപകൻ അബ്ദുൽ മജീദ് (43), അദ്ദേഹത്തിന്റെ ഭാര്യ റുഖിയ (39), സ്കൂളിലെ പാചക തൊഴിലാളി സാജിത (45), അധ്യാപിക ഷക്കീന (37) എന്നിവരാണ് ഈ അപകടത്തിൽ പൊലിഞ്ഞത്. ഡ്രൈവർ ഉൾപ്പെടെ പരുക്കേറ്റ നാലു പേരിൽ മൂന്നു പേരുടെ നില അതീവ ഗുരുതരമായി തുടരുകയാണ്. ഇതിൽ രണ്ടു പേരെ കോയമ്പത്തൂർ മെഡിക്കൽ കോളജിലേക്ക് മാറ്റി വിദഗ്ധ ചികിത്സ നൽകിവരികയാണ്.

വെള്ളിയാഴ്ച പുലർച്ചെ മലപ്പുറം കോളത്തൂരിൽ നിന്ന് യാത്ര തിരിച്ച സംഘം അതിരപ്പിള്ളി സന്ദർശിച്ച ശേഷമാണ് വാൽപ്പാറയിലേക്ക് പോയത്. വാൽപ്പാറയിൽ നിന്ന് പൊള്ളാച്ചിയിലേക്ക് പോകുന്നതിനിടെ പതിമൂന്നാം ഹെയർപിൻ വളവിൽ വെച്ച് നിയന്ത്രണം നഷ്ടപ്പെട്ട വാൻ സംരക്ഷണ ഭിത്തി തകർത്ത് താഴെയുള്ള ഒമ്പതാം വളവിലേക്ക് പതിക്കുകയായിരുന്നു. അപകടത്തിൽ ട്രാവലർ വാൻ പൂർണ്ണമായും തകർന്നു. ഒരു പുരുഷനും ഏഴ് സ്ത്രീകളും സംഭവസ്ഥലത്ത് വെച്ചുതന്നെ മരിച്ചു. ഒരാളുടെ മരണം ആശുപത്രിയിൽ വെച്ചാണ് സ്ഥിരീകരിച്ചത്. തങ്ങൾ ഏറെ സ്നേഹിച്ചിരുന്ന അധ്യാപകരുടെ വിയോഗവാർത്തയറിഞ്ഞ് പാങ്ങ് എൽപി സ്കൂളിലെ വിദ്യാർത്ഥികളും നാട്ടുകാരും അങ്ങേയറ്റം വികാരാധീനരായി. മരിച്ച ഒൻപതു പേരുടെയും മൃതദേഹം ജന്മനാട്ടിലെത്തിച്ചു. അമ്പലപ്പറമ്പ് ഗവൺമെന്റ് ഹയർസെക്കൻഡറി സ്കൂളിൽ പൊതുദർശനത്തിന് വെച്ചിരിക്കുന്ന മൃതദേഹങ്ങളിൽ വിദ്യാഭ്യാസ മന്ത്രി വി. ശിവൻകുട്ടി ഉൾപ്പെടെയുള്ളവർ അന്ത്യാഞ്ജലി അർപ്പിച്ചു. പൊതുദർശനത്തിന് ശേഷം സംസ്കാര ചടങ്ങുകൾ നടക്കും.