‘ഐ ലവ് മുഹമ്മദ്’ എന്ന് പോസ്റ്റ് ചെയ്തതിന് അറസ്റ്റിലായ യുവാവിന് ഏഴ് മാസങ്ങൾക്ക് ശേഷം ജാമ്യം
ലഖ്നൗ: ഇൻസ്റ്റഗ്രാമിൽ ‘ഐ ലവ് മുഹമ്മദ്’ എന്ന സന്ദേശം പങ്കുവെച്ചതിന്റെ പേരിൽ അറസ്റ്റിലായ യുവാവിന് ഏഴ് മാസത്തെ ജയിൽവാസത്തിന് ശേഷം അലഹബാദ് ഹൈക്കോടതി ജാമ്യം അനുവദിച്ചു. ഉത്തർപ്രദേശിലെ മുസാഫർനഗർ സ്വദേശിയായ നദീമിനാണ് ജസ്റ്റിസ് രാജീവ് ലോചൻ ശുക്ല അധ്യക്ഷനായ ബെഞ്ച് ജാമ്യം നൽകിയത്.
മതവികാരം വ്രണപ്പെടുത്തിയെന്നാരോപിച്ച് കഴിഞ്ഞ വർഷം ഒക്ടോബർ 7-നാണ് മുസാഫർനഗർ പൊലീസ് നദീമിനെ അറസ്റ്റ് ചെയ്തത്. എന്നാൽ, നദീമിന് മുൻപ് ക്രിമിനൽ പശ്ചാത്തലമില്ലെന്നും സോഷ്യൽ മീഡിയ പോസ്റ്റിൽ ഏതെങ്കിലും പ്രത്യേക സമുദായത്തെയോ ജാതിയെയോ ലക്ഷ്യം വെച്ചുള്ള പരാമർശങ്ങളില്ലെന്നും കോടതി നിരീക്ഷിച്ചു. വിചാരണ നീണ്ടുപോകാനുള്ള സാധ്യതയും യുവാവ് ഇതിനോടകം ഏഴ് മാസം ജയിലിൽ കഴിഞ്ഞതും പരിഗണിച്ചാണ് കോടതി നടപടി. അന്വേഷണവുമായി സഹകരിക്കുമെന്ന ഉറപ്പിന്മേലാണ് ജാമ്യം.
അതേസമയം, ഇത്തരം മുദ്രാവാക്യങ്ങൾ ക്രമസമാധാന നില തകർക്കാൻ കാരണമാകുമെന്നും ബറേലിയിലുണ്ടായ അക്രമസംഭവങ്ങൾക്ക് സമാനമായ പോസ്റ്റുകൾ കാരണമായിട്ടുണ്ടെന്നും സർക്കാർ അഭിഭാഷകൻ വാദിച്ചെങ്കിലും കോടതി ഇത് തള്ളി. നബിദിനാഘോഷങ്ങളുമായി ബന്ധപ്പെട്ട് ‘ഐ ലവ് മുഹമ്മദ്’ എന്ന് എഴുതിയതിനെച്ചൊല്ലി 2025-ൽ ഉത്തർപ്രദേശിന്റെ വിവിധ ഭാഗങ്ങളിൽ സംഘർഷങ്ങൾ നിലനിന്നിരുന്നു. ഇതിന്റെ തുടർച്ചയായാണ് സൗഹൃദം തകർക്കാൻ ശ്രമിച്ചുവെന്നാരോപിച്ച് നദീം ഉൾപ്പെടെയുള്ളവർക്കെതിരെ കേസെടുത്തത്. സോഷ്യൽ മീഡിയ പോസ്റ്റുകളുടെ പേരിൽ ക്രിമിനൽ നിയമങ്ങൾ ചുമത്തുന്നതിനെക്കുറിച്ചുള്ള പുതിയ ചർച്ചകൾക്ക് ഈ ഉത്തരവ് വഴിതുറന്നിരിക്കുകയാണ്.
