പാലക്കാട് അപൂർവ ചരിത്രം; ഭർത്താവ് എംപി, ഭാര്യ എംഎൽഎ, പാലക്കാട് കോങ്ങാട് മണ്ഡലം ഇനി ‘തുളസീമയം’

പാലക്കാട്: കേരള രാഷ്ട്രീയ ചരിത്രത്തിൽ അപൂർവ നേട്ടവുമായി പാലക്കാട് നിന്ന് ഭാര്യയും ഭർത്താവും. ഭർത്താവ് പാർലമെന്റ് അംഗമായിരിക്കെ കോങ്ങാട് മണ്ഡലത്തിൽ യുഡിഎഫ് സ്ഥാനാർത്ഥിയായി മത്സരിച്ച കെ.എ തുളസി മികച്ച വിജയം കരസ്ഥമാക്കിയതോടെ അപൂർവ ചരിത്രത്തിന്റെ ഭാഗമായിരിക്കുകയാണ്. പാലക്കാട് നിന്നുള്ള എംപിയും മുതിർന്ന കോൺഗ്രസ് നേതാവുമായ വി.കെ ശ്രീകണ്ഠന്റെ ഭാര്യയാണ് കെ.എ തുളസി. ഒരു വീട്ടിൽ നിന്ന് തന്നെ ഒരേസമയം എം.പിയും എം.എൽ.എയും എന്ന സവിശേഷവും അപൂർവ്വവുമായ രാഷ്ട്രീയ നേട്ടമാണ് ഈ കുടുംബം ഇപ്പോൾ സ്വന്തമാക്കിയിരിക്കുന്നത്.

വർഷങ്ങൾക്ക് മുൻപ് മാത്രം കേരള രാഷ്ട്രീയത്തിൽ സംഭവിച്ച ഈ അപൂർവ്വതയാണ് 2026ലെ നിയമസഭാ തിരഞ്ഞെടുപ്പ് ഫലപ്രഖ്യാപനത്തോടെ വീണ്ടും യാഥാർത്ഥ്യമായിരിക്കുന്നത്. ജനങ്ങൾക്കിടയിലെ വലിയ സ്വീകാര്യതയും താഴെത്തട്ടിലെ മികച്ച പ്രവർത്തനവുമാണ് ഈ ദമ്പതികൾക്ക് വ്യത്യസ്ത തിരഞ്ഞെടുപ്പുകളിൽ ഇത്രയും വലിയ ജനപിന്തുണ നേടിക്കൊടുത്തത്. വി.കെ ശ്രീകണ്ഠൻ പാലക്കാടിന്റെ ശബ്ദമായി ലോക്‌സഭയിൽ നിറഞ്ഞുനിൽക്കുമ്പോൾ, ജനകീയ പ്രശ്‌നങ്ങളുമായി കെ.എ തുളസി ഇനി കേരള നിയമസഭയിലും സജീവമാകും.

രാഷ്ട്രീയ കേരളം വളരെ കൗതുകത്തോടെയും അതിലേറെ ആവേശത്തോടെയുമാണ് ഈ അപൂർവ്വ വാർത്തയെ നോക്കിക്കാണുന്നത്. സംസ്ഥാനത്ത് യുഡിഎഫ് വലിയ മുന്നേറ്റം നടത്തുന്ന പശ്ചാത്തലത്തിൽ കോൺഗ്രസ് പ്രവർത്തകർക്കിടയിൽ ഈ കുടുംബത്തിന്റെ വിജയം വലിയ ആഘോഷങ്ങൾക്കാണ് വഴിയൊരുക്കിയിരിക്കുന്നത്. ജനപ്രതിനിധികൾ എന്ന നിലയിൽ മികച്ച പ്രവർത്തന പാരമ്പര്യമുള്ള ഇരുവരും ഒരേസമയം രണ്ട് സഭകളിൽ അംഗങ്ങളാവുന്നത് പാലക്കാടിന്റെ വികസന മുന്നേറ്റങ്ങൾക്ക് കൂടുതൽ കരുത്തേകുമെന്നാണ് വിലയിരുത്തപ്പെടുന്നത്.