22ാം വയസിൽ ശതകോടീശ്വരൻ; സുക്കർബർഗിന്റെ റെക്കോർഡ് മറികടന്ന് ഇന്ത്യൻ വംശജനായ സൂര്യ മിധ
കാലിഫോർണിയ: ഇരുപത്തിരണ്ടാം വയസ്സിൽ ലോകത്തിലെ ഏറ്റവും പ്രായം കുറഞ്ഞ ശതകോടീശ്വരനായി മാറി ഇന്ത്യൻ വംശജനായ സൂര്യ മിധ. മെർക്കർ എന്ന തന്റെ എഐ അധിഷ്ഠിത റിക്രൂട്ട്മെന്റ് സ്റ്റാർട്ടപ്പിലൂടെയാണ് അദ്ദേഹം ഈ നേട്ടം കൈവരിച്ചത്. 2025 അവസാനത്തോടെ 350 മില്യൺ ഡോളറിന്റെ നിക്ഷേപം സമാഹരിച്ചതോടെ കമ്പനിയുടെ മൂല്യം 10 ബില്യൺ ഡോളറായി ഉയർന്നു. ഇതോടെ, 23ാം വയസ്സിൽ ശതകോടീശ്വരനായ മാർക്ക് സക്കർബർഗിന്റെ റെക്കോർഡ് മറികടക്കാൻ സൂര്യയ്ക്ക് സാധിച്ചു. കമ്പനിയിൽ 22 ശതമാനം ഓഹരിയുള്ള സൂര്യയുടെ ആസ്തി ഏകദേശം 2.2 ബില്യൺ ഡോളറാണെന്ന് ഫോർബ്സ് കണക്കാക്കുന്നു.
ബേ ഏരിയയിലെ ഹൈസ്കൂൾ സുഹൃത്തുക്കളായ ബ്രണ്ടൻ ഫൂഡി, ആദർശ് ഹിരേമത്ത് എന്നിവർക്കൊപ്പം 2023ലാണ് സൂര്യ ഈ സംരംഭം ആരംഭിച്ചത്. ഫ്രീലാൻസ് പ്രതിഭകളെ തൊഴിലവസരങ്ങളുമായി ബന്ധിപ്പിക്കുന്ന പ്ലാറ്റ്ഫോമായി തുടങ്ങിയ മെർക്കർ, പിന്നീട് സിലിക്കൺ വാലിയിലെ വലിയ എഐ ലാബുകൾക്ക് ആവശ്യമായ വിദഗ്ധരെ കണ്ടെത്താനും അവർക്ക് പരിശീലനം നൽകാനുമുള്ള നൂതന സംവിധാനമായി പരിണമിച്ചു. ഉയർന്ന ഗുണമേന്മയുള്ള വിവരങ്ങൾ ഉപയോഗിച്ച് എഐ മോഡലുകളെ പരിശീലിപ്പിക്കാൻ മനുഷ്യ പ്രയത്നം കൂടി ഉപയോഗപ്പെടുത്തുന്നതാണ് ഇവരുടെ ബിസിനസ് രീതി. പീറ്റർ തീൽ, ജാക്ക് ഡോർസി തുടങ്ങിയ പ്രമുഖ നിക്ഷേപകരുടെ പിന്തുണ ഈ സ്റ്റാർട്ടപ്പിന് ലഭിച്ചിട്ടുണ്ട്.
പഠനം പാതിവഴിയിൽ ഉപേക്ഷിച്ച് സംരംഭകത്വത്തിലേക്ക് ഇറങ്ങിയ ഈ മൂവർ സംഘം ‘തീൽ ഫെലോസ്’ കൂടിയാണ്. തുടക്കത്തിൽ 250 മില്യൺ ഡോളർ മൂല്യമുണ്ടായിരുന്ന കമ്പനി ചുരുങ്ങിയ കാലം കൊണ്ടാണ് 10 ബില്യൺ ഡോളറിലേക്ക് വളർന്നത്. നിലവിൽ കമ്പനിയുടെ ബോർഡ് ചെയർമാനായി സൂര്യ മിധ പ്രവർത്തിക്കുന്നു. ഇന്ത്യൻ വംശജരായ യുവാക്കളുടെ ആഗോള ടെക് ലോകത്തെ സ്വാധീനം വ്യക്തമാക്കുന്നതാണ് സൂര്യയുടെ വിജയം. എഐ മേഖലയിലെ വിപ്ലവകരമായ മാറ്റങ്ങൾ എങ്ങനെയാണ് അതിവേഗത്തിൽ വലിയ സാമ്പത്തിക മൂല്യം സൃഷ്ടിക്കുന്നതെന്ന് മെർക്കറിന്റെ വളർച്ച തെളിയിക്കുന്നു. കൃത്യമായ കാഴ്ചപ്പാടും കഠിനാധ്വാനവും ഉണ്ടെങ്കിൽ പ്രായത്തിന് തടസ്സമാകാതെ വലിയ വിജയങ്ങൾ നേടാമെന്ന് ഈ യുവാവ് തെളിയിക്കുന്നു. ലോകമെമ്പാടുമുള്ള യുവ സംരംഭകർക്ക് വലിയൊരു പ്രചോദനമാണ് സൂര്യ മിധയുടെ ഈ അസാമാന്യ നേട്ടം.
