‘ഇനിയുള്ള നാളുകൾ ജാതി-മത ഭേദമില്ലാത്ത ആഘോഷങ്ങളുടേത്’; വലിയ പെരുന്നാൾ ദിനത്തിൽ പാണക്കാട്ടെത്തി മുഖ്യമന്ത്രി വി.ഡി സതീശൻ
മലപ്പുറം: വലിയ പെരുന്നാൾ ദിനത്തിൽ പാണക്കാട് സന്ദർശനം നടത്തി മുഖ്യമന്ത്രി വി.ഡി. സതീശൻ. മുസ്ലിം ലീഗ് സംസ്ഥാന പ്രസിഡന്റ് പാണക്കാട് സയ്യിദ് സാദിഖലി ശിഹാബ് തങ്ങൾ ഉൾപ്പെടെയുള്ള പ്രമുഖ നേതാക്കളുമായി അദ്ദേഹം കൂടിക്കാഴ്ച നടത്തി. മുഖ്യമന്ത്രിയായി ചുമതലയേറ്റ ശേഷമുള്ള തന്റെ ആദ്യ മലബാർ യാത്ര പാണക്കാട്ടേക്കാണെന്ന് വി.ഡി. സതീശൻ മാധ്യമങ്ങളോട് പറഞ്ഞു. പെരുന്നാൾ ദിനത്തിൽ തന്നെ സാദിഖലി തങ്ങൾ, പി.കെ. കുഞ്ഞാലിക്കുട്ടി തുടങ്ങിയ നേതാക്കളെ നേരിൽ കാണാൻ സാധിച്ചതിൽ അതിയായ സന്തോഷമുണ്ടെന്നും അദ്ദേഹം കൂട്ടിച്ചേർത്തു.
ജാതി-മത ഭേദമന്യേ കേരളത്തിലെ എല്ലാ ജനങ്ങൾക്കും എല്ലാ ആഘോഷങ്ങളും ഒന്നിച്ച് പങ്കിടാൻ സാധിക്കുന്ന മനോഹരമായ ദിനങ്ങളായി ഇനിയുള്ള കാലം മാറും. അത്തരമൊരു സാഹചര്യം സംസ്ഥാനത്ത് ഉറപ്പുവരുത്തുക എന്നതാണ് പുതിയ സർക്കാരിന്റെ ലക്ഷ്യമെന്നും മുഖ്യമന്ത്രി വ്യക്തമാക്കി. മുഖ്യമന്ത്രിയുടെ ഈ സൗഹൃദ സന്ദർശനത്തിൽ സാദിഖലി ശിഹാബ് തങ്ങൾ സന്തോഷം പ്രകടിപ്പിച്ചു. പാണക്കാട് കുടുംബാംഗങ്ങൾക്കൊപ്പം പെരുന്നാൾ പ്രഭാതഭക്ഷണവും കഴിച്ച ശേഷമാണ് മുഖ്യമന്ത്രി വി.ഡി. സതീശൻ അവിടെനിന്ന് മടങ്ങിയത്.
