ബദരീനാഥ് ക്ഷേത്രത്തിൽ ഒളിക്യാമറയിൽ ദൃശ്യങ്ങൾ പകർത്താൻ ശ്രമം; പോലീസിനോട് മാപ്പ് പറഞ്ഞ് പ്രതി
ചമോലി: ബദരീനാഥ് ക്ഷേത്രത്തിന്റെ ശ്രീകോവിലിനുള്ളിൽ കണ്ണടയിൽ ഒളിപ്പിച്ച രഹസ്യ ക്യാമറ ഉപയോഗിച്ച് ദൃശ്യങ്ങൾ ചിത്രീകരിക്കാൻ ശ്രമിച്ച ജയപ്രകാശ് പാണ്ഡെ പിടിയിൽ. മുംബൈ സ്വദേശിയായ ഇയാൾ ദർശനത്തിനിടെ നിയമവിരുദ്ധമായി ദൃശ്യങ്ങൾ പകർത്തുന്നത് ശ്രദ്ധയിൽപ്പെട്ടപ്പോഴാണ് ചമോലി പോലീസ് അറസ്റ്റ് ചെയ്തത്. ക്ഷേത്രത്തിന്റെ ശ്രീകോവിലിനുള്ളിൽ ചിത്രീകരണവും ഫോട്ടോഗ്രഫിയും കർശനമായി നിരോധിച്ചിരിക്കെയാണ് സുരക്ഷാ മാനദണ്ഡങ്ങളും ക്ഷേത്രത്തിന്റെ ആചാരമര്യാദകളും ലംഘിച്ചുകൊണ്ട് ഇയാൾ ഈ പ്രവൃത്തി ചെയ്തത്. സംശയം തോന്നിയ സുരക്ഷാ ജീവനക്കാർ ഇയാളെ തടഞ്ഞു വെക്കുകയും പരിശോധനയിൽ കണ്ണടയുടെ ഫ്രെയിമിനുള്ളിൽ ഘടിപ്പിച്ച ക്യാമറ കണ്ടെത്തുകയുമായിരുന്നു.
തുടർന്ന് ഉത്തരാഖണ്ഡ് പോലീസ് ആക്ട് സെക്ഷൻ 81 പ്രകാരം ഇയാൾക്കെതിരെ നടപടിയെടുക്കുകയും 500 രൂപ പിഴ ചുമത്തുകയും ചെയ്തു. ക്ഷേത്രത്തിന്റെ സുരക്ഷയും സ്വകാര്യതയും കണക്കിലെടുത്ത് ഇയാൾ പകർത്തിയ ദൃശ്യങ്ങളും ചിത്രങ്ങളും പോലീസ് ഉടൻ നശിപ്പിച്ചു. തന്റെ ഭാഗത്തുനിന്നുണ്ടായ തെറ്റിന് പോലീസിനോട് മാപ്പ് പറഞ്ഞ ജയപ്രകാശ് പാണ്ഡെ, ഈ ദൃശ്യങ്ങൾ താൻ ഒരിടത്തും പങ്കുവെക്കില്ലെന്ന് ഉറപ്പുനൽകി. ക്ഷേത്ര ഭരണസമിതിയും പോലീസും ഏർപ്പെടുത്തിയിരിക്കുന്ന നിയന്ത്രണങ്ങളും മാർഗ്ഗനിർദ്ദേശങ്ങളും എല്ലാ തീർത്ഥാടകരും നിർബന്ധമായും പാലിക്കണമെന്നും, നിയമലംഘനം നടത്തുന്നവർക്കെതിരെ കർശന നിയമനടപടികൾ സ്വീകരിക്കുമെന്നും ചമോലി പോലീസ് അറിയിച്ചു.
