ധനുഷ് ബിജെപിയിലേക്ക്? ചര്‍ച്ചയായി ഫാൻസ് ക്ലബ് ഉപഹാരത്തിലെ ‘താമര ചിഹ്നം’
ധനുഷ്
ചെന്നൈ: ആരാധകസംഘടന പുനഃസംഘടിപ്പിച്ചതിന് പിന്നാലെ നടൻ ധനുഷ് വീണ്ടും ചർച്ചകളിൽ നിറയുന്നു. കഴിഞ്ഞ ദിവസം ഫാൻസ് ക്ലബ്ബിലെ വനിതകൾക്ക് നൽകിയ ഉപഹാരത്തിൽ ‘താമര ചിഹ്നം’ ഉൾപ്പെടുത്തിയത് പുതിയ ചർച്ചകൾക്ക് തിരികൊളുത്തിയിരിക്കുകയാണ്. ധനുഷ് ബി.ജെ.പി.യിലേക്ക് പോകുന്നുവെന്ന അഭ്യൂഹമാണ് സോഷ്യൽ മീഡിയയിൽ ഉയരുന്നത്. ധനുഷിന്റെ നീക്കങ്ങൾ ബി.ജെ.പി.യുടെ ‘പ്ലാൻ ഡി’ ആണെന്നും തമിഴ്‌നാട്ടിൽ സ്വാധീനം ഉറപ്പിക്കാൻ ബി.ജെ.പി. സിനിമാ താരങ്ങളെ ഉപയോഗപ്പെടുത്താൻ ശ്രമിക്കുന്നുണ്ടെന്നും കോൺഗ്രസ് ആരോപിച്ചു.
കഴിഞ്ഞ ദിവസമാണ് ധനുഷിന്റെ ഫാൻസ് ക്ലബ് വെൽഫെയർ ട്രസ്റ്റായി പുനഃസംഘടിപ്പിച്ചത്. ‘ധനുഷ് നർപ്പണി ഇയക്കം’ എന്ന പേരിലായിരുന്നു പുനഃസംഘടന. പേരുമാറ്റത്തിനൊപ്പം പുതിയ ലോഗോയും പതാകയും അവതരിപ്പിച്ചിരുന്നു. ചുവപ്പും വെള്ളയും നിറങ്ങളിലുള്ളതാണ് പതാക. വലിയ ചുവന്ന നക്ഷത്രവും അതിന്റെ മധ്യത്തിൽ കൈകൂപ്പി നിൽക്കുന്ന ധനുഷിന്റെ ചിത്രവുമാണ് ലോഗോയിലുള്ളത്. സംഘടനയുടെ പുതിയ പേരും ചിഹ്നത്തിൽ ഉൾപ്പെടുത്തിയിട്ടുണ്ട്. തുടർന്ന് ചെന്നൈയിൽ നടന്ന ചടങ്ങിൽ മൂവായിരത്തോളം വനിതകൾക്ക് ഉപഹാരങ്ങൾ നൽകുകയും ചെയ്തു. ഈ ഉപഹാരത്തിലാണ് ബി.ജെ.പി.യുടെ തെരഞ്ഞെടുപ്പ് ചിഹ്നമായ താമര ഇടംപിടിച്ചത്.
സേലം, കടലൂർ, കാഞ്ചീപുരം തുടങ്ങിയ വിവിധ ജില്ലകളിൽ നിന്നുള്ള വനിതാ ആരാധകരും ഭാരവാഹികളുമാണ് ചെന്നൈയിൽ സംഘടിച്ചത്. ചടങ്ങിൽ പങ്കെടുത്ത വനിതാ പ്രവർത്തകർ പരമ്പരാഗതമായ ‘വേൽ’ ധനുഷിന് സമ്മാനിക്കുകയും 2031-ലെ തമിഴ്‌നാട് നിയമസഭാ തെരഞ്ഞെടുപ്പിൽ അദ്ദേഹത്തെ മുഖ്യമന്ത്രി സ്ഥാനാർഥിയായി കാണാനുള്ള ആഗ്രഹം പരസ്യമായി പ്രകടിപ്പിക്കുകയും ചെയ്തു.
എന്നാൽ രാഷ്ട്രീയ പ്രവേശനത്തിൽ ധനുഷോ അദ്ദേഹത്തിന്റെ ഓഫീസോ ഇതുവരെ ഔദ്യോഗികമായി നിലപാടുകൾ വ്യക്തമാക്കിയിട്ടില്ല. അതേസമയം ‘തമിഴക എഴിച്ചി കഴകം’ (ടി.ഇ.കെ.) എന്ന പേരിൽ ധനുഷ് ഉടൻ തന്നെ രാഷ്ട്രീയപാർട്ടി രൂപീകരിക്കുമെന്ന റിപ്പോർട്ടുകളുമുണ്ട്. വിജയ് ‘തമിഴക വെട്രി കഴകം’ എന്ന പാർട്ടി രൂപീകരിച്ച് സജീവ രാഷ്ട്രീയത്തിലേക്ക് ഇറങ്ങിയതിന് തൊട്ടുപിന്നാലെയാണ് ധനുഷിന്റെ ഈ നീക്കങ്ങൾ എന്നത് തമിഴ്‌നാട് രാഷ്ട്രീയത്തിൽ വലിയ ഉറ്റുനോക്കലിന് കാരണമായിട്ടുണ്ട്.
