തൃശൂരില്‍ ഭാര്യയെയും നാലര വയസ്സുള്ള മകനെയും കഴുത്തറുത്ത് കൊന്നു; ഭര്‍ത്താവ് ഗുരുതരാവസ്ഥയില്‍
തൃശൂര്‍: വലപ്പാടില്‍ കുടുംബവഴക്കിനെ തുടര്‍ന്ന് ഭാര്യയെയും നാലര വയസ്സുള്ള മകനെയും ഭര്‍ത്താവ് കഴുത്തറുത്ത് കൊലപ്പെടുത്തി. തെക്കിനിയേടത്ത് വിസ്മയ, മകന്‍ ദക്ഷ് എന്നിവരാണ് മരിച്ചത്. സംഭവത്തില്‍ ഭാര്യയെയും മകനെയും കൊലപ്പെടുത്തിയ ശേഷം സ്വയം കഴുത്തറുത്ത് ജീവനൊടുക്കാന്‍ ശ്രമിച്ച ഭര്‍ത്താവ് വിജേഷ് ഗുരുതരാവസ്ഥയില്‍ തൃശൂര്‍ മെഡിക്കല്‍ കോളജ് ആശുപത്രിയില്‍ ചികിത്സയിലാണ്.
പുലര്‍ച്ചെ ഒന്നരയോടെയായിരുന്നു നാടിനെ ഞെട്ടിച്ച കൊടുംക്രൂരത അരങ്ങേറിയത്. വീട്ടില്‍ നിന്നും കരച്ചില്‍ ശബ്ദം കേട്ട് വിജേഷിന്റെ സഹോദരന്‍ വാതില്‍ തള്ളിത്തുറന്ന് അകത്തു കടന്നപ്പോഴാണ് ഗുരുതര പരിക്കുകളേറ്റ നിലയില്‍ വിസ്മയയെ കണ്ടത്. ഇതിനിടെ വിജേഷ് മകന്‍ ദക്ഷിനെയും കൊലപ്പെടുത്തുകയായിരുന്നു. ഉടന്‍ തന്നെ വിസ്മയയെ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല.
കുടുംബപ്രശ്‌നങ്ങളാണ് കൊലപാതകത്തിന് കാരണമെന്നാണ് പോലീസിന്റെ പ്രാഥമിക നിഗമനം. സംഭവത്തില്‍ വലപ്പാട് പോലീസ് ഇന്‍ക്വസ്റ്റ് നടപടികള്‍ പൂര്‍ത്തിയാക്കി അന്വേഷണം ആരംഭിച്ചിട്ടുണ്ട്.
