22/11/2026
[fontresizer_tawhidurrahmandear_widget]

45-ാമത് ഷാർജ അന്താരാഷ്ട്ര പുസ്തകമേളയ്ക്ക് സമാപനം; 126 രാജ്യങ്ങളിൽനിന്ന് 3,212 പ്രസാധകർ പങ്കെടുത്തു

 45-ാമത് ഷാർജ അന്താരാഷ്ട്ര പുസ്തകമേളയ്ക്ക് സമാപനം; 126 രാജ്യങ്ങളിൽനിന്ന് 3,212 പ്രസാധകർ പങ്കെടുത്തു

ഷാർജ: വായനയുടെയും സാഹിത്യത്തിന്റെയും ലോകത്തെ ഒരുമിപ്പിച്ച 45-ാമത് ഷാർജ അന്താരാഷ്ട്ര പുസ്തകമേളയ്ക്ക് സമാപനമായി. നവംബർ 4 മുതൽ 15 വരെ ഷാർജ എക്സ്പോ സെന്ററിൽ നടന്ന മേളയിൽ 126 രാജ്യങ്ങളിൽ നിന്നായി 3,212 പ്രസാധകരും പ്രദർശകരും പങ്കെടുത്തു. 17 ലക്ഷത്തിലധികം പുസ്തകങ്ങളാണ് ഇത്തവണ മേളയിൽ പ്രദർശിപ്പിച്ചത്.

‘കഥകളാൽ മെനഞ്ഞത്’ (Stories Made of Stories) എന്ന പ്രമേയത്തിൽ സംഘടിപ്പിച്ച മേളയിൽ ഒമാനായിരുന്നു വിശിഷ്ടാതിഥി രാജ്യം. 25 രാജ്യങ്ങളിൽ നിന്നുള്ള 106 പ്രമുഖ എഴുത്തുകാരും ചിന്തകരും സാംസ്കാരിക പ്രവർത്തകരും മേളയുടെ ഭാഗമായി. പുസ്തകപ്രദർശനത്തിനും വിൽപനയ്ക്കും പുറമെ ഏകദേശം 1,500 സാംസ്കാരിക പരിപാടികളും വിവിധ ദിവസങ്ങളിലായി അരങ്ങേറി.

പുസ്തക പ്രകാശനങ്ങൾ, സാഹിത്യ സംവാദങ്ങൾ, കവിയരങ്ങുകൾ, എഴുത്തുകാരുമായുള്ള കൂടിക്കാഴ്ചകൾ, കുട്ടികൾക്കായുള്ള ശിൽപശാലകൾ തുടങ്ങിയവ മേളയുടെ പ്രധാന ആകർഷണങ്ങളായിരുന്നു. വിവിധ ഭാഷകളിലും രാജ്യങ്ങളിലുമുള്ള സാഹിത്യപ്രവർത്തകരെ ഒരേ വേദിയിൽ കൊണ്ടുവരുന്നതിലൂടെ അന്താരാഷ്ട്ര സാംസ്കാരിക വിനിമയത്തിനുള്ള പ്രധാന വേദിയായി മേള മാറി.

മലയാളി വായനക്കാരുടെയും പ്രസാധകരുടെയും സജീവ പങ്കാളിത്തം ഇത്തവണയും ശ്രദ്ധേയമായി. കേരളത്തിൽ നിന്നുള്ള നിരവധി പ്രസാധകർ മേളയിൽ പങ്കെടുത്തു. മലയാള പുസ്തകങ്ങളുടെ പ്രകാശനങ്ങളും സാഹിത്യ പരിപാടികളും പ്രവാസി മലയാളികൾക്ക് ഏറെ ആകർഷണമായി.

1982ൽ ഏതാനും പ്രസാധകരുമായി ആരംഭിച്ച ഷാർജ അന്താരാഷ്ട്ര പുസ്തകമേള ഇന്ന് ലോകത്തിലെ പ്രമുഖ പുസ്തകമേളകളിലൊന്നായി വളർന്നിരിക്കുകയാണ്. പുസ്തകങ്ങളുടെ പകർപ്പവകാശ വിനിമയ രംഗത്തും ആഗോളതലത്തിൽ ശ്രദ്ധേയമായ സ്ഥാനം മേളയ്ക്കുണ്ട്.

ലോകത്തിന്റെ വിവിധ ഭാഗങ്ങളിൽ നിന്നുള്ള എഴുത്തുകാരെയും പ്രസാധകരെയും വായനക്കാരെയും ഒരുമിപ്പിച്ച മറ്റൊരു പുസ്തകോത്സവത്തിന് ഇതോടെ തിരശ്ശീല വീണു.

Also read: