‘സ്വർണവില വർധന ആശങ്കാജനകമല്ല, സർക്കാർ നിരീക്ഷിക്കുന്നുണ്ട്’- നിർമല സീതാരാമൻ
ന്യൂഡൽഹി: സ്വർണവിലയിലെ അമിതമായ വർധനവ് സർക്കാർ നിരീക്ഷിച്ചുവരികയാണെന്ന് കേന്ദ്ര ധനമന്ത്രി നിർമ്മല സീതാരാമൻ. റിസർവ് ബാങ്കിന്റെ സെൻട്രൽ ബോർഡ് ഓഫ് ഡയറക്ടർമാരുമായുള്ള ബജറ്റ് അവലോകന യോഗത്തിന് ശേഷം മാധ്യമങ്ങളോട് സംസാരിക്കുകയായിരുന്നു മന്ത്രി. ആഗോളതലത്തിൽ കേന്ദ്ര ബാങ്കുകൾ വലിയ തോതിൽ സ്വർണവും വെള്ളിയും സംഭരിക്കുന്നത് വിലവർധനവിന് പ്രധാന കാരണമാണെന്ന് അവർ ചൂണ്ടിക്കാട്ടി.
ലോകമെമ്പാടുമുള്ള സെൻട്രൽ ബാങ്കുകൾ ഇപ്പോൾ സുരക്ഷിത നിക്ഷേപം എന്ന നിലയിൽ സ്വർണത്തെ കാണുന്നു. അതോടൊപ്പം ഇന്ത്യയിലെ ഉത്സവ സീസണുകളിൽ ഗാർഹിക ഉപഭോഗത്തിനുണ്ടാകുന്ന വർധനവും വിലക്കയറ്റത്തിന് കാരണമാകുന്നുണ്ട്. നിലവിലെ സാഹചര്യം ആശങ്കാജനകമായ രീതിയിലേക്ക് മാറിയിട്ടില്ലെന്നും ആർബിഐയുമായി ചേർന്ന് സ്ഥിതിഗതികൾ വിലയിരുത്തുമെന്നും മന്ത്രി ഉറപ്പുനൽകി. രാജ്യത്തിന്റെ സാമ്പത്തിക വളർച്ചയുടെ ഭാഗമാകാൻ എല്ലാവരും മുന്നോട്ടുവരണമെന്നും അവർ രാഷ്ട്രത്തോട് അഭ്യർത്ഥിച്ചു.
ആഗോള വിപണിയിലെ അനിശ്ചിതത്വങ്ങൾക്കിടയിൽ തിങ്കളാഴ്ചയും സ്വർണവിലയിൽ വൻ കുതിപ്പാണ് രേഖപ്പെടുത്തിയത്. മൾട്ടി കമ്മോഡിറ്റി എക്സ്ചേഞ്ചിൽ ഏപ്രിൽ മാസത്തെ സ്വർണ കരാറുകൾ 10 ഗ്രാമിന് 2,946 രൂപ ഉയർന്ന് 1,59,822 രൂപയിലെത്തി. അന്താരാഷ്ട്ര വിപണിയിലും സ്വർണവിലയിൽ സമാനമായ വർധനയുണ്ട്. അന്താരാഷ്ട്രതലത്തിൽ സ്വർണ ഫ്യൂച്ചറുകൾ ഔൺസിന് 5,177.51 ഡോളർ എന്ന നിലയിലാണ് വ്യാപാരം നടക്കുന്നത്.
അമേരിക്കൻ സുപ്രീം കോടതിയുടെ പുതിയ വിധിയെത്തുടർന്ന് ഇന്ത്യ-യുഎസ് വ്യാപാര കരാറിലുണ്ടാകാൻ സാധ്യതയുള്ള മാറ്റങ്ങളെക്കുറിച്ചും മന്ത്രി സംസാരിച്ചു. ഡൊണാൾഡ് ട്രംപിന്റെ താരിഫ് ചട്ടക്കൂടുകൾ റദ്ദാക്കിയ കോടതി വിധി ധനമന്ത്രാലയം വിലയിരുത്തുകയാണ്. ട്രംപ് ഏർപ്പെടുത്തിയ അടിയന്തര താരിഫുകൾ നിയമവിരുദ്ധമാണെന്ന വിധി ആഗോള വ്യാപാര മേഖലയിൽ വലിയ മാറ്റങ്ങൾ വരുത്താൻ സാധ്യതയുണ്ട്. എന്നാൽ ഇതിനെക്കുറിച്ച് ഇപ്പോൾ പ്രതികരിക്കുന്നത് അപക്വമായിരിക്കുമെന്നും മന്ത്രി കൂട്ടിച്ചേർത്തു. യോഗത്തിൽ ധനകാര്യ സഹമന്ത്രി പങ്കജ് ചൗധരിയും ആർബിഐ ഗവർണറും പങ്കെടുത്തു.
