മണിക്കൂറിൽ 5000 ഇഡ്ഡലി! ഗുരുവായൂരപ്പന് വഴിപാടായി നവീന മെഷീൻ എത്തിച്ച് കാനഡയിലെ വ്യവസായി
തൃശൂർ: ഗുരുവായൂർ ക്ഷേത്രത്തിലെത്തുന്ന ഭക്തർക്ക് ഇനി കാത്തിരിപ്പില്ലാതെ പ്രസാദമൂട്ട്. മണിക്കൂറിൽ അയ്യായിരം ഇഡ്ഡലികൾ വരെ തയാറാക്കാൻ ശേഷിയുള്ള അത്യാധുനിക മെഷീൻ ക്ഷേത്രത്തിന് വഴിപാടായി ലഭിച്ചു. കാനഡയിലെ പ്രമുഖ ഹോട്ടൽ വ്യവസായിയായ ബാലസുബ്രഹ്മണ്യമാണ് ഭഗവാന് വഴിപാടായി അത്ഭുത യന്ത്രം സമർപ്പിച്ചത്. ക്ഷേത്രത്തിലെ അന്നലക്ഷ്മി ഹാളിൽ നടന്ന ചടങ്ങിൽ ദേവസ്വം മന്ത്രി വി.എൻ വാസവൻ മെഷീന്റെ ഉദ്ഘാടനം നിർവഹിച്ചു.
ദിവസേന ആയിരക്കണക്കിന് ഭക്തർ എത്തുന്ന ഗുരുവായൂരിൽ പ്രസാദമൂട്ട് സുഗമമാക്കാൻ നവീന യന്ത്രം ഏറെ സഹായകമാകും. വലിയ അളവിൽ മാവ് ഒഴിച്ച് ചുരുങ്ങിയ സമയത്തിനുള്ളിൽ മൃദുവായ ഇഡ്ഡലികൾ ഗുണമേന്മയോടെ നിർമ്മിക്കാൻ ഇതിലൂടെ സാധിക്കും.
ചടങ്ങിൽ ദേവസ്വം ചെയർമാൻ ഡോ. വി.കെ വിജയൻ അധ്യക്ഷത വഹിച്ചു. ഭരണസമിതി അംഗങ്ങളായ മല്ലിശ്ശേരി പരമേശ്വരൻ നമ്പൂതിരിപ്പാട്, സി. മനോജ്, കെ.പി വിശ്വനാഥൻ, മനോജ് ബി നായർ, അഡ്മിനിസ്ട്രേറ്റർ കെ.പി വിനയൻ തുടങ്ങിയ പ്രമുഖർ ചടങ്ങിൽ സംബന്ധിച്ചു. ആധുനിക സജ്ജീകരണങ്ങളോടെയുള്ള മെഷീൻ പ്രവർത്തനസജ്ജമായതോടെ ക്ഷേത്രത്തിലെ അന്നദാന വിഭാഗത്തിന്റെ ജോലിഭാരം ഗണ്യമായി കുറയുമെന്നാണ് പ്രതീക്ഷിക്കുന്നത്.
