എഫ്സിആർഎ ഭേദഗതിക്കെതിരെ ക്രൈസ്തവസഭകൾ പ്രതിഷേധത്തിലേക്ക്; ഏകോപന സമിതി പ്രധാനമന്ത്രിയെ കാണും
ആലപ്പുഴ: കേന്ദ്ര സർക്കാർ കൊണ്ടുവരുന്ന വിദേശസംഭാവന നിയന്ത്രണ നിയമ (എഫ്സിആർഎ) ഭേദഗതിക്കെതിരെ ക്രൈസ്തവസഭകൾ നിലപാട് കടുപ്പിക്കുന്നു. സന്നദ്ധസേവന രംഗത്ത് പ്രവർത്തിക്കുന്നവരെ ഭയപ്പെടുത്താനും പിന്തിരിപ്പിക്കാനും ലക്ഷ്യമിട്ടുള്ളതാണ് പുതിയ നീക്കമെന്ന് സഭാനേതൃത്വം ആരോപിച്ചു. നിലവിൽ ഫണ്ട് വിനിയോഗം നിരീക്ഷിക്കാൻ കർശന സംവിധാനങ്ങളുണ്ടെന്നിരിക്കെ, നിസ്സാര കാരണങ്ങൾ പറഞ്ഞ് ലൈസൻസ് റദ്ദാക്കാനും സ്ഥാപനങ്ങളുടെ ആസ്തികൾ സർക്കാർ അതോറിറ്റിക്ക് ഏറ്റെടുക്കാനും ഭേദഗതിയിലൂടെ സാധിക്കുമെന്നതാണ് പ്രധാന ആശങ്ക. ഭരണഘടനാ വിരുദ്ധമായ ഇത്തരം വ്യവസ്ഥകൾ പിൻവലിക്കണമെന്ന് കേരള ലത്തീൻ കത്തോലിക്ക മെത്രാൻ സമിതി ആവശ്യപ്പെട്ടു. 2020-ലെ ഭേദഗതി പ്രകാരം ഫണ്ട് കൈമാറ്റം നിരോധിച്ചത് പാവപ്പെട്ടവർക്ക് സഹായമെത്തിക്കുന്ന സാമൂഹിക സേവന പ്രവർത്തനങ്ങളെ സാരമായി ബാധിച്ചതായും സഭ ചൂണ്ടിക്കാട്ടുന്നു.
വിഷയത്തിൽ ശക്തമായ ഇടപെടൽ നടത്തുന്നതിനായി സിബിസിഐയുടെ നേതൃത്വത്തിൽ എട്ടംഗ ഏകോപന സമിതി രൂപീകരിച്ചു. ഇതര മതസംഘടനാ പ്രതിനിധികളും നിയമവിദഗ്ധരും ഉൾപ്പെടുന്ന സമിതി അടുത്ത മാസം പ്രധാനമന്ത്രി നരേന്ദ്ര മോദിയുമായി കൂടിക്കാഴ്ച നടത്താൻ സമയം തേടിയിട്ടുണ്ട്. ബില്ലിലെ ആശങ്കകൾ വ്യക്തമാക്കി കേന്ദ്ര ആഭ്യന്തരമന്ത്രി അമിത് ഷായ്ക്ക് ഇതിനോടകം നിവേദനം നൽകി. സ്ഥാപനങ്ങളുടെ സ്വയംഭരണാവകാശം സംരക്ഷിക്കാനും ജുഡീഷ്യൽ മേൽനോട്ടത്തിന് സംവിധാനം വേണമെന്നും സിബിസിഐ സെക്രട്ടറി ജനറൽ ആർച്ച് ബിഷപ്പ് അനിൽ ജെ.ടി കൂട്ടോ ആവശ്യപ്പെട്ടു.
ബില്ലിലെ ഏകാധിപത്യപരമായ വ്യവസ്ഥകളിൽ പുനരാലോചന വേണമെന്ന് മലങ്കര കത്തോലിക്കാ സഭ മേജർ ആർച്ച് ബിഷപ്പ് കർദിനാൾ മാർ ബസേലിയോസ് ക്ലീമിസ് കാതോലിക്കാ ബാവയും, നിയന്ത്രണങ്ങൾ ജീവകാരുണ്യ പ്രവർത്തനങ്ങളെ തകർക്കുന്നതാകരുതെന്ന് സിറോ മലബാർ സഭ മേജർ ആർച്ച് ബിഷപ്പ് മാർ റഫാൽ തട്ടിലും വ്യക്തമാക്കി. പാർലമെന്റിൽ ബില്ലിനെതിരെ നിലപാടെടുക്കാൻ എംപിമാരുടെ പിന്തുണ തേടുമെന്നും സഭാനേതൃത്വം അറിയിച്ചു. ഇത് സർക്കാരിനോടുള്ള എതിർപ്പല്ലെന്നും മറിച്ച് പൊതുജനങ്ങളെ ബാധിക്കുന്ന സാമൂഹിക വിഷയമാണെന്നും സഭ വ്യക്തമാക്കിയിട്ടുണ്ട്.
