ജമ്മു കശ്മീരിലെ സൈനിക ക്യാമ്പിൽ സ്ഫോടനം; രണ്ട് സൈനികർ കൊല്ലപ്പെട്ടു
ശ്രീനഗർ: ജമ്മു കശ്മീരിലെ ബാരാമുള്ള ജില്ലയിലുള്ള ഉറി സെക്ടറിൽ നിയന്ത്രണ രേഖയ്ക്ക് സമീപം ഉണ്ടായ ആകസ്മിക സ്ഫോടനത്തിൽ രണ്ട് സൈനികർ കൊല്ലപ്പെട്ടു. ഇന്നലെ വൈകുന്നേരം ഉറിയിലെ കമൽകോട്ട് പ്രദേശത്തുള്ള സൈനിക ക്യാമ്പിലാണ് അപകടമുണ്ടായത്.
ഗുരുതരമായി പരിക്കേറ്റ സൈനികരെ ഉടൻ തന്നെ ഹെലികോപ്റ്റർ മാർഗം ശ്രീനഗറിലെ ബദാമിബാഗ് കന്റോൺമെന്റിലുള്ള ആർമി ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. മഹാരാഷ്ട്ര ഐറോളി സ്വദേശി ചവാൻ വിക്രം ബാലകൃഷ്ണ, മഹാരാഷ്ട്ര ഷാപൂർ സ്വദേശി അർജുൻ ജാദവ് രജീന്ദ്ര എന്നിവരാണ് മരിച്ച സൈനികർ.
സ്ഫോടനത്തിന്റെ കൃത്യമായ കാരണം ഇതുവരെ വ്യക്തമായിട്ടില്ല. സംഭവത്തിൽ സൈന്യം ഔദ്യോഗിക പ്രസ്താവനകൾ ഒന്നും നടത്തിയിട്ടില്ലെങ്കിലും ഉന്നതതല അന്വേഷണത്തിന് ഉത്തരവിട്ടിട്ടുണ്ട്. വൃത്തങ്ങൾ നൽകുന്ന വിവരങ്ങൾ പ്രകാരം സ്ഫോടനത്തിന്റെ കാരണം കണ്ടെത്താനുള്ള ശ്രമങ്ങൾ തുടരുകയാണ്.
