‘ഞാൻ മന്ത്രിയായി തുടരുന്നിടത്തോളം ആർഎസ്എസ് റൂട്ട്മാർച്ചുകൾക്ക് മുൻകൂട്ടി അനുമതി വാങ്ങിയിരിക്കണം’; പ്രിയങ്ക് ഖാർഗെ
ബെംഗളൂരു: കർണാടകയിൽ ആർഎസ്എസ് റൂട്ട്മാർച്ചുകൾക്ക് സർക്കാറിന്റെ മുൻകൂർ അനുമതി നിർബന്ധമാക്കുമെന്ന് സംസ്ഥാന ഐടിബിടി മന്ത്രി പ്രിയങ്ക് ഖാർഗെ കൽബുർഗി. താൻ മന്ത്രിസ്ഥാനത്ത് തുടരുന്നിടത്തോളം കാലം ആർഎസ്എസ് റൂട്ട് മാർച്ചുകൾ നടത്തുന്നതിന് മുൻകൂട്ടി കൃത്യമായ അനുമതി വാങ്ങിയിരിക്കണമെന്നാണ് അദ്ദേഹം വ്യക്തമാക്കിയത്. മുൻകാലങ്ങളിൽ ആർഎസ്എസ് തങ്ങളുടെ പരിപാടികളെക്കുറിച്ച് ഭരണകൂടത്തെയും പോലീസിനെയും മുൻകൂട്ടി അറിയിക്കുക മാത്രമായിരുന്നു ചെയ്തിരുന്നത്. എന്നാൽ ഇനി മുതൽ വെറുമൊരു അറിയിപ്പ് പോരാ, മറിച്ച് കൃത്യമായി അപേക്ഷിച്ച് മുൻകൂർ അനുമതി തന്നെ നേടിയിരിക്കണമെന്ന് അദ്ദേഹം വ്യക്തമാക്കി.
ബെംഗളൂരുവിലെ ചിന്നസ്വാമി സ്റ്റേഡിയത്തിന് പുറത്ത് ഐപിഎൽ വിജയാഘോഷത്തിനിടെ ഉണ്ടായ തിക്കും തിരക്കും തുടർന്നുണ്ടായ സംഭവങ്ങൾക്കും ശേഷം, വലിയ ജനക്കൂട്ടം പങ്കെടുക്കുന്ന പരിപാടികൾക്ക് കൃത്യമായ അനുമതി വാങ്ങേണ്ടതുണ്ടെന്ന് കർണാടക സർക്കാർ ഹൈക്കോടതിയെ അറിയിച്ചിരുന്നു. ഇത് ചൂണ്ടിക്കാണിച്ചാണ് മന്ത്രി പ്രിയങ്ക് ഖാർഗെ നിലപാട് വ്യക്തമാക്കിയത്. അനുമതിക്കായി അവർ അപേക്ഷിക്കട്ടെ എന്നും, പ്രാദേശിക സാഹചര്യങ്ങളും ക്രമസമാധാന നിലയും വിലയിരുത്തി അനുമതി നൽകണോ വേണ്ടയോ എന്ന് ഭരണകൂടം തീരുമാനിക്കുമെന്നും അദ്ദേഹം കൂട്ടിച്ചേർത്തു.
മുൻപ് കൽബുർഗി ജില്ലയിലെ ചിത്താപ്പൂരിൽ ആർഎസ്എസ് റൂട്ട് മാർച്ചിന് അനുമതി നിഷേധിച്ചതും പിന്നീട് കർശന നിബന്ധനകളോടെ കോടതി ഇടപെടലിലൂടെ അത് നടത്തിയതും വലിയ രാഷ്ട്രീയ തർക്കങ്ങൾക്ക് കാരണമായിരുന്നു. ആർഎസ്എസ് ഒരു രജിസ്റ്റർ ചെയ്ത സംഘടനയല്ലെന്നും, പൊതുസ്ഥലങ്ങളിൽ ആയുധങ്ങളോ വടികളോ ഏന്തി ഇത്തരം മാർച്ചുകൾ നടത്തുന്നത് പൊതുജനങ്ങൾക്കിടയിൽ ഭീതിയുണ്ടാക്കുമെന്നും മന്ത്രി മുൻപും ആരോപിച്ചിരുന്നു. കൂടാതെ, ആർഎസ്എസ് മേധാവി മോഹൻ ഭാഗവത് അടുത്തിടെ ബെംഗളൂരുവിലെ ജയനഗറിൽ എത്തിയപ്പോൾ പരിപാടിക്കായി മുൻകൂട്ടി അനുമതി വാങ്ങിയിരുന്നതായും മന്ത്രി ചൂണ്ടിക്കാണിച്ചു. നിയമം എല്ലാവർക്കും ഒരേപോലെ ബാധകമാണെന്നും ആർക്കും പ്രത്യേക പരിഗണന നൽകാനാകില്ലെന്നും പ്രിയങ്ക് ഖാർഗെ ആവർത്തിച്ചു വ്യക്തമാക്കി.
