‘അർജുൻ ആയങ്കി സിപിഎമ്മുകാരനല്ല; അയാളെ പിന്തുണയ്ക്കുന്നവർ പാർട്ടി പ്രവർത്തകരല്ല’- തള്ളിപ്പറഞ്ഞ് ഇ.പി ജയരാജൻ

കണ്ണൂർ: അർജുൻ ആയങ്കിക്ക് സിപിഎമ്മുമായി യാതൊരു ബന്ധവുമില്ലെന്നും അയാളെ സോഷ്യൽ മീഡിയയിൽ പിന്തുണയ്ക്കുന്നവർ പാർട്ടി പ്രവർത്തകരല്ലെന്നും സിപിഎം കേന്ദ്ര കമ്മിറ്റി അംഗം ഇ.പി ജയരാജൻ. കണ്ണൂരിൽ നടന്ന കർഷക തൊഴിലാളി യൂണിയന്റെ ഹെഡ് പോസ്റ്റ് ഓഫീസ് ഉപരോധ സമരം ഉദ്ഘാടനം ചെയ്ത് മാധ്യമങ്ങളോട് സംസാരിക്കുകയായിരുന്നു അദ്ദേഹം.

വിവിധ ക്രിമിനൽ കേസുകളിൽ പ്രതിയായ അർജുൻ ആയങ്കിയുടെ അറസ്റ്റ് മാധ്യമങ്ങൾ അസാധാരണ സംഭവമാക്കി ചിത്രീകരിക്കുകയാണെന്ന് അദ്ദേഹം കുറ്റപ്പെടുത്തി. സോഷ്യൽ മീഡിയയിൽ അർജുൻ ആയങ്കിക്ക് ലഭിക്കുന്ന പിന്തുണയ്ക്ക് പിന്നിൽ കൃത്യമായ പദ്ധതികളും ശൃംഖലകളുടെ ഏകോപനവുമാണ് പ്രവർത്തിക്കുന്നത്. ഇതിന്റെ ഭാഗമായി പ്രചരിക്കുന്ന ലക്ഷങ്ങളുടെ കണക്കുകൾ തികച്ചും തെറ്റായ വിവരങ്ങളാണെന്നും ഇ.പി ജയരാജൻ ആരോപിച്ചു. സിപിഎമ്മിനെക്കുറിച്ച് വ്യക്തമായ ധാരണയുള്ളവരാണ് മലയാളി സമൂഹം. അതിനാൽ സോഷ്യൽ മീഡിയയിലെ ഇത്തരം പിന്തുണക്കാരെ സിപിഎം പ്രവർത്തകരായി കണക്കാക്കാനാകില്ല.

ടി.ജി മോഹൻദാസിന്റെ അറസ്റ്റ് മറ്റ് വഴികളില്ലാതെ സർക്കാർ ചെയ്തതാണെന്നും, അറസ്റ്റ് നടന്നിരുന്നില്ലെങ്കിൽ ജനങ്ങളിൽ നിന്ന് ശക്തമായ പ്രതിഷേധം ഉയർന്നുവന്നേനേയെന്നും അദ്ദേഹം കൂട്ടിച്ചേർത്തു. കേരള പൊലീസ് പവർഫുൾ ആണെന്നത് എല്ലാവർക്കും അറിയാവുന്ന കാര്യമാണെന്നും, ഇപ്പോൾ അതിൽ മാറ്റം വന്നിട്ടുണ്ടോ എന്ന് തനിക്കറിയില്ലെന്നും മാധ്യമപ്രവർത്തകരുടെ ചോദ്യത്തിന് മറുപടിയായി അദ്ദേഹം പറഞ്ഞു.