ഉച്ചകഴിഞ്ഞുള്ള തളർച്ച നിസ്സാരമല്ല; വില്ലൻ വിറ്റാമിൻ കുറവാകാം, ശ്രദ്ധിക്കേണ്ട കാര്യങ്ങൾ

രാത്രിയിൽ ആവശ്യത്തിന് ഉറക്കം ലഭിച്ചിട്ടും ഉച്ചകഴിയുമ്പോൾ വിട്ടുമാറാത്ത ക്ഷീണവും ഉറക്കവും നിങ്ങളെ അലട്ടുന്നുണ്ടോ? എങ്കിൽ അത് കേവലം ജോലിത്തിരക്ക് കൊണ്ടുള്ള തളർച്ചയല്ലെന്നും, വിറ്റാമിൻ ഡിയുടെ കുറവാകാം കാരണമെന്നും ആരോഗ്യ വിദഗ്ധർ മുന്നറിയിപ്പ് നൽകുന്നു. ഇന്ത്യയിലെ നഗരവാസികളിൽ 70 ശതമാനത്തിലധികം പേരും നേരിടുന്ന ഈ നിശബ്ദ ആരോഗ്യപ്രശ്‌നം പലപ്പോഴും തിരിച്ചറിയപ്പെടാതെ പോകുകയാണ് പതിവ്. ശരീരത്തിന്റെ ഊർജ്ജനിലയും മാനസിക ഉന്മേഷവും നിലനിർത്തുന്നതിൽ വിറ്റാമിൻ ഡി നിർണ്ണായക പങ്ക് വഹിക്കുന്നുണ്ടെന്ന് പ്രമുഖ ആരോഗ്യ വിദഗ്ധയായ ഡോ. ശോഭന വൈഷ്ണവി ചൂണ്ടിക്കാട്ടുന്നു.

എന്തുകൊണ്ട് വിറ്റാമിൻ ഡി?

ശരീരത്തിലെ ഓരോ കോശത്തിലും ഊർജ്ജം ഉൽപ്പാദിപ്പിക്കുന്ന ‘പവർ ഹൗസുകളായ’ മൈറ്റോകോൺഡ്രിയയുടെ (Mitochondria) പ്രവർത്തനത്തിന് വിറ്റാമിൻ ഡി അത്യാവശ്യമാണ്. ശരീരത്തിന്റെ ‘ഊർജ്ജ കറൻസി’ എന്നറിയപ്പെടുന്ന എടിപി നിർമ്മാണത്തിന് വിറ്റാമിൻ ഡി സഹായിക്കുന്നു. ഇതിന്റെ അളവ് കുറയുമ്പോൾ കോശങ്ങളുടെ പ്രവർത്തനം മന്ദഗതിയിലാവുകയും ഊർജ്ജ ഉൽപ്പാദനം കുറയുകയും ചെയ്യുന്നു. ഇത് പേശികളെയും മസ്തിഷ്‌കത്തെയും നേരിട്ട് ബാധിക്കുന്നതിനാലാണ് ഉച്ചസമയങ്ങളിൽ അമിതമായ ആലസ്യവും ഉറക്കവും അനുഭവപ്പെടുന്നത്. കൂടാതെ, സന്തോഷം നൽകുന്ന സെറോടോണിൻ, ഉറക്കത്തെ നിയന്ത്രിക്കുന്ന മെലാടോണിൻ എന്നീ ഹോർമോണുകളുടെ സന്തുലിതാവസ്ഥയെയും ഇത് ബാധിക്കുന്നു.

ഇന്ത്യയിലെ സാഹചര്യം

ധാരാളം സൂര്യപ്രകാശം ലഭിക്കുന്ന രാജ്യമാണെങ്കിലും, നഗരങ്ങളിലെ 70 ശതമാനത്തോളം ആളുകളിൽ വിറ്റാമിൻ ഡി അളവ് കുറവാണെന്നാണ് പഠനങ്ങൾ പറയുന്നത്. പകൽ മുഴുവൻ വീടിനുള്ളിലോ എസി ഓഫീസുകളിലോ ചിലവഴിക്കുന്നത് ഇതിന്റെ പ്രധാന കാരണമാണ്. അന്തരീക്ഷ മലിനീകരണം കാരണം സൂര്യരശ്മികൾ ചർമ്മത്തിൽ നേരിട്ട് ഏൽക്കാത്തതും സൺസ്‌ക്രീനുകളുടെ അമിത ഉപയോഗവും വെയിൽ ഒഴിവാക്കുന്ന ശീലങ്ങളും സ്ഥിതി ഗുരുതരമാക്കുന്നു. സാധാരണഗതിയിൽ ഉച്ചയ്ക്ക് 2 മണിക്കും 4 മണിക്കും ഇടയിൽ അനുഭവപ്പെടുന്ന സ്വാഭാവികമായ മന്ദത വിറ്റാമിൻ ഡി കുറവുള്ളവരിൽ അതിരൂക്ഷമാകും.

പരിഹാര മാർഗ്ഗങ്ങൾ

ഉച്ചഭക്ഷണത്തിൽ അമിതമായി കാർബോഹൈഡ്രേറ്റ് (ചോറ് പോലുള്ളവ) ഉൾപ്പെടുത്തുന്നതും നിർജ്ജലീകരണവും ക്ഷീണം വർദ്ധിപ്പിക്കും. ഈ പ്രശ്‌നം പരിഹരിക്കാൻ ഡോക്ടർമാർ നിർദ്ദേശിക്കുന്ന മാർഗ്ഗങ്ങൾ ഇവയാണ്:

രക്തപരിശോധന: വിറ്റാമിൻ ഡി അളവ് മനസ്സിലാക്കി (20-50 ng/mL ആണ് സാധാരണ അളവ്) ഡോക്ടറുടെ നിർദ്ദേശപ്രകാരം മാത്രം സപ്ലിമെന്റുകൾ സ്വീകരിക്കുക.

സൂര്യപ്രകാശം: ആഴ്ചയിൽ കുറഞ്ഞത് മൂന്ന് തവണയെങ്കിലും 1520 മിനിറ്റ് നേരം ഇളം വെയിൽ കൊള്ളുക.

ഭക്ഷണക്രമം: മുട്ടയുടെ മഞ്ഞക്കരു, കൊഴുപ്പുള്ള മത്സ്യം, കൂൺ തുടങ്ങിയവ ഭക്ഷണത്തിൽ ഉൾപ്പെടുത്തുക.

ജീവിതശൈലി: ഉച്ചഭക്ഷണത്തിന് ശേഷം 10 മിനിറ്റ് ലഘുവായി നടക്കുന്നത് രക്തയോട്ടം വർദ്ധിപ്പിക്കാനും മന്ദത ഒഴിവാക്കാനും സഹായിക്കും.

കൂടുതൽ ഉറങ്ങിയതുകൊണ്ട് മാത്രം വിറ്റാമിൻ ഡി കുറവ് പരിഹരിക്കാനാവില്ലെന്നും കൃത്യമായ ചികിത്സയും ഭക്ഷണരീതിയും അത്യാവശ്യമാണെന്നും വിദഗ്ധർ ഓർമ്മിപ്പിക്കുന്നു.