‘ഇത് ഫലസ്തീനാണ്, ഞങ്ങൾ ഇവിടെ താമസിക്കുന്നവരും; കുടിയേറി വന്ന നിങ്ങളെന്തിനാണ് എന്നോട് ഇറങ്ങിപ്പോകാൻ പറയുന്നത്’; ഇസ്രയേൽ സൈന്യത്തോട് കയർത്ത് യുവതി

വെസ്റ്റ് ബാങ്ക്: ഹെബ്രോൺ നഗരത്തിലെ ‘ഓൾഡ് സിറ്റിയിൽ’ നിന്ന് തോക്കു ചൂണ്ടി പുറത്താക്കിയ ഇസ്രയേൽ സൈന്യത്തോട് പ്രതിഷേധിച്ച് ഫലസ്തീൻ യുവതി. ‘ഞങ്ങൾ ഫലസ്തീനികൾ ഇവിടെ താമസിക്കുന്നവരാണ്, കുടിയേറി വന്ന നിങ്ങൾ എന്തിനാണ് ഞങ്ങളോട് ഇറങ്ങിപ്പോവാൻ പറയുന്നതെന്നും അവർ ചോദിച്ചു. ആക്ടിവിസ്റ്റും കണ്ടന്റ് ക്രിയേറ്ററുമായ ഷൈമ യൂസഫാണ് തന്നെ സൈന്യം പുറത്താക്കുന്ന ദൃശ്യങ്ങൾ ഇൻസ്റ്റഗ്രാമിലൂടെ പുറത്തുവിട്ടത്. കുടിയേറ്റം നടത്തിയവർ ഇസ്രായേലി സൈനികരുടെ സാന്നിധ്യത്തിലും അവരുടെ സംരക്ഷണത്തിലുമാണ് ഫലസ്തീനികളെ ആക്രമിക്കുന്നതെന്ന് അവർ ആരോപിച്ചു.

വെസ്റ്റ് ബാങ്കിലെ ഏറ്റവും കൂടുതൽ തർക്കങ്ങൾ നിലനിൽക്കുന്ന നഗരങ്ങളിലൊന്നാണ് ഹെബ്രോൺ. ഇവിടുത്തെ പഴയ നഗരത്തിൽ വലിയൊരു വിഭാഗം വരുന്ന ഫലസ്തീനികൾക്കിടയിലാണ് ചെറിയൊരു വിഭാഗം ഇസ്രായേലി സെറ്റിൽമെന്റുകാർ താമസിക്കുന്നത്. ഈ പ്രദേശം പൂർണമായും ഇസ്രയേലി സൈനിക നിയന്ത്രണത്തിലാണ്. സെറ്റിൽമെന്റുകാരുടെ അക്രമങ്ങളും, വസ്തുവകകളെച്ചൊല്ലിയുള്ള തർക്കങ്ങളും, പലസ്തീനികളുടെ സഞ്ചാര സ്വാതന്ത്ര്യത്തിന്മേലുള്ള നിയന്ത്രണങ്ങളും സംബന്ധിച്ച റിപ്പോർട്ടുകൾ മനുഷ്യാവകാശ സംഘടനകൾ നിരന്തരം പുറത്തുവിടാറുണ്ട്. ഫലസ്തീനികൾക്ക് നേരെയുള്ള ഇത്തരം ആക്രമണങ്ങൾക്ക് സൈന്യം കൂട്ടുനിൽക്കുകയാണെന്നും ആരോപണങ്ങളുണ്ട്. ഞങ്ങളുടെ വീടുകൾ ഉപേക്ഷിച്ച് പോകാൻ നിർബന്ധിതരാക്കുന്നതിനാണ് ഇത്തരം ആക്രമണങ്ങൾ നടത്തുന്നതെന്ന് ഫലസ്തീനികൾ അഭിപ്രായപ്പെട്ടു.

‘2026 മെയ് രണ്ടിന് ഇസ്രായേൽ സൈനികരുടെ സംരക്ഷണത്തിൽ ഹെബ്രോണിലെ പഴയ നഗരത്തിൽ ഇസ്രായേലി സെറ്റിൽമെന്റുകാർ നടത്തിയ ആക്രമണങ്ങൾ. ഫലസ്തീനികളുടെ ജീവിതം ഇവിടെ നിശ്ചലമാകുന്നു…’ എന്നാണ് ഷൈമ പങ്കുവെച്ച വീഡിയോയുടെ താഴെ നൽകിയിരിക്കുന്ന അടിക്കുറിപ്പ്. വീഡിയോക്ക് താഴെ നിരവധി പേർ യുവതിയുടെ ധീരതയെ പ്രശംസിക്കുകയും ഇസ്രയേൽ സൈന്യത്തിന്റെ പ്രവർത്തിയിൽ അപലപിക്കുകയും ചെയ്തു.

ഹെബ്രോണിൽ തുടർന്നുകൊണ്ടിരിക്കുന്ന സംഘർഷങ്ങളുടെ മറ്റൊരു മുഖമാണ് ഈ സംഭവം. പഴയ നഗരത്തിലെ പലസ്തീൻ കുടുംബങ്ങൾ സെറ്റിൽമെന്റുകാരിൽ നിന്നും നിരന്തരം ശല്യപ്പെടുത്തലുകളും, കല്ലേറുകളും, ശാരീരിക ആക്രമണങ്ങളും നേരിടുന്നതായി പരാതിപ്പെടുമ്പോൾ, തങ്ങളുടെ സുരക്ഷയ്ക്കും അവിടുത്തെ ജൂത സമൂഹത്തെ സംരക്ഷിക്കുന്നതിനുമായാണ് കർശന നടപടികൾ സ്വീകരിക്കുന്നതെന്നാണ് ഇസ്രായേൽ അധികൃതർ പറയുന്നത്. കാര്യങ്ങൾ നേരിട്ട് വിലയിരുത്തുന്നതിനുള്ള നിയന്ത്രണങ്ങളും, വ്യത്യസ്തമായ അഭിപ്രായങ്ങളും കാരണം ഇത്തരം വീഡിയോകളിലെ അവകാശവാദങ്ങളുടെ സത്യാവസ്ഥ സ്വതന്ത്രമായി അന്വേഷിച്ച് കണ്ടെത്തുക എന്നത് വളരെ ബുദ്ധിമുട്ടുള്ള കാര്യമാണ്. വെസ്റ്റ് ബാങ്കിലെ സാഹചര്യങ്ങളെക്കുറിച്ച് റിപ്പോർട്ട് ചെയ്യുമ്പോൾ മനുഷ്യാവകാശ സംഘടനകളും മാധ്യമങ്ങളും പലപ്പോഴും ആശ്രയിക്കുന്ന സിറ്റിസൺ ജേണലിസത്തിന്റെ വലിയൊരു നിരയിലേക്കാണ് ഷൈമ യൂസഫിന്റെ ഈ വീഡിയോയും കൂട്ടിച്ചേർക്കപ്പെടുന്നത്.