‘ലീഗിന്റെ ആഭ്യന്തര കാര്യങ്ങളിൽ കോൺഗ്രസ് ഇടപെടാറില്ല, തിരിച്ചും അങ്ങനെയാകണം’; മാത്യു കുഴൽനാടൻ
തിരുവനന്തപുരം: മുസ്ലിം ലീഗ് യുഡിഎഫിന്റെ നട്ടെല്ലാണെന്നും അവരുടെ ആഭ്യന്തര കാര്യങ്ങളിൽ കോൺഗ്രസ് ഇടപെടാറില്ലെന്നും മാത്യു കുഴൽനാടൻ എംഎൽഎ. മുഖ്യമന്ത്രി ചർച്ചകളുമായി ബന്ധപ്പെട്ട വിവാദങ്ങൾക്കിടെയാണ് മുന്നണിയിലെ കെട്ടുറപ്പിനെക്കുറിച്ച് അദ്ദേഹം മാധ്യമങ്ങളോട് സംസാരിച്ചത്.
യുഡിഎഫ് പ്രതിസന്ധി നേരിട്ടപ്പോഴെല്ലാം മുന്നണിയുടെ ഐക്യത്തിനായി ലീഗ് മുന്നിട്ടിറങ്ങിയിട്ടുണ്ടെന്ന് അദ്ദേഹം അനുസ്മരിച്ചു. ലീഗ് നേതാക്കൾക്കെതിരെ രാഷ്ട്രീയ ആക്രമണങ്ങൾ ഉണ്ടായപ്പോൾ കോൺഗ്രസ് പ്രതിരോധം തീർത്തിട്ടുണ്ട്. ഇരുപാർട്ടികളും സഹോദരങ്ങളെപ്പോലെയാണ് പ്രവർത്തിക്കുന്നത്. ലീഗിന്റെ നിയമസഭാ കക്ഷി നേതാവിനെ കോൺഗ്രസ് നിശ്ചയിക്കാറില്ലെന്നും മുന്നണിയിലെ ആശയവിനിമയങ്ങളെ തെറ്റായി ചിത്രീകരിക്കരുതെന്നും അദ്ദേഹം കൂട്ടിച്ചേർത്തു.
പാർട്ടി തീരുമാനിക്കുന്ന ആൾ തന്നെ മുഖ്യമന്ത്രിയാകുമെന്നും ജനാധിപത്യപരമായ രീതിയിൽ ഉചിതമായ തീരുമാനം ഉണ്ടാകുമെന്നും അദ്ദേഹം വ്യക്തമാക്കി. പരസ്പര ധാരണയോടെ മുന്നോട്ട് പോകണമെന്നും കോൺഗ്രസിനുള്ളിൽ ഒരു പ്രതിസന്ധിയുമില്ലെന്നും കുഴൽനാടൻ പറഞ്ഞു.
