‘രാഷ്ട്രീയ തിരക്കുകൾ കുറഞ്ഞു’; ഉദയനിധി സ്റ്റാലിൻ വീണ്ടും സിനിമയിലേക്ക്?
ചെന്നൈ: തമിഴ്നാട് മുൻ ഉപമുഖ്യമന്ത്രിയും നിലവിലെ പ്രതിപക്ഷ നേതാവുമായ ഉദയനിധി സ്റ്റാലിൻ അഭിനയ രംഗത്തേക്ക് തിരികെ വരുന്നതായി റിപ്പോർട്ടുകൾ. മന്ത്രിയെന്ന നിലയിലുള്ള തിരക്കുകളും ഉത്തരവാദിത്വങ്ങളും കുറഞ്ഞ സാഹചര്യത്തിലാണ് അദ്ദേഹം വീണ്ടും സിനിമയിൽ ശ്രദ്ധ കേന്ദ്രീകരിക്കാൻ ഒരുങ്ങുന്നത്. വൈകാതെ തന്നെ ഇതിനെക്കുറിച്ചുള്ള ഔദ്യോഗിക പ്രഖ്യാപനം ഉണ്ടായേക്കുമെന്നാണ് അദ്ദേഹവുമായി അടുത്ത വൃത്തങ്ങൾ നൽകുന്ന സൂചന.
ഇതുവരെ 15 ചിത്രങ്ങളിൽ നായകനായിട്ടുള്ള ഉദയനിധിയുടെ അവസാന ചിത്രം ബോക്സ് ഓഫീസ് വിജയവും നിരൂപക പ്രശംസയും നേടിയ ‘മാമന്നൻ’ ആയിരുന്നു. ഈ ചിത്രത്തിന് ശേഷം രാഷ്ട്രീയത്തിൽ സജീവമാകുന്നതിനായി അഭിനയ രംഗത്തുനിന്ന് താൽക്കാലികമായി വിട്ടുനിൽക്കുകയാണെന്ന് അദ്ദേഹം പ്രഖ്യാപിച്ചിരുന്നു. തുടർന്ന് നടന്ന നിയമസഭാ തെരഞ്ഞെടുപ്പിൽ വിജയിച്ചെങ്കിലും ഡിഎംകെ സർക്കാരിന് ഭരണം നിലനിർത്താൻ സാധിച്ചില്ല. നിലവിൽ പ്രതിപക്ഷ നേതാവായി തുടരുന്ന ഉദയനിധി, രാഷ്ട്രീയ ചുമതലകൾക്കൊപ്പം സിനിമാ തിരക്കുകളിലേക്കും മടങ്ങാൻ താല്പര്യം പ്രകടിപ്പിച്ചതായാണ് വിവരം.
