‘തമിഴ്നാട്ടിൽ ഇനി എസി സർക്കാർ ബസുകൾ മാത്രം മതിയെന്ന് മുഖ്യമന്ത്രി’; ഗതാഗത മന്ത്രി
ചെന്നൈ: തമിഴ്നാട് സർക്കാർ ഇനി മുതൽ എസി ബസുകൾ മാത്രമേ വാങ്ങുകയുള്ളൂവെന്ന് മുഖ്യമന്ത്രി വിജയ് വ്യക്തമാക്കിയതായി ഗതാഗത മന്ത്രി വിജയ് തമിഴൻ പാർഥിബൻ അറിയിച്ചു. പൊതുജനങ്ങൾക്ക് കൂടുതൽ സൗകര്യപ്രദവും സുഖകരവുമായ യാത്രാ സൗകര്യം ഉറപ്പാക്കുകയാണ് സർക്കാരിന്റെ ലക്ഷ്യമെന്നും അദ്ദേഹം കൂട്ടിച്ചേർത്തു. ഞായറാഴ്ച സേലത്ത് വെച്ച് നടന്ന ടിവികെയുടെ പരിപാടിയിൽ സംസാരിക്കുകയായിരുന്നു അദ്ദേഹം.
സംസ്ഥാനത്തെ വിദൂര പ്രദേശങ്ങളെപ്പോലും ബസ് ശൃംഖല വഴി ബന്ധിപ്പിക്കണമെന്നാണ് സർക്കാരിന്റെ നിലപാട്. മുഖ്യമന്ത്രി ഉൾപ്പെടെയുള്ള എല്ലാ വ്യക്തികൾക്കും സുഖകരമായി യാത്ര ചെയ്യാൻ ആവശ്യമായ സൗകര്യങ്ങൾ ബസുകളിൽ ഉണ്ടായിരിക്കണമെന്നും മന്ത്രി പറഞ്ഞു. അടുത്തിടെ മുഖ്യമന്ത്രി വിജയ് ഒരു സർക്കാർ ബസിൽ യാത്ര ചെയ്തപ്പോഴാണ്, ഇനി വാങ്ങുന്ന പുതിയ വാഹനങ്ങളിലെല്ലാം എയർ കണ്ടീഷനിങ് സൗകര്യം ഉണ്ടായിരിക്കണമെന്ന ആഗ്രഹം പങ്കുവെച്ചത്.
കഴിഞ്ഞ ആഴ്ച 127.21 കോടി രൂപ ചെലവിൽ വാങ്ങിയ 300 പുതിയ ബസുകൾ മുഖ്യമന്ത്രി ഫ്ലാഗ് ഓഫ് ചെയ്തിരുന്നു. ഇതിൽ 164 ഡീസൽ ബസുകളും 136 ബിഎസ്-VI സിഎൻജി ബസുകളുമാണുള്ളത്. യാത്രാക്ലേശം പരിഹരിക്കുന്നതിനായി കോയമ്പേട്, കിളമ്പാക്കം തുടങ്ങിയ പ്രധാന ഗതാഗത കേന്ദ്രങ്ങളിൽ നിന്നാണ് ഈ പുതിയ വാഹനങ്ങൾ നിലവിൽ സർവീസ് നടത്തുന്നത്.
