കോഴിക്കോട് പാളയത്ത് യുവാവ് രക്തം വാർന്ന് മരിച്ച നിലയിൽ; കൊലപാതകമെന്ന് സംശയം

കോഴിക്കോട്: പാളയത്ത് യുവാവിനെ വീടിനുള്ളിൽ രക്തം വാർന്ന് മരിച്ച നിലയിൽ കണ്ടെത്തി. പുതിയ കോവിലകം പറമ്പ് നഗർ സ്വദേശി ബിജുവാണ് മരണപ്പെട്ടത്. ബിജുവിന്റെ കിടപ്പുമുറിയിലാണ് മൃതദേഹം കാണപ്പെട്ടത്. സംഭവം കൊലപാതകമാണെന്നാണ് പ്രാഥമിക സംശയം.

ഇന്ന് പുലർച്ചെ മൂന്ന് മണിയോടെ പാൽ കറക്കുന്നതിനായി ബിജുവിനെ വിളിക്കാൻ പോയ മാതാവാണ് മൃതദേഹം ആദ്യം കണ്ടത്. ബിജു കിടന്നിരുന്ന മുറി പുറത്തുനിന്ന് പൂട്ടിയ നിലയിലായിരുന്നു. ഇതോടെ സംശയം തോന്നിയ അമ്മ വാതിൽ തുറന്ന് നോക്കിയപ്പോഴാണ് ബിജുവിനെ കട്ടിലിൽ ചലനമറ്റ നിലയിൽ കണ്ടെത്തിയത്. കട്ടിലിന് താഴെ വലിയ തോതിൽ രക്തം തളംകെട്ടി നിന്നിരുന്നു.

ലഹരി സംഘങ്ങൾ സജീവമായതിനെ തുടർന്ന് പൊലീസ് നിരന്തരം നിരീക്ഷണം നടത്തുന്ന പ്രദേശമാണിത്. പ്രദേശത്തെ ലഹരി സംഘങ്ങളിൽ പെട്ട ആരെങ്കിലും ബിജുവിനെ വകവരുത്തിയതാണോ എന്നതടക്കമുള്ള സംശയങ്ങൾ വീട്ടുകാർ പങ്കുവെക്കുന്നുണ്ട്. സംഭവത്തിൽ പൊലീസ് കേസ് രജിസ്റ്റർ ചെയ്ത് അന്വേഷണം ആരംഭിച്ചിട്ടുണ്ട്.