‘3 മാസം മുൻപേ എസ്.ബി.ഐ എല്ലാ തട്ടിപ്പും അറിഞ്ഞു; മുന്നറിയിപ്പുകൾ രാമക്ഷേത്ര ട്രസ്റ്റ് തള്ളി’ | Ram Mandir Donation Theft

ലഖ്‌നൗ: രാജ്യത്തെമ്പാടുമുള്ള ഭക്തർ അയോധ്യയിലെ ശ്രീരാമ ജന്മഭൂമി തീർത്ഥക്ഷേത്രത്തിലേക്ക് സമർപ്പിച്ച കോടിക്കണക്കിന് രൂപയുടെ സംഭാവനയിലും കാണിക്കയിലും വൻ ക്രമക്കേട് നടന്നതായുള്ള വിവരങ്ങൾ പുറത്തുവന്നതിന് പിന്നാലെ, കേസിൽ പുതിയ വെളിപ്പെടുത്തലുകൾ(Ram Mandir Donation Theft). ക്ഷേത്രത്തിലെ പണം എണ്ണുന്ന കേന്ദ്രത്തിലെ ജീവനക്കാരുടെ ഭാഗത്തുനിന്നു ഗുരുതരമായ വീഴ്ചകളും സംശയകരമായ നീക്കങ്ങളും നടക്കുന്നതായി സ്റ്റേറ്റ് ബാങ്ക് ഓഫ് ഇന്ത്യ(എസ്.ബി.ഐ) മൂന്ന് മാസം മുൻപ് തന്നെ മുന്നറിയിപ്പ് നൽകിയിരുന്നുവെന്നാണ് പുതിയ റിപ്പോർട്ടുകൾ വ്യക്തമാക്കുന്നത്. എന്നാൽ, ഈ ജീവനക്കാരെ മാറ്റണമെന്ന ബാങ്കിന്റെ നിർദേതശം, രാമക്ഷേത്ര തീർത്ഥക്ഷേത്ര ട്രസ്റ്റുമായി ബന്ധപ്പെട്ട പ്രമുഖർ ഇടപെട്ട് മരവിപ്പിക്കുകയായിരുന്നുവെന്ന് ‘ഇന്ത്യ ടുഡേ’ റിപ്പോർട്ട് ചെയ്തു.

തട്ടിപ്പുമായി ബന്ധപ്പെട്ട് ഉത്തർപ്രദേശ് സർക്കാർ രൂപീകരിച്ച പ്രത്യേക അന്വേഷണ സംഘം(എസ്.ഐ.ടി) എട്ട് പേരെ അറസ്റ്റ് ചെയ്തതോടെയാണ് സംഭാവന കുംഭകോണത്തിന്റെ ആഴം വ്യക്തമായത്. ഇതിന് പിന്നാലെ ഉയർന്ന രാഷ്ട്രീയ വിവാദങ്ങളും രാമക്ഷേത്ര ട്രസ്റ്റിന്റെ വിശ്വാസ്യതയെ ചോദ്യം ചെയ്യുന്ന രീതിയിലുള്ള വെളിപ്പെടുത്തലുകളും ഉത്തർപ്രദേശ് രാഷ്ട്രീയത്തിലും ദേശീയതലത്തിലും വൻ കൊടുങ്കാറ്റാണ് സൃഷ്ടിച്ചിരിക്കുന്നത്.

എസ്.ബി.ഐയുടെ മുന്നറിയിപ്പും ട്രസ്റ്റിന്റെ ഇടപെടലും | Ram Mandir Donation Theft

അയോധ്യ രാമക്ഷേത്രത്തിലെ കാണിക്ക വഞ്ചികളിൽനിന്നും സംഭാവന പെട്ടികളിൽനിന്നും ലഭിക്കുന്ന പണം, സ്വർണം, മറ്റ് വിലപിടിപ്പുള്ള വസ്തുക്കൾ എന്നിവ എണ്ണി തിട്ടപ്പെടുത്തുന്നതിനായി എസ്.ബി.ഐ ഒരു ഔട്ട്‌സോഴ്‌സിങ് ഏജൻസി വഴിയാണ് ജീവനക്കാരെ നിയമിച്ചിരുന്നത്. മാസം 12,000 രൂപ മുതൽ 15,000 രൂപ വരെ ശമ്പളം വാങ്ങിയിരുന്ന താൽക്കാലിക ജീവനക്കാരായിരുന്നു ഇവർ.

എന്നാൽ, ഈ കൗണ്ടിങ് സെന്ററിലെ ചില ജീവനക്കാരുടെ പെരുമാറ്റത്തിലും പണം കൈകാര്യം ചെയ്യുന്ന രീതിയിലും എസ്.ബി.ഐക്ക് മൂന്ന് മാസം മുൻപ് തന്നെ സംശയം തോന്നിയിരുന്നു. പണം കൈകാര്യം ചെയ്യുന്നതിൽ വലിയ രീതിയിലുള്ള സുതാര്യതക്കുറവ് കണ്ടെത്തിയതിനെ തുടർന്ന്, ഈ താൽക്കാലിക ജീവനക്കാരെ മുഴുവൻ അടിയന്തരമായി മാറ്റണമെന്ന് എസ്.ബി.ഐ ഔട്ട്‌സോഴ്‌സിങ് ഏജൻസിയോട് ആവശ്യപ്പെട്ടു. ഏജൻസി ഇതിനായുള്ള നടപടികൾ ആരംഭിച്ചതുമാണ്.

എന്നാൽ, ഈ ഘട്ടത്തിൽ രാമക്ഷേത്ര ട്രസ്റ്റുമായി അടുത്ത ബന്ധമുള്ള ചില ഉന്നത ഉദ്യോഗസ്ഥരും ഭാരവാഹികളും ബാങ്കിന്റെ നീക്കത്തിൽ ഇടപെടുകയും ജീവനക്കാരെ മാറ്റുന്നത് തടയുകയുമായിരുന്നുവെന്നാണു ലഭിക്കുന്ന വിവരങ്ങൾ. ബാങ്കിന്റെ സ്ഥിരം ജീവനക്കാരെ ഉപയോഗിച്ച് പണം എണ്ണുന്നതിന് പകരം എന്തുകൊണ്ടാണ് കുറഞ്ഞ ശമ്പളമുള്ള താൽക്കാലിക ജീവനക്കാരെ ഇതിനായി നിയോഗിച്ചതെന്ന് കാണിച്ച് ക്ഷേത്ര മാനേജ്മെന്റിലെ ചിലർ ബാങ്ക് അധികൃതരെ ചോദ്യം ചെയ്തതായും സൂചനകളുണ്ട്. ട്രസ്റ്റിന്റെ ശക്തമായ സമ്മർദത്തെ തുടർന്ന് എസ്.ബി.ഐക്ക് തങ്ങളുടെ മുന്നറിയിപ്പ് താൽക്കാലികമായി മാറ്റിവയ്‌ക്കേണ്ടി വന്നതായി റിപ്പോർട്ടിൽ പറയുന്നു. ഈ വീഴ്ചയാണ് പിന്നീട് കോടികളുടെ തട്ടിപ്പിലേക്ക് വഴിമാറിയതെന്നാണ് ഇപ്പോൾ വ്യക്തമാക്കുന്നത്.

അന്വേഷണത്തിലേക്ക് നയിച്ച സാഹചര്യങ്ങൾ | Ram Mandir Donation Theft

ക്ഷേത്രത്തിലെ പണമിടപാടുകളിൽ വലിയ കുറവ് വരുന്നത് ശ്രദ്ധയിൽപ്പെട്ടതിനെ തുടർന്ന് ജൂൺ ആദ്യവാരം ട്രസ്റ്റ് തന്നെ ഉത്തർപ്രദേശ് സർക്കാരിനോട് അന്വേഷണത്തിന് അഭ്യർത്ഥിക്കുകയായിരുന്നു. തുടർന്ന് ജൂൺ 13-നാണ് ഉത്തർപ്രദേശ് മുഖ്യമന്ത്രി യോഗി ആദിത്യനാഥിന്റെ നിർദേശപ്രകാരം പ്രത്യേക അന്വേഷണ സംഘം രൂപീകരിച്ചത്.

ബാങ്ക് റെക്കോർഡുകളും കൗണ്ടിങ് സെന്ററിലെയും ഹോട്ടലുകളിലെയും സി.സി.ടി.വി ദൃശ്യങ്ങളും കേന്ദ്രീകരിച്ച് നടത്തിയ പ്രാഥമിക അന്വേഷണത്തിൽ പണം തട്ടിയെടുക്കൽ, വിലപിടിപ്പുള്ള വസ്തുക്കൾ വകമാറ്റൽ എന്നിവ വ്യക്തമായി തെളിഞ്ഞു. ഇതോടെ ജൂൺ 25-ന് പോലീസ് ഔദ്യോഗികമായി എഫ്.ഐ.ആർ രജിസ്റ്റർ ചെയ്യുകയും വിപുലമായ റെക്കോർഡുകൾ പിടിച്ചെടുക്കുകയും ചെയ്തു. തൊട്ടുപിന്നാലെ തട്ടിപ്പിൽ നേരിട്ട് പങ്കുള്ള എട്ട് പേരെ പോലീസ് അറസ്റ്റ് ചെയ്യുകയായിരുന്നു.

അവിനാഷ് ശുക്ല, അനുകൽപ് മിശ്ര, ലവകുഷ് മിശ്ര, മനീഷ് കുമാർ യാദവ്, കരുണേഷ് പാണ്ഡെ, രമാശങ്കർ മിശ്ര, സുഭാഷ് ശ്രീവാസ്തവ, രമാശങ്കർ യാദവ്(തിന്നു യാദവ്) എന്നിങ്ങനെ എട്ടുപേരാണ് കേസിൽ ഇതുവരെ അറസ്റ്റിലായിട്ടുള്ളത്. ഇതിൽ രാമശങ്കർ യാദവ് എന്ന ‘തിന്നു യാദവ്’ ആണ് ഈ വൻ തട്ടിപ്പിന്റെ മുഖ്യസൂത്രധാരനെന്ന് അന്വേഷണ സംഘം കണ്ടെത്തിയിട്ടുണ്ട്.

രാമക്ഷേത്ര തീർത്ഥക്ഷേത്ര ട്രസ്റ്റിന്റെ ജനറൽ സെക്രട്ടറിയായ ചമ്പത് റായിയുടെ സ്വകാര്യ ഡ്രൈവറായിരുന്നു തിന്നു യാദവ്. തന്റെ ഈ സ്വാധീനം ഉപയോഗിച്ചാണ് ഇയാൾ എസ്.ബി.ഐയുടെ ക്യാഷ് കൗണ്ടിങ് യൂണിറ്റിൽ തന്റെ ബന്ധുക്കൾക്കും വിശ്വസ്തർക്കും ജോലി വാങ്ങി നൽകിയത്. പണം എണ്ണുന്ന സമയത്ത് കൃത്രിമം കാട്ടാനും ക്യാമറകളുടെ കണ്ണ് വെട്ടിച്ച് പണം കടത്താനും ഇയാൾ ജീവനക്കാർക്ക് സൗകര്യം ചെയ്തുകൊടുത്തു.

പ്രതികളിൽനിന്ന് ഇതുവരെ ഏകദേശം 80 ലക്ഷത്തോളം രൂപയുടെ ഇന്ത്യൻ കറൻസിയും വിദേശ കറൻസികളും അന്വേഷണ സംഘം കണ്ടെടുത്തു കഴിഞ്ഞു. വിദേശത്തുനിന്നുള്ള ഭക്തർ നൽകിയ സംഭാവനകളും വിദേശ കറൻസികളും വൻതോതിൽ തട്ടിയെടുക്കപ്പെട്ടിട്ടുണ്ടെന്നാണ് ഇത് സൂചിപ്പിക്കുന്നത്.

രാഷ്ട്രീയ കൊടുങ്കാറ്റും ട്രസ്റ്റിലെ രാജിയും | Ram Mandir Donation Theft

വിഷയം പുറത്തുവന്നതോടെ വലിയ രാഷ്ട്രീയ വിവാദമാണ് രാജ്യത്ത് ഉയർന്നിരിക്കുന്നത്. ഭക്തരുടെ വികാരങ്ങളെയും സംഭാവനകളെയും വച്ച് ഒത്തുകളിക്കാൻ അനുവദിക്കില്ലെന്നും കുറ്റക്കാർക്കെതിരെ കർശന നടപടിയുണ്ടാകുമെന്നും ഉത്തർപ്രദേശ് മുഖ്യമന്ത്രി യോഗി ആദിത്യനാഥ് വ്യക്തമാക്കിയെങ്കിലും പ്രതിപക്ഷം സർക്കാരിനും ട്രസ്റ്റിനുമെതിരെ പ്രതിഷേധം തുടരുകയാണ്.

റായ്പൂരിൽ മാധ്യമങ്ങളെ കണ്ട കോൺഗ്രസ് നേതാവ് പവൻ ഖേര ഈ വിഷയത്തിൽ കേന്ദ്ര-സംസ്ഥാന സർക്കാരുകളെ രൂക്ഷമായി വിമർശിച്ചു. ‘മൂന്ന് മാസം മുൻപ് തന്നെ കൗണ്ടിങ് സെന്ററിലെ ജീവനക്കാരെ മാറ്റണമെന്ന് എസ്.ബി.ഐ ഔദ്യോഗികമായി ശിപാർശ ചെയ്തിട്ടും ആർക്കാണ് ഇവരെ സംരക്ഷിക്കേണ്ടി വന്നത്? ആരുടെ തണലിലാണ് ഇത്രയും വലിയ തട്ടിപ്പ് ക്ഷേത്രത്തിനുള്ളിൽ നടന്നത്?’ – പവൻ ഖേര ചോദിച്ചു.

അയോധ്യയിലെ സംഭാവന കുംഭകോണം കേവലമൊരു തുടക്കം മാത്രമാണെന്നും ഇതിന്റെ പിന്നിൽ വലിയ അഴിമതി ശൃംഖല തന്നെയുണ്ടെന്നും അദ്ദേഹം ആരോപിച്ചു. രാജ്യത്തെ സാധാരണക്കാരായ ജനങ്ങളുടെ വിശ്വാസത്തെയും പണത്തെയും സംരക്ഷിക്കുന്നതിൽ സർക്കാർ പരാജയപ്പെട്ടുവെന്ന് രാജ്യസഭാ എം.പി കപിൽ സിബലും കുറ്റപ്പെടുത്തി. ‘അച്ഛേ ദിൻ’ എന്ന വാഗ്ദാനം എത്രത്തോളം പൊള്ളയായിരുന്നുവെന്ന് ഈ തട്ടിപ്പിലൂടെ വ്യക്തമായതായി അദ്ദേഹം പറഞ്ഞു.

ഭക്തർ നൽകിയ 200 കോടിയിലധികം രൂപയുടെ സംഭാവനകൾ വകമാറ്റുകയോ തട്ടിയെടുക്കുകയോ ചെയ്തിട്ടുണ്ടെന്നാണ് പ്രതിപക്ഷ കക്ഷികൾ ആരോപിക്കുന്നത്. വിവാദം ട്രസ്റ്റിന്റെ പ്രതിച്ഛായയെ പൂർണമായി തകർത്തതോടെ വലിയ ആഭ്യന്തര കലഹങ്ങളും ട്രസ്റ്റിനുള്ളിൽ ആരംഭിച്ചിട്ടുണ്ട്. വിവാദത്തിൽ ധാർമിക ഉത്തരവാദിത്തം ഏറ്റെടുത്ത് ട്രസ്റ്റ് ജനറൽ സെക്രട്ടറി ചമ്പത് റായിയും മുതിർന്ന ട്രസ്റ്റ് ഭാരവാഹി അനിൽ മിശ്രയും തങ്ങളുടെ സ്ഥാനങ്ങൾ രാജിവച്ചതായാണ് റിപ്പോർട്ടുകൾ. മുഖ്യപ്രതി ചമ്പത് റായിയുടെ ഡ്രൈവറായതാണ് ഇദ്ദേഹത്തെ പ്രതിക്കൂട്ടിലാക്കുന്നത്.

ബാർ അസോസിയേഷന്റെ കടുത്ത തീരുമാനം | Ram Mandir Donation Theft

തട്ടിപ്പിന്റെ ഗൗരവം കണക്കിലെടുത്ത് അയോധ്യ ബാർ അസോസിയേഷനും ശക്തമായ നിലപാടുമായി രംഗത്തെത്തിയിട്ടുണ്ട്. ഈ മഹാപാതകം ചെയ്ത പ്രതികൾക്കായി അയോധ്യയിലെ ഒരു വക്കീലും കോടതിയിൽ ഹാജരാകരുതെന്ന് ബാർ അസോസിയേഷൻ കർശന നിർദേശം നൽകി. ഈ നിർദേശം ലംഘിച്ച് പ്രതികൾക്കായി വക്കാലത്ത് ഏറ്റെടുക്കുന്ന അഭിഭാഷകരിൽനിന്ന് അഞ്ചു ലക്ഷം രൂപ പിഴ ഈടാക്കുമെന്നും അസോസിയേഷൻ ഭാരവാഹികൾ വ്യക്തമാക്കി.

സംഭവത്തിൽ കൂടുതൽ അന്വേഷണത്തിനായി ബാങ്ക് അക്കൗണ്ടുകളും പ്രതികളുടെ മുൻകാല ഇടപാടുകളും എസ്.ഐ.ടി നിരീക്ഷിച്ചുവരികയാണ്. പണം എവിടെയൊക്കെയാണ് നിക്ഷേപിച്ചിരിക്കുന്നത് എന്നതിനെക്കുറിച്ചും മറ്റ് പ്രമുഖർക്ക് ഇതിൽ പങ്കുണ്ടോ എന്നതിനെക്കുറിച്ചും വരും ദിവസങ്ങളിൽ കൂടുതൽ വിവരങ്ങൾ പുറത്തുവരുമെന്നാണ് സൂചന.