‘ഒരു വിദ്യാർഥിക്ക് സ്വന്തം എക്സാമിനറെ നിയമിക്കാൻ കഴിയില്ല; 2023-ലെ സിഇസി നിയമന ബില്ലിനെ പിന്തുണച്ചതിൽ ഖേദിക്കുന്നു’: ജഗൻ റെഡ്ഡി

അമരാവതി: മുഖ്യ തെരഞ്ഞെടുപ്പ് കമ്മീഷണർ ഉൾപ്പെടെയുള്ളവരുടെ നിയമന നടപടിക്രമങ്ങളിൽ മാറ്റം വരുത്തിയ 2023-ലെ കേന്ദ്ര നിയമനിർമ്മാണത്തെ പിന്തുണച്ചതിൽ ഖേദം പ്രകടിപ്പിച്ച് വൈ.എസ്.ആർ. കോൺഗ്രസ് പാർട്ടി അധ്യക്ഷൻ വൈ.എസ്. ജഗൻ മോഹൻ റെഡ്ഡി. സിഇസി നിയമന പാനലിൽ നിന്ന് സുപ്രീംകോടതി ചീഫ് ജസ്റ്റിസിനെ ഒഴിവാക്കി പകരം കേന്ദ്ര കാബിനറ്റ് മന്ത്രിയെ ഉൾപ്പെടുത്തിയ നിയമത്തെ പാർട്ടി പിന്തുണച്ചത് വലിയ തെറ്റായിപ്പോയെന്ന് അദ്ദേഹം വാർത്താസമ്മേളനത്തിൽ വ്യക്തമാക്കി.

“ഒരു പരീക്ഷകനെ തെരഞ്ഞെടുക്കാൻ വിദ്യാർത്ഥിക്ക് അനുവാദമില്ല. പരീക്ഷകൻ എത്ര സത്യസന്ധനാണെങ്കിലും നിഷ്പക്ഷമായ ഒരു സംവിധാനത്തിലൂടെയല്ല നിയമനമെങ്കിൽ അവർ തീർച്ചയായും വിമർശനങ്ങൾ നേരിടേണ്ടി വരും,” ജഗൻ റെഡ്ഡി ചൂണ്ടിക്കാട്ടി. തെരഞ്ഞെടുപ്പ് കമ്മീഷണർമാരെ ഭരണകക്ഷികൾ നേരിട്ട് നാമനിർദ്ദേശം ചെയ്യുന്ന സാഹചര്യം ഒഴിവാക്കണമെന്നും, നിയമനങ്ങളിൽ സുതാര്യത ഉറപ്പാക്കണമെന്നും അദ്ദേഹം ആവശ്യപ്പെട്ടു.

സംസ്ഥാന തെരഞ്ഞെടുപ്പ് കമ്മീഷണർമാരുടെ നിയമനത്തിലും സമാനമായ പരിഷ്കാരങ്ങൾ വേണമെന്ന് അദ്ദേഹം വാദിച്ചു. സംസ്ഥാന തെരഞ്ഞെടുപ്പ് കമ്മീഷണറെ മുഖ്യമന്ത്രിയോ ഭരണകക്ഷിയോ നിയമിക്കരുത്, മറിച്ച് നിഷ്പക്ഷമായ അതോറിറ്റിയായിരിക്കണം നിയമനം നടത്തേണ്ടതെന്ന് അദ്ദേഹം പറഞ്ഞു.

പാർലമെന്റിൽ നിരന്തരം ബിജെപി സർക്കാരിനെ പിന്തുണച്ചിരുന്ന വൈഎസ്ആർസിപിയുടെ ഈ നിലപാടുമാറ്റം, അവർ ഇന്ത്യ സഖ്യത്തിലേക്ക് അടുത്തേക്കുമെന്ന രാഷ്ട്രീയ ഊഹാപോഹങ്ങൾക്ക് ആക്കം കൂട്ടിയിട്ടുണ്ട്. 2024-ലെ തെരഞ്ഞെടുപ്പ് തിരിച്ചടിക്ക് ശേഷം പാർട്ടി ദേശീയതലത്തിൽ പുതിയ രാഷ്ട്രീയ സമവാക്യങ്ങൾ പര്യവേക്ഷണം ചെയ്യുന്നതിന്റെ സൂചനയായും ഈ നീക്കം വിലയിരുത്തപ്പെടുന്നു.