‘തെരഞ്ഞെടുപ്പ് കമ്മീഷന്റെ ലക്ഷ്യം കേന്ദ്രത്തെ സഹായിക്കൽ’; ഗ്യാനേഷ് കുമാറിന്റെ രാജി ആവശ്യപ്പെട്ട് പ്രശാന്ത് കിഷോർ
സമസ്തിപൂർ: വോട്ടർ പട്ടികയുടെ പ്രത്യേക തീവ്ര പരിഷ്കരണത്തിന് (എസ്ഐആർ) അപ്പുറത്തേക്ക് തെരഞ്ഞെടുപ്പ് കമ്മീഷനെക്കുറിച്ചുള്ള ആശങ്കകൾ നീളുന്നുവെന്ന് ജൻ സൂരാജ് സ്ഥാപകൻ പ്രശാന്ത് കിഷോർ അഭിപ്രായപ്പെട്ടു. തെരഞ്ഞെടുപ്പ് പ്രക്രിയയിലെ പല കാര്യങ്ങളും കമ്മീഷൻ ഭരണകക്ഷിയെ സഹായിക്കുന്നുവെന്ന തോന്നൽ ഉണ്ടാക്കുന്നുവെന്ന് അദ്ദേഹം ആരോപിച്ചു. വ്യാഴാഴ്ച സമസ്തിപൂരിൽ മാധ്യമപ്രവർത്തകരോട് സംസാരിക്കുകയായിരുന്നു അദ്ദേഹം.
“തെരഞ്ഞെടുപ്പ് കമ്മീഷന്റെ പ്രവർത്തനരീതിയെക്കുറിച്ചും മുഴുവൻ തെരഞ്ഞെടുപ്പ് പ്രക്രിയയെക്കുറിച്ചും കഴിഞ്ഞ 8-10 വർഷമായി സമൂഹത്തിലെ വലിയൊരു വിഭാഗം ചോദ്യങ്ങൾ ഉയർത്തുന്നുണ്ട്. കാരണം, വോട്ടർ പട്ടിക തയ്യാറാക്കൽ, തെരഞ്ഞെടുപ്പ് തീയതികൾ നിശ്ചയിക്കൽ, മാതൃകാ പെരുമാറ്റച്ചട്ടം നടപ്പിലാക്കൽ, നിരീക്ഷകരെ വിന്യസിക്കൽ, വോട്ടെണ്ണൽ വേളയിലെ ക്രമക്കേടുകൾ തുടങ്ങിയ കാര്യങ്ങൾ തെരഞ്ഞെടുപ്പ് കമ്മീഷൻ ഏതോ വിധത്തിൽ ഭരണകക്ഷിയെ സഹായിക്കുന്നുവെന്ന വ്യക്തമായ ചിത്രം നൽകുന്നു.” – പ്രശാന്ത് കിഷോർ പറഞ്ഞു.
“ഗ്യാനേഷ് കുമാർ പദവി ഒഴിയണം, അതിനൊപ്പം മുൻ മുഖ്യ തെരഞ്ഞെടുപ്പ് കമ്മീഷണറായ രാജീവ് കുമാറും രാജി വെക്കേണ്ടതായിരുന്നു. കാരണം, വിരമിച്ച ഉടൻ തന്നെ രാജീവ് കുമാറിനെ എച്ച്‌ഡിഎഫ്‌സിയുടെ ചെയർമാനായി നിയമിച്ചു” എന്ന് അദ്ദേഹം കൂട്ടിച്ചേർത്തു.
നേരത്തെ, വോട്ടർ പട്ടിക പരിഷ്കരണ വിഷയം മുൻനിർത്തി മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിന്റെ രാജി ആവശ്യപ്പെട്ട് ‘ഇന്ത്യാ’ സഖ്യ നേതാക്കൾ തലസ്ഥാനത്ത് തുടർച്ചയായ മൂന്നാം ദിവസവും പ്രതിഷേധിച്ചിരുന്നു. ‘സത്യാഗ്രഹ’ത്തിന്റെ ഭാഗമായി രാജ്ഘട്ടിൽ മഹാത്മാഗാന്ധിക്ക് പ്രണാമമർപ്പിച്ചാണ് ഇവർ സമരം മുന്നോട്ടുകൊണ്ടുപോയത്. ലോക്‌സഭാ പ്രതിപക്ഷ നേതാവ് രാഹുൽ ഗാന്ധി, കോൺഗ്രസ് അധ്യക്ഷൻ മല്ലികാർജുൻ ഖാർഗെ, കോൺഗ്രസ് എം.പി പ്രിയങ്ക ഗാന്ധി വധ്ര തുടങ്ങിയ പ്രമുഖ നേതാക്കൾ രാജ്ഘട്ടിൽ നടന്ന പരിപാടിയിൽ പങ്കെടുത്തു.
അതേസമയം, പ്രതിപക്ഷത്തിന്റെ ആരോപണങ്ങൾ ബി.ജെ.പി തള്ളി. രാഹുൽ ഗാന്ധിക്ക് “ധൈര്യമുണ്ടെങ്കിൽ” രാജി വെക്കണമെന്ന് ബി.ജെ.പി ദേശീയ അധ്യക്ഷൻ നിതിൻ നബിൻ വെല്ലുവിളിച്ചു. രാഹുൽ ഗാന്ധിക്ക് “അരാജകത്വ മനോഭാവമാണ്” ഉള്ളതെന്നും അദ്ദേഹം കുറ്റപ്പെടുത്തി.
ഒക്ടോബർ 10-ന് ‘കോക്രോച്ച് ജനതാ പാർട്ടി’ ഡൽഹിയിൽ പ്രതിഷേധത്തിന് തയ്യാറെടുക്കുമ്പോഴും ‘ഇന്ത്യാ’ സഖ്യം തങ്ങളുടെ അടുത്ത നീക്കം പ്രഖ്യാപിച്ചിട്ടില്ല. വരും ദിവസങ്ങളിലെ തുടർനടപടികൾ സംബന്ധിച്ച് സഖ്യനേതൃത്വം ഇന്ന് വിശദീകരിക്കുമെന്നാണ് പ്രതീക്ഷിക്കുന്നത്.
