സിജെപി പ്രതിഷേധം: കസ്റ്റഡിയിലായ അഭിഭാഷകർക്കായി ചീഫ് ജസ്റ്റിസിന്റെ അടിയന്തര ഇടപെടൽ തേടി സുപ്രീം കോടതി ബാർ അസോസിയേഷൻ

ന്യൂഡൽഹി: ജന്തർ മന്തറിൽ നടന്ന സിജെപി പ്രതിഷേധത്തിനിടെ അഭിഭാഷകർക്കെതിരെ പോലീസിന്റെ ഭാഗത്തുനിന്ന് ബലപ്രയോഗമുണ്ടായ സംഭവത്തിൽ ചീഫ് ജസ്റ്റിസ് ഒഫ് ഇന്ത്യ സൂര്യ കാന്ത് അടിയന്തരമായി ഇടപെടണമെന്ന് സുപ്രീം കോടതി ബാർ അസോസിയേഷൻ ആവശ്യപ്പെട്ടു. മുതിർന്നവരും യുവാക്കളുമായ നിരവധിയാളുകളെ കസ്റ്റഡിയിലെടുത്ത നടപടിയെ എസ്സിബിഎ പ്രമേയത്തിലൂടെ അപലപിച്ചു.

ചീഫ് ഇലക്ഷൻ കമ്മീഷണർ ഗ്യാനേഷ് കുമാറിന്റെ രാജി ആവശ്യപ്പെട്ടാണ് സിജെപി പ്രതിഷേധം സംഘടിപ്പിച്ചത്. വോട്ടർ പട്ടികയിലെ പ്രത്യേക തീവ്ര പുനഃപരിശോധന, ഫോം 6-ൽ വരുത്തിയ മാറ്റങ്ങൾ എന്നിവ വഴി വോട്ടർ പട്ടികയിൽ കൃത്രിമം കാട്ടിയെന്നാണ് ഇവരുടെ ആരോപണം. പ്രതിഷേധത്തിൽ പങ്കെടുക്കാൻ പോകവേയാണ് അഭിഭാഷകരെ പോലീസ് കസ്റ്റഡിയിലെടുത്തത്.

എന്നാൽ, കസ്റ്റഡിയിലായ മുഴുവൻ അഭിഭാഷകരെയും പിന്നീട് മോചിപ്പിച്ചതായി എസ്സിബിഎ ഹോണററി സെക്രട്ടറി പ്രഗ്യ ബാഗേൽ അറിയിച്ചു. സംഭവത്തിൽ അന്വേഷണം നടത്തി നിയമപരമായി ഉചിതമായ നടപടികൾ സ്വീകരിക്കണമെന്നും അസോസിയേഷൻ ആവശ്യപ്പെട്ടു.