ജിമ്മില്ല, ഡയറ്റീഷ്യനുമില്ല; 65 കിലോ ഭാരം കുറയ്ക്കാൻ ടെക്കി ചെയ്തത് ഇത്രമാത്രം
അമിതഭാരം എന്നത് ഇന്ന് പല ഐടി പ്രൊഫഷണലുകളെയും അലട്ടുന്ന പ്രധാന പ്രശ്നമാണ്. ഉയർന്ന ജോലി സമ്മർദ്ദവും വ്യായാമമില്ലായ്മയും ജങ്ക് ഫുഡിനോടുള്ള അമിത താല്പര്യവും പലരെയും ഗുരുതരമായ ആരോഗ്യപ്രശ്നങ്ങളിലേക്ക് നയിക്കുന്നു. എന്നാൽ ജിമ്മിൽ പോകാതെയോ പോഷകാഹാര വിദഗ്ദ്ധന്റെ സഹായം തേടാതെയോ തന്റെ ശരീരഭാരത്തിൽ നിന്ന് 65 കിലോ കുറച്ച് അത്ഭുതം സൃഷ്ടിച്ചിരിക്കുകയാണ് ADSMITH സ്ഥാപകനായ നീരജ് ഝാ.
ഐസിയുവിൽ നിന്നുള്ള തിരിച്ചറിവ്
ഒരു കാലത്ത് 144 കിലോ ഭാരമുണ്ടായിരുന്ന നീരജിന്റെ ജീവിതം ശ്വാസംമുട്ടലിലും വിട്ടുമാറാത്ത ക്ഷീണത്തിലുമാണ് മുന്നോട്ട് പോയിരുന്നത്. 2023 ജൂണിൽ ശ്വാസകോശ സംബന്ധമായ അണുബാധയെത്തുടർന്ന് ഐസിയുവിൽ പ്രവേശിപ്പിക്കപ്പെട്ടതാണ് അദ്ദേഹത്തിന്റെ ജീവിതത്തിൽ നിർണായകമായത്. BiPAP മെഷീന്റെ സഹായത്തോടെ ഉറങ്ങിയ ആ രാത്രിയിൽ, താൻ വർഷങ്ങളായി ശ്വാസംമുട്ടുകയായിരുന്നു എന്ന യാഥാർത്ഥ്യം അദ്ദേഹം തിരിച്ചറിഞ്ഞു.
പരാജയപ്പെടാത്ത എട്ട് മിനിറ്റ്
സാധാരണയായി ആളുകൾ ഭാരം കുറയ്ക്കാൻ തീരുമാനിക്കുമ്പോൾ വലിയ ലക്ഷ്യങ്ങളാണ് വെക്കാറുള്ളത്. എന്നാൽ നീരജ് തെരഞ്ഞെടുത്തത് വളരെ ലളിതമായ വഴിയായിരുന്നു. ആദ്യ ദിവസം വെറും എട്ട് മിനിറ്റ് മാത്രമാണ് അദ്ദേഹം നടന്നത്. പതുക്കെ അത് പത്തും പതിനഞ്ചും മിനിറ്റായി വർദ്ധിപ്പിച്ചു. ‘കഠിനമായ എന്തും നിലനിൽക്കില്ല’ എന്ന തിരിച്ചറിവിൽ നിന്നാണ് അദ്ദേഹം ചെറിയ മാറ്റങ്ങൾ തുടങ്ങിയത്. ‘എല്ലാം അല്ലെങ്കിൽ ഒന്നുമില്ല’ എന്ന മനോഭാവത്തിന് പകരം സ്ഥിരതയ്ക്കാണ് അദ്ദേഹം മുൻഗണന നൽകിയത്.
ഭക്ഷണക്രമത്തിലെ ലളിതമായ മാറ്റങ്ങൾ
പഞ്ചസാര പൂർണമായും ഒഴിവാക്കിയും കാർബോഹൈഡ്രേറ്റ് കുറച്ചും അദ്ദേഹം തന്റെ ഭക്ഷണരീതി ക്രമീകരിച്ചു. മുട്ട, ചിക്കൻ, മത്സ്യം, പനീർ, പച്ചക്കറികൾ എന്നിവയുൾപ്പെട്ട ഉയർന്ന പ്രോട്ടീൻ ഡയറ്റാണ് അദ്ദേഹം പിന്തുടർന്നത്. മദ്യം പൂർണമായും ഉപേക്ഷിച്ചു. അഞ്ച് മാസത്തോളം ഭാരത്തിൽ മാറ്റമില്ലാതിരുന്ന ‘പീഠഭൂമി’ (Plateau) ഘട്ടത്തിലും അദ്ദേഹം തളരാതെ തന്റെ ശീലങ്ങൾ തുടർന്നു.
നീരജിന്റെ ഈ രീതി ശാസ്ത്രീയമായി ശരിയായ ഒന്നാണെന്ന് ആരോഗ്യവിദഗ്ദ്ധർ വിലയിരുത്തുന്നു. പെട്ടെന്നുള്ള മാറ്റങ്ങളേക്കാൾ, ശരീരം പൊരുത്തപ്പെടുന്ന തരത്തിലുള്ള സാവധാനത്തിലുള്ള ഭാരം കുറയ്ക്കലാണ് ശാശ്വതമെന്ന് മാക്സ് സൂപ്പർ സ്പെഷ്യാലിറ്റി ഹോസ്പിറ്റലിലെ ഡയറ്റെറ്റിക്സ് വിഭാഗം മേധാവി ഡിടി പ്രാചി ജെയിൻ പറയുന്നു.
ഇന്ന് 52ാം വയസ്സിൽ 79 കിലോ ഭാരവുമായി ആരോഗ്യവാനാണ് നീരജ്. തന്നെപ്പോലെ ബുദ്ധിമുട്ടുന്നവരെ സഹായിക്കാനായി ‘3E ഫിറ്റ്നസ്’ എന്ന വെൽനസ് പ്ലാറ്റ്ഫോമിനും അദ്ദേഹം തുടക്കം കുറിച്ചു. മാറ്റം ആഗ്രഹിക്കുന്നവർക്ക് നീരജിന് നൽകാനുള്ള ഉപദേശം ഇതാണ്: ‘പരിവർത്തനം ലക്ഷ്യമിടരുത്, സ്ഥിരത ലക്ഷ്യമിടുക. ഒരു എട്ട് മിനിറ്റ് നടത്തത്തിൽ നിന്ന് നിങ്ങൾക്കും തുടങ്ങാം.’
