മംദാനി ട്രംപിനെ ചെന്നു കണ്ടു; അന്യായമായി കസ്റ്റഡിയിലെടുത്ത മുസ്ലിം വിദ്യാർഥിനിയെ മണിക്കൂറുകൾക്കകം വിട്ടയച്ചു
വാഷിങ്ടൺ: കൊളംബിയ യൂനിവേഴ്സിറ്റിയിലെ മുസ്ലിം വിദ്യാർഥിനിയെ എമിഗ്രേഷൻ അധികൃതർ അറസ്റ്റ് ചെയ്ത സംഭവത്തിൽ സുപ്രധാന ഇടപെടലുമായി ന്യൂയോർക്ക് മേയർ സൊഹ്റാൻ മംദാനി. വ്യാഴാഴ്ച പുലർച്ചെ ഫെഡറൽ ഏജന്റുമാർ കസ്റ്റഡിയിലെടുത്ത അസർബൈജാനി വിദ്യാർഥിനിയായ എൽമിന അഘായേവയെ മണിക്കൂറുകൾക്കകം മോചിപ്പിച്ചു. മംദാനി പ്രസിഡന്റ് ഡൊണാൾഡ് ട്രംപുമായി നടത്തിയ കൂടിക്കാഴ്ചയ്ക്ക് പിന്നാലെയാണു വിട്ടയച്ചത്.
മാൻഹാട്ടനിലെ അപ്പാർട്ട്മെന്റിൽനിന്ന് വ്യാജവാർത്ത നൽകിയാണ് എമിഗ്രേഷൻ ആൻഡ് കസ്റ്റംസ് എൻഫോഴ്സ്മെന്റ് (ഐസിഇ) ഉദ്യോഗസ്ഥർ അഘായേവയെ പിടികൂടിയത്. കാണാതായ ഒരു കുട്ടിയെ തിരയുന്ന പോലീസാണെന്ന് അവകാശപ്പെട്ടാണ് ഉദ്യോഗസ്ഥർ അകത്തുകയറിയതെന്ന് സർവകലാശാല അധികൃതർ വ്യക്തമാക്കി. താൻ നിയമവിരുദ്ധമായി തടവിലാക്കപ്പെട്ടുവെന്നും സഹായിക്കണമെന്നും ആവശ്യപ്പെട്ട് അഘായേവ ഇൻസ്റ്റഗ്രാമിൽ പോസ്റ്റ് ചെയ്തതോടെ സംഭവം വലിയ വിവാദമായി.
വാഷിങ്ടണിൽ ഭവനപദ്ധതികളെക്കുറിച്ച് ചർച്ച ചെയ്യാൻ ട്രംപിനെ കണ്ട മംദാനി, അഘായേവയുടെ അറസ്റ്റിലുള്ള തന്റെ കടുത്ത ആശങ്ക പ്രസിഡന്റിനെ നേരിട്ട് അറിയിച്ചു. തുടർന്ന് ട്രംപ് ഉടൻ ഇടപെടുകയും വിദ്യാർത്ഥിനിയെ മോചിപ്പിക്കാൻ ഉത്തരവിടുകയുമായിരുന്നു. അഘായേവയെ ഉടൻ വിട്ടയക്കുമെന്ന് ട്രംപ് തന്നെ ഫോണിൽ വിളിച്ച് ഉറപ്പുനൽകിയെന്ന് മംദാനി സോഷ്യൽ മീഡിയയിൽ കുറിച്ചു. തൊട്ടുപിന്നാലെ അഘായേവ മോചിതയാവുകയും ചെയ്തു.
നേരത്തെ മംദാനിയെ രൂക്ഷമായി വിമർശിച്ചിട്ടുള്ള ട്രംപ്, ഇപ്പോൾ അദ്ദേഹത്തിന്റെ അഭ്യർത്ഥനകൾക്ക് വലിയ പ്രാധാന്യം നൽകുന്നത് അമേരിക്കൻ രാഷ്ട്രീയത്തിൽ കൗതുകമുണർത്തുന്നുണ്ട്. കൊളംബിയയിലെ ഫലസ്തീൻ അനുകൂല പ്രതിഷേധങ്ങളിൽ പങ്കെടുത്തതിന്റെ പേരിൽ നാടുകടത്തൽ ഭീഷണി നേരിടുന്ന മറ്റ് വിദ്യാർത്ഥികളുടെ കേസുകളും പിൻവലിക്കണമെന്ന് മംദാനി ട്രംപിനോട് ആവശ്യപ്പെട്ടിട്ടുണ്ട്.
അതേസമയം, വാറന്റില്ലാതെ ഫെഡറൽ ഏജന്റുമാരെ കെട്ടിടങ്ങളിൽ പ്രവേശിപ്പിക്കരുതെന്ന് കൊളംബിയ സർവകലാശാലാ അധികൃതർ ജീവനക്കാർക്ക് കർശന നിർദേശം നൽകി.
