മെറ്റയ്ക്ക് ഹൈക്കോടതി നോട്ടീസ്; മീഡിയവൺ ഫേസ്ബുക്ക് പേജ് ബ്ലോക്ക് പിൻവലിച്ചു
കൊച്ചി: ഹൈക്കോടതി നോട്ടീസിന് പിന്നാലെ മീഡിയവണിന്റെ ഫേസ്ബുക്ക് പേജിന് ഏർപ്പെടുത്തിയിരുന്ന നിയന്ത്രണം നീക്കി. ഇന്ത്യയിലെ പ്രേക്ഷകർക്ക് പേജ് ലഭ്യമാകാത്ത തരത്തിൽ ഫേസ്ബുക്ക് ഏർപ്പെടുത്തിയ വിലക്കാണ് ഇപ്പോൾ പിൻവലിച്ചത്.
മീഡിയവൺ ഫേസ്ബുക്ക് പേജ് ഇന്ത്യയിൽ ബ്ലോക്ക് ചെയ്ത നടപടിക്കെതിരെ ചാനൽ ഹൈക്കോടതിയെ സമീപിച്ചിരുന്നു. ഹരജി പരിഗണിച്ച കോടതി കേന്ദ്ര സർക്കാരിനും ഫേസ്ബുക്കിന്റെ മാതൃകമ്പനിയായ മെറ്റയ്ക്കും നോട്ടീസ് അയക്കാൻ ഉത്തരവിട്ടിരുന്നു. ഇതിന് പിന്നാലെയാണ് പേജ് പുനഃസ്ഥാപിക്കപ്പെട്ടത്.
കഴിഞ്ഞ വെള്ളിയാഴ്ച മുതലാണ് മീഡിയവണിന്റെ ഫേസ്ബുക്ക് പേജിന് ഇന്ത്യയിൽ നിയന്ത്രണം ഏർപ്പെടുത്തിയത്. നിയമനിർവഹണ ഏജൻസികളോ യൂണിയൻ ഓഫ് ഇന്ത്യയോ ആവശ്യപ്പെട്ടതനുസരിച്ചാണ് നടപടിയെന്നാണ് ഫേസ്ബുക്ക് അറിയിച്ചിരുന്നത്. എന്നാൽ, ഏത് പോസ്റ്റിന്റെ പേരിലാണ് അല്ലെങ്കിൽ ഏത് നിയമലംഘനത്തിന്റെ അടിസ്ഥാനത്തിലാണ് നടപടിയെന്ന് വ്യക്തമാക്കാൻ ഫേസ്ബുക്ക് തയാറായിരുന്നില്ല.
ഇതുകൂടാതെ, ഐടി ആക്ടിന്റെ ലംഘനമാണു നടപടിയെന്നും സുപ്രീം കോടതി വിധികളുടെ ലംഘനമാണെന്നും ചൂണ്ടിക്കാട്ടിയാണ് മീഡിയവൺ ഹൈക്കോടതിയിൽ ഹരജി നൽകിയത്. പ്രത്യേക കണ്ടന്റ് നീക്കം ചെയ്യാൻ അധികാരം ഉണ്ടെങ്കിലും ഒരു മാധ്യമ സ്ഥാപനത്തിന്റെ പേജ് പൂർണമായി ബ്ലോക്ക് ചെയ്യാൻ ഫേസ്ബുക്കിന് കഴിയില്ലെന്ന് ഹരജിയിൽ ചൂണ്ടിക്കാട്ടിയിരുന്നു.
