‘ജനങ്ങളാഗ്രഹിച്ച ഭരണത്തിന് നേതൃത്വം നൽകാൻ അവരാഗ്രഹിച്ച വ്യക്തിയെ തന്നെ ലഭിച്ചു’: സതീശന് ആശംസകളുമായി സാദിഖലി തങ്ങൾ
മലപ്പുറം: കേരളത്തിൻ്റെ നഷ്ടപ്പെട്ട പ്രതാപം തിരിച്ചുപിടിക്കാനുള്ള കാലമാണ് വരാനിരിക്കുന്നതെന്ന് മുസ്‌ലിം ലീഗ് സംസ്ഥാന അധ്യക്ഷൻ പാണക്കാട് സാദിഖലി ശിഹാബ് തങ്ങൾ അഭിപ്രായപ്പെട്ടു. വി.ഡി സതീശൻ കേരളത്തെ നയിക്കുമെന്ന പ്രഖ്യാപനത്തിന് പിന്നാലെ ഫേസ്ബുക്കിലൂടെയായിരുന്നു അദ്ദേഹത്തിന്റെ പ്രതികരണം. ജനങ്ങൾ ആഗ്രഹിച്ച ഭരണത്തിന് നേതൃത്വം നൽകാൻ അവർ ആഗ്രഹിച്ച വ്യക്തിയെ തന്നെ ലഭിച്ചിരിക്കുകയാണെന്നും അദ്ദേഹം കുറിച്ചു.
കഴിഞ്ഞ 10 വർഷം കൊണ്ട് കേവലമൊരു പരസ്യ വാചകം മാത്രമായി മാറിയ ‘നമ്പർ വൺ കേരളം’ എന്നത് ഇനി യാഥാർത്ഥ്യമാക്കണമെന്നും ഇതിനായി ഒറ്റക്കെട്ടായ പ്രവർത്തനം കരുത്താകുമെന്നും അദ്ദേഹം വ്യക്തമാക്കി. വികസന സൂചികകളിൽ കേരളത്തിന് നഷ്ടമായ ഒന്നാം സ്ഥാനം തിരിച്ചുപിടിക്കാനും ദുർഭരണമുണ്ടാക്കിയ വിള്ളലുകൾ തീർക്കാനും സദ്ഭരണം വരികയാണെന്ന് സാദിഖലി തങ്ങൾ ഫേസ്ബുക്ക് പോസ്റ്റിൽ കുറിച്ചു.
കേരളത്തിന്റെ ഉയിർത്തെഴുന്നേൽപ്പിന്റെ കാലമാണ് വരാനിരിക്കുന്നതെന്നും വി.ഡി സതീശൻ കേരളത്തെ നല്ല നാളെകളിലേക്ക് നയിക്കുമെന്നും അദ്ദേഹം പ്രത്യാശ പ്രകടിപ്പിച്ചു. ജനമിടിപ്പിനൊപ്പം ചേരാൻ പുതിയ മുഖ്യമന്ത്രിക്ക് സാധിക്കട്ടെയെന്നും കേരളത്തിന്റെ ഉയിർപ്പ് സാധ്യമാക്കാൻ ഈ നേതൃമാറ്റം ഉപകരിക്കുമെന്നും അദ്ദേഹം ആശംസിച്ചു.
