‘കാവിക്കും ഹിന്ദുത്വയ്ക്കുമെതിരെ വിരല്‍ ചൂണ്ടുന്ന എല്ലാവരെയും പാഠം പഠിപ്പിക്കും’: സുവേന്ദു അധികാരി

കൊൽക്കത്ത: വീടിന് നേരെ നടന്ന ആക്രമണത്തിന് പിന്നിൽ ഹിന്ദുത്വവാദികളാണെന്ന് ഫേസ്ബുക്കിൽ കുറിച്ച മുതിർന്ന സിപിഎം നേതാവ് ബികാഷ് രഞ്ജൻ ഭട്ടാചാര്യയ്ക്കെതിരെ രണ്ട് കേസുകൾ രജിസ്റ്റർ ചെയ്ത് പശ്ചിമ ബംഗാളിലെ ബിജെപി സർക്കാർ. ആർ.ജി. കർ മെഡിക്കൽ കോളജിൽ നടന്ന പൊതുപരിപാടിക്കിടെ ബംഗാൾ മുഖ്യമന്ത്രി സുവേന്ദു അധികാരി പരസ്യമായി ഭീഷണി മുഴക്കിയതിന് പിന്നാലെയാണ് പോലീസ് നടപടി.

“ബികാഷ് രഞ്ജന്റെ വീടാക്രമിച്ച സംഭവം അന്വേഷിക്കും. ഞാൻ ആവശ്യപ്പെട്ടതനുസരിച്ച് അക്രമിയെ പോലീസ് അറസ്റ്റ് ചെയ്തു. പക്ഷേ ആക്രമണം നടത്തിയത് ഹിന്ദുത്വവാദികളാണെന്ന് അയാൾ എങ്ങനെയാണ് പറയുക? അത് ഹിന്ദു സമുദായത്തെ അപമാനിക്കലാണ്. അയാൾക്കെതിരെയും നടപടിയെടുക്കും,” സുവേന്ദു അധികാരി ചടങ്ങിൽ സംസാരിക്കവെ വ്യക്തമാക്കി.

തുടർന്ന് പ്രതിപക്ഷ ശബ്ദങ്ങൾക്കെതിരെ കടുത്ത ഭാഷയിലാണ് മുഖ്യമന്ത്രി മുന്നറിയിപ്പ് നൽകിയത്:

“ഞാൻ ഇതങ്ങനെ വെറുതേ വിടാൻ പോകുന്നില്ല. കാവിക്കും സനാതന ധർമത്തിനും ഹിന്ദുത്വയ്ക്കും ദേശീയവാദി ശക്തികൾക്കുമെതിരെ വിരൽ ചൂണ്ടുന്ന എല്ലാവരെയും പാഠം പഠിപ്പിക്കും.”

സുവേന്ദു അധികാരിയുടെ ഈ പരാമർശങ്ങൾ വന്നതിന് പിന്നാലെ തോപ്സിയ, ഗർഫ എന്നീ രണ്ട് പോലീസ് സ്റ്റേഷനുകളിലാണ് ഭട്ടാചാര്യയ്ക്കെതിരെ എഫ്.ഐ.ആർ എടുത്തത്. സوشഷ്യൽ മീഡിയ കുറിപ്പിലൂടെ മതവികാരം വ്രണപ്പെടുത്തിയെന്നും സമാധാനാന്തരീക്ഷം തകർക്കാൻ ശ്രമിച്ചെന്നുമാണ് ആരോപണം.

കൊൽക്കത്ത മുൻ മേയറും മുതിർന്ന അഭിഭാഷകനുമായ ബികാഷ് രഞ്ജൻ ഭട്ടാചാര്യയുടെ കലികാപുരിലെ വസതിക്ക് നേരെ വ്യാഴാഴ്ച പുലർച്ചെ അഞ്ച് മണിയോടെയാണ് ആക്രമണമുണ്ടായത്. ബൈക്കിലെത്തിയ അജ്ഞാത സംഘം മദ്യക്കുപ്പികൾ വീടിന് നേരെ എറിഞ്ഞ് ജനൽച്ചില്ലുകൾ തകർക്കുകയും ഭീകരാന്തരീക്ഷം സൃഷ്ടിക്കുകയും ചെയ്യുകയായിരുന്നു. ആക്രമണസമയത്ത് വീട്ടുജോലിക്കാരൻ തലനാരിഴയ്ക്കാണ് പരിക്കേൽക്കാതെ രക്ഷപ്പെട്ടതെന്ന് പോലീസ് പരാതിയിൽ പറയുന്നുണ്ട്.

സംഭവത്തിന് പിന്നാലെ വ്യാഴാഴ്ച വൈകുന്നേരമാണ് ഭട്ടാചാര്യ തന്റെ ഫേസ്ബുക്ക് പ്രൊഫൈലിൽ പോസ്റ്റ് പങ്കുവെച്ചത്:

“ഹിന്ദുത്വവാദി ഗുണ്ടകൾ എന്റെ വീടാക്രമിച്ചു. അവർ മുഖവും ബൈക്കുകളുടെ നമ്പർ പ്ലേറ്റുകളും മറച്ചാണ് വന്നത്. ആസൂത്രിതമായിരുന്നു ആക്രമണം. ഇവർ തീവ്രവാദികളല്ലെങ്കിൽ മറ്റാരാണ്? ഇതൊന്നും കൊണ്ട് എന്നെ ഭീഷണിപ്പെടുത്താനാവില്ല. ഇനി ഞാൻ തോക്ക് ലൈസൻസിന് അപേക്ഷ നൽകും.” ഈ പോസ്റ്റ് അടിസ്ഥാനമാക്കിയാണ് ഇപ്പോൾ പോലീസ് നടപടിയെടുത്തിരിക്കുന്നത്.

അതിനിടെ, സംഭവത്തിൽ ഒരാളെ പോലീസ് അറസ്റ്റ് ചെയ്തിട്ടുണ്ട്. നരേന്ദ്രപൂർ സ്വദേശിയായ ബപ്പ ഗുചൈത്താണ് പിടിയിലായത്. ഇയാളെ നിലവിൽ ചോദ്യം ചെയ്തുവരികയാണെന്നും ആക്രമണത്തിന് പിന്നിലെ കൃത്യമായ ലക്ഷ്യം അന്വേഷിക്കുകയാണെന്നും പോലീസ് ഉദ്യോഗസ്ഥർ അറിയിച്ചു. അറസ്റ്റിന് പിന്നാലെ പ്രതി ബപ്പ ഗുചൈത്ത് തൃണമൂൽ കോൺഗ്രസിന്റെ കൊടി തലയിൽ ചുറ്റിനിൽക്കുന്ന ചിത്രം സോഷ്യൽ മീഡിയയിൽ പ്രചരിക്കുന്നുണ്ട്.

കൊലപാതകശ്രമം, നിയമവിരുദ്ധമായി തടഞ്ഞുവെക്കൽ, ജീവനും സ്വത്തിനും ഭീഷണി ഉയർത്തൽ, ക്രമസമാധാനം തകർക്കൽ തുടങ്ങിയ വകുപ്പുകൾ ചുമത്തിയാണ് ഇയാൾക്കെതിരെ കേസെടുത്തിട്ടുള്ളത്. തുടരന്വേഷണത്തിൽ തെളിവ് നശിപ്പിക്കൽ, വ്യാജരേഖ ചമയ്ക്കൽ എന്നീ കുറ്റങ്ങൾ കൂടി പോലീസ് ഉൾപ്പെടുത്തിയിട്ടുണ്ട്.