സിജെപി സമരത്തിനിടെ വിദ്യാർഥികളെയും സ്ത്രീകളെയും മർദിച്ച സംഭവം; നാല് ഹിന്ദു രക്ഷാദൾ പ്രവർത്തകർ അറസ്റ്റിൽ
ന്യൂഡൽഹി: കോക്‌റോച്ച് ജനതാ പാർട്ടി (സിജെപി) ഡൽഹിയിൽ സംഘടിപ്പിച്ച പ്രതിഷേധ പ്രകടനത്തിനിടെ വിദ്യാർഥികളെയും സ്ത്രീകളെയും ക്രൂരമായി മർദിച്ച കേസിൽ തീവ്ര വലതുപക്ഷ സംഘടനയായ ഹിന്ദു രക്ഷാദളിന്റെ നാല് പ്രവർത്തകരെ ഡൽഹി പോലീസ് അറസ്റ്റ് ചെയ്തു. ഒക്ടോബർ 10-ന് നടന്ന പ്രതിഷേധത്തിനിടെ ദീൻ ദയാൽ ഉപാധ്യായ (ഡിഡിയു) മാർഗിൽ വെച്ച് വിദ്യാർഥികളെയും സ്ത്രീകളെയും സംഘം ചേർന്ന് മർദിക്കുന്ന ദൃശ്യങ്ങൾ സമൂഹമാധ്യമങ്ങളിൽ വ്യാപകമായി പ്രചരിക്കുകയും വൻ രോഷത്തിന് വഴിവെക്കുകയും ചെയ്തതിന് പിന്നാലെയാണ് പോലീസിന്റെ ഈ നിർണ്ണായക നടപടി.
രാമൻ സെയ്നി (50), വിവേകാനന്ദ് എന്ന വിവേക് (32), കപിൽ കുമാർ (27), രവീന്ദർ സിങ് എന്ന ഗോവിന്ദ് ഹിന്ദു (35) എന്നിവരാണ് അറസ്റ്റിലായതെന്ന് പോലീസ് അറിയിച്ചു. ഇവർ തീവ്ര ഹിന്ദുത്വ സംഘടനയായ ഹിന്ദു രക്ഷാദളിലെ അംഗങ്ങളാണെന്ന് സ്വയം അവകാശപ്പെട്ടതായി മുതിർന്ന പോലീസ് ഉദ്യോഗസ്ഥൻ വ്യക്തമാക്കി. കമലാ മാർക്കറ്റ് പോലീസ് സ്റ്റേഷൻ പരിധിയിലാണ് കേസിനാസ്പദമായ സംഭവം നടന്നത്.
പ്രക്ഷോഭത്തിന്റെ ആദ്യ ദിനമായ ഒക്ടോബർ 10-ന് വിവിധയിടങ്ങളിൽ സംഘടിക്കാനെത്തിയ വിദ്യാർഥികൾക്ക് നേരെയാണ് അക്രമിസംഘം അഴിച്ചുവിട്ടത്. പെൺകുട്ടികളടക്കമുള്ള വിദ്യാർഥികളെ റോഡിലേക്ക് തള്ളിയിടുകയും മർദിക്കുകയും ചെയ്യുന്നത് പുറത്തുവന്ന വീഡിയോയിൽ വ്യക്തമായിരുന്നു. യൂണിഫോമിലുള്ള ഒരു പോലീസ് ഉദ്യോഗസ്ഥന്റെ സാന്നിധ്യത്തിലാണ് ഈ അക്രമം അരങ്ങേറിയതെന്നും ദൃശ്യങ്ങളിൽ കാണാമായിരുന്നു. നഗരത്തിൽ വ്യാപകമായ മുൻകരുതൽ കസ്റ്റഡി നടപടികൾ പുരോഗമിക്കുന്നതിനിടെ സുരക്ഷാ ഉദ്യോഗസ്ഥർ നടത്തിയ വിശദമായ പരിശോധനയിലാണ് സംഭവം നടന്ന കൃത്യമായ സ്ഥലം ഡിഡിയു മാർഗ് ആണെന്ന് തിരിച്ചറിഞ്ഞത്.
സംഭവത്തിൽ ഇരയായവരിൽ നിന്നും നേരിട്ട് പരാതികളൊന്നും ലഭിച്ചിരുന്നില്ലെങ്കിലും, ക്രൂരമായ അക്രമം നടത്തിയ പ്രതികൾ ഡൽഹി-എൻസിആർ മേഖല വിട്ട് ഒളിവിൽ പോകാൻ സാധ്യതയുണ്ടെന്ന രഹസ്യവിവരത്തെ തുടർന്ന് പോലീസ് സ്വമേധയാ (സുവോ മോട്ടോ) കേസെടുക്കുകയായിരുന്നു. തുടർന്നുള്ള തിരച്ചിലിൽ നാലുപേരെയും പോലീസ് കണ്ടെത്തുകയും അറസ്റ്റ് രേഖപ്പെടുത്തുകയുമായിരുന്നുവെന്ന് ഉന്നത പോലീസ് ഉദ്യോഗസ്ഥർ സ്ഥിരീകരിച്ചു.
