‘കീടങ്ങളെ തിരിച്ചറിയണം, മാറ്റിനിർത്തണം’: ഡൽഹി സമരത്തിന് പിന്തുണയുമായി ഗായകൻ സൂരജ് സന്തോഷ്

കൊച്ചി: മുഖ്യ തെരഞ്ഞെടുപ്പ് കമ്മിഷണർ ഗ്യാനേഷ് കുമാറിന്റെ രാജി ആവശ്യപ്പെട്ട് സിജെപിയും പ്രതിപക്ഷ പാർട്ടികളും ഡൽഹിയിൽ നടത്തുന്ന പ്രതിഷേധത്തിന് പിന്തുണ പ്രഖ്യാപിച്ച് പ്രമുഖ പിന്നണി ഗായകൻ സൂരജ് സന്തോഷ്. കൊച്ചി കുസാറ്റിൽ സംഘടിപ്പിച്ച സംഗീത പരിപാടിക്കിടെയാണ് അദ്ദേഹം രാജ്യതലസ്ഥാനത്ത് നടക്കുന്ന സമരത്തിന് ഐക്യദാർഢ്യം പ്രഖ്യാപിച്ചത്. ഡൽഹി സമരത്തിനെതിരെ സംസാരിക്കുന്നവർ ‘കീടങ്ങളാണെന്ന്’ വിശേഷിപ്പിച്ച ഗായകൻ, ഇത്തരം നിലപാടുകാരെ സമൂഹം കരുതിയിരിക്കണമെന്നും ആഹ്വാനം ചെയ്തു.

രാജ്യത്ത് നടക്കുന്ന ഗൗരവകരമായ സംഭവവികാസങ്ങൾ കണ്ടില്ലെന്ന് നടിക്കാൻ ജനങ്ങൾക്ക് കഴിയില്ലെന്ന് സൂരജ് സന്തോഷ് ചൂണ്ടിക്കാട്ടി. എസ്ഐആറിന്റെ പേരിൽ തെരഞ്ഞെടുപ്പ് പട്ടികയിൽ ക്രമക്കേട് കാണിച്ച ഉദ്യോഗസ്ഥനെ സംരക്ഷിക്കുകയും അതിനെതിരെ പ്രക്ഷോഭം നടത്തുന്ന യുവതലമുറയെ അടിച്ചമർത്തുകയും ചെയ്യുന്ന കേന്ദ്ര സർക്കാരിന്റെ നടപടിയെ അദ്ദേഹം ശക്തമായി വിമർശിച്ചു.

നമ്മുടെ അവകാശങ്ങൾക്ക് വേണ്ടിയാണ് യുവത്വം ഇന്ന് ഡൽഹിയിൽ തെരുവിൽ പോലീസിന്റെ അടിയേൽക്കുന്നതെന്ന് അദ്ദേഹം ഓർമിപ്പിച്ചു. ഈ പോരാട്ടത്തെക്കുറിച്ച് എല്ലാവരും സ്വയം പഠിക്കാൻ തയ്യാറാകണമെന്നും അദ്ദേഹം കൂട്ടിച്ചേർത്തു. സമരത്തെ എതിർക്കുന്നവർക്ക് പിന്നിൽ വർഗീയമായ ചേരിതിരിവ് സൃഷ്ടിക്കുക എന്ന വ്യക്തമായ ലക്ഷ്യമുണ്ടെന്നും, അത്തരം കീടങ്ങളെ തിരിച്ചറിഞ്ഞ് സമൂഹത്തിൽ നിന്ന് മാറ്റിനിർത്തേണ്ടത് ഓരോ പൗരന്റെയും കർത്തവ്യമാണെന്നും പ്രതികരിച്ചാണ് ഗായകൻ തൻ്റെ വാക്കുകൾ അവസാനിപ്പിച്ചത്.